بارلىق وڭىرگە جاڭا بوزكىلەمدەر سىيعا بەرىلەدى

جاقىندا  گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى ساۋات مىڭباەۆ پەن ۇلتتىق وليمپيادا كوميتەتىنىڭ باسشىسى  تيمۋر ق ۇلىباەۆتىڭ باستاماسىمەن ەلىمىزدىڭ بارلىق وڭىرلەرىندەگى سپورت مەكتەپتەرىن ارنايى كىلەمدەرمەن جابدىقتاۋ قولعا الىندى، دەپ حابارلادى ۇلتتىق وليمپيادا كوميتەتىنىڭ ءباسپاسوز قىزمەتى.

دەمەۋشىلەردىڭ كومەگىمەن اتقارىلىپ جاتقان جوبا كەلەسى جىلدىڭ ناۋرىز ايىنا دەيىن جالعاسادى. فەدەراتسيانىڭ ەسەبى بويىنشا الداعى ۋاقىتتا دامۋ جاعىنان ارتتا قالىپ جاتقان ايماقتارعا 150-دەن اسا كىلەم ۇلەستىرۋ جوسپاردا بار. سونىڭ 43-ءى قازىردىڭ وزىندە ءوز يەلەرىن تاپتى. اتاپ ايتساق، الماتى قالاسى، سولتۇستىك جانە باتىس قازاقستان، قاراعاندى، وڭتۇستىك قازاقستان وبلىستارىنداعى اۋداندار كىلەممەن قامتاماسىز ەتىلدى. ناقتىراق ايتقاندا، بۇگىندە شاحتينسك (قاراعاندى وبلىسى) مەن جەزقازعان، ساتباەۆ (قاراعاندى وبلىسى) قالالارىندا جانە تەرەكتى (بقو)، سىرىم (اتىراۋ وبلىسى)، مامليۋت (سقو) اۋداندارىنداعى بالالار مەن جاسوسپىرىمدەرگە ارنالعان سپورت مەكتەپتەرىنە ارنايى كىلەم توسەنىشتەرى جەتكىزىلگەن. الداعى ۋاقىتتا فەدەراتسيا باسشىلارى ەلىمىزدىڭ باسقا دا ايماقتارىنا قول ۇشىن سوزىپ، جاس پالۋانداردىڭ الاڭسىز جاتتىعۋ جاساۋىنا جاعداي جاساماق.

• كۇرەس – ەلىمىزدەگى ەڭ تانىمال سپورت تۇرلەرىنىڭ ءبىرى. سوندىقتان قازىرگى تاڭدا استانا مەن الماتى قالالارىنا جانە بارلىق 14 وبلىسقا قاراستى سپورت مەكتەپتەرىنە تەگىن كىلەمدەر ۇلەستىرىپ، كۇرەستىڭ دامۋىنا ۇلەسىمىزدى قوسىپ وتىرمىز. مۇنداي باستاما كۇرەس فەدەراتسياسى مەن سپورتتىق جەكپە-جەك جانە كۇش قولدانىلاتىن سپورت تۇرلەرى كونفەدەراتسياسى، ۇلتتىق وليمپيادا كوميتەتىنىڭ قولداۋىمەن جۇزەگە اسىپ جاتىر،— دەدى گرەك-ريم، ەركىن جانە ايەلدەر كۇرەسى فەدەراتسياسىنىڭ باس حاتشىسى اناتولي ۆولوحا.

گرەك-ريم كۇرەسىنەن بەيجىڭ وليمپياداسىنىڭ كۇمىس جۇلدەگەرى نۇرباقىت تەڭىزباەۆتىڭ ايتۋىنشا، فەدەراتسيانىڭ جۇرگىزىپ جاتقان مۇنداي ءىس-شاراسى ەلىمىزدەگى كۇرەستىڭ دامۋىنا وڭ ىقپالىن تيگىزەدى.

— گرەك-ريم، ەركىن جانە ايەلدەر كۇرەسى فەدەراتسياسىنىڭ مۇنداي باستاما كوتەرىپ، ايماقتارداعى كۇرەستىڭ دامۋىنا وڭ ىقپال جاساپ جاتقانىنا قۋانىشتىمىن. بارىمىزدە اۋىلدا وستىك. بولاشاق چەمپيونداردىڭ ءبارى اۋىلدان شىققان. سوندىقتان فەدەراتسيا باسشىلارىنىڭ الىس شالعايداعى اۋىل-اۋداندارعا كومەك قولىن سوزىپ، سپورت مەكتەپتەرىن قاجەتتى قۇرال-جابدىقتارمەن قامتاماسىز ەتىپ جاتقانى وتە دۇرىس، — دەدى ن.تەڭىزباەۆ.

قازىرگى تاڭدا ەلىمىزدە 130 مىڭعا جۋىق ادام تۇراقتى تۇردە كۇرەس تۇرلەرىمەن اينالىسىپ جاتىر. وسىلايشا، سوڭعى جىلدارى گرەك-ريم، ەركىن جانە ايەلدەر كۇرەسى فەدەراتسياسى ەلىمىزدە كۇرەس تۇرلەرىن دامىتۋ جولىندا كوپتەگەن يگى ءىس-شارالاردى قولعا الىپ وتىر. بۇگىندە ايماقتاردا جاس پالۋانداردىڭ كۇرەسپەن شۇعىلدانۋىنا جاقسى جاعداي جاسالعان.