الماتىدا ءداستۇرلى دودانىڭ جالاۋى جەلبىرەدى

«ادام دەنەسىنىڭ جەتىلۋى  — ونىڭ دەنساۋلىعى; ەگەر دەنىڭ ساۋ بولسا، وندا ونى ساقتاماق كەرەك، ال ەگەر ساۋ بولسا، وندا دەندى ساۋىقتىرۋ كەرەك» — دەپ، دەنساۋلىقتىڭ قادىرى تۋرالى ۇلى شىعىستىڭ ويشىلى  ءال-فارابي اسقان  بىلگىرلىكپەن ايتقان ەكەن. سپورت ومىرگە وپتيميستىك كوزقاراستى قالىپتاستىراتىن بولسا، وسى ءبىر قامشىنىڭ سابىنداي قىسقا ۋاقىتتا، دەنە قيمىلىن ارتتىرىپ، قوزعالىستى كۇشەيتكەندە عانا ومىرگە دەگەن سۇيىسپەنشىلىك ارتا تۇسەدى دەپ ويلايمىز.

جۋىردا اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ «ساۋىقتىرۋ دەنە مادەنيەتى»  كافەدراسىنىڭ ۇيىمداستىرۋىمەن  تاماشا ءبىر دەنساۋلىقتى جاقسارتۋعا  ارنالعان ءداستۇرلى سپارتاكيادا باستالدى.

نەگىزى ەلىمىزدەگى وقۋ وردالارى  اراسىندا  تۇڭعىش رەت ىرگەسى قالانعان  كيەلى  قارا شاڭىراقتىڭ تاريحى تەرەڭدە جاتقانىن  جاقسى بىلەمىز. بيىل ايتۋلى ءبىلىم ورداسى ءوزىنىڭ  90 جىلدىق مەرەيتويىن اتاپ وتكەلى وتىر. سوندىقتان دا ۋنيۆەرسيتەت ۇجىمى مەرەيتوي الدىنداعى ىزگىلىكتى شارالاردى باستاپ تا كەتتى. سونىڭ ءبىرى – وقۋ ورنىنىڭ سپورت سالاسىنا ارنالعان جارىستارى. 9 – 12 قاڭتار ارالىعىندا «دەنساۋلىق-2018» اتتى ءداستۇرلى سپارتاكيادا سالتاناتتى تۇردە جالاۋىن كوتەردى. بۇل سپورت شاراسىنىڭ دەنساۋلىققا پايداسى زور. ارينە، ۇلكەن سپورتتا جۇرمەگەندىكتەن اندا-ساندا وسىنداي سايىستارعا قىزۋ كىرىسىپ كەتكەن جاندارعا اۋىر تيەرى دە ءسوزسىز. ءتىپتى، جاراقات الىپ قالۋى دا مۇمكىن. مىسالى، جاستار اتقا شاۋىپ، سپورتتىڭ بىرنەشە تۇرىمەن بەلسەنە اينالىسسا، ورتا جاستان اسقان ەگدە ادامدار ءۇشىن جاياۋ ءجۇرىپ، ازداپ جۇگىرگەننىڭ ءوزى دەنساۋلىعىنا ۇلكەن سەپتىگىن تيگىزەتىنى ءسوزسىز. اتاقتى كلاسسيك جازۋشى عابيت مۇسىرەپوۆ «دۇرىس جولعا قويىلعان دەنەشىنىقتىرۋ ويىندارى وقۋ- ءبىلىم الۋعا بوگەت ەمەس، قايتا بويدى سەرگىتىپ، ويىنا جاردەم ەتەتىن نارسە» — دەگەن ەكەن. سوندىقتان دا  سپورتتىڭ جالپى ادامنىڭ دەنساۋلىعىنىڭ شىڭدالا تۇسۋىنە بەرەر پايداسى شەكسىز.

ۋنيۆەرسيتەتتىڭ ىشىندەگى پروفەسسور-وقىتۋشىلار قۇرامى مەن قىزمەتكەرلەر  وزارا مىقتىنى انىقتاۋ ءۇشىن سىن الاڭدارىندا ونەر كورسەتەدى.  سپورتتىڭ  فۋتزال، ۇستەل تەننيسى، ارقان تارتۋ،  شاحمات جانە ۆولەيبول، كونكي جانە شاڭعىمەن سىرعاناۋ سەكىلدى تۇرلەرىنەن وتەتىن تارتىستى جارىستار  دەنساۋلىق ءۇشىن قانشالىقتى ماڭىزدى ەكەندىگىن كورسەتسە، ءبىر جاعىنان جەڭىس ءۇشىن  جان اياماي سىنعا تۇسۋگە مۇمكىندىك بەرەدى.

جارىستىڭ سالتاناتتى اشىلۋىندا ءسوز سويلەگەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى  تاحير وسپان ۇلى  بالىقباەۆ «دەنساۋلىق-2018 سپارتاكياداسىنىڭ ءبىلىم سالاسىندا ۇستازدىق ەتىپ جۇرگەن وقىتۋشىلار ءۇشىن ورنى ايىرىقشا ەكەندىگىن ءسوز ەتىپ، سالاماتتى ءومىر، سپورت ارقىلى  ويى جۇيرىك، ءبىلىمدى، دەنساۋلىعى مىقتى قوعام جاستارىن تاربيەلەۋگە زور مۇمكىندىك بەرەتىندىگىن ايتىپ، جارىسقا قاتىسۋشىلارعا جەڭىس تىلەدى.

داستۇرمەن ەلىمىزدىڭ ءانۇرانى  وينالىپ، كوماندالار جارىس الاڭدارىنا  شىعىپ، جەڭىس ءۇشىن ويىندارىن باستاپ كەتتى.

سپارتاكيادانىڭ اۋىسپالى كۋبوگىن كوماندا بولىپ جەڭىپ الۋ وڭاي شارۋا ەمەس. سوندىقتان دا ۇستازدار قاۋىمى ءبىر قولدىڭ سالاسىنداي ۇجىمدىق ناتيجە كورسەتۋگە بارىن سالىپ جاتتى.

جارىستىڭ جوعارى دەڭگەيدە  ۇيىمداستىرىلۋىنا    مۇرىندىق بولىپ ۇلەسىن قوسقانداردىڭ ءبىرى  — «ساۋىقتىرۋ دەنە مادەنيەتى» كافەداراسى مەڭگەرۋشىسى، پروفەسسور امانتاي قاراقوۆپەن كەزدەسىپ، ايتۋلى شارا تۋرالى پىركىرىن تىڭداعانامىزدا: «ءبىزدىڭ سپارتاكيادانىڭ جىلدان جىلعا دەڭگەيى كوتەرىلىپ كەلەدى. ۋنيۆەرسيتەت وقىتۋشىلارى مەن قىزمەتكەرلەرىنىڭ سپورتقا دەگەن قۇمارلىعى ارتا تۇسكەنىن كورىپ كەلەمىز. نەگىزىگى ماقسات سپورت ارقىلى جاس ستۋدەنتتەرگە ۇلگى كورسەتىپ، سالاماتتى ءومىر سۇرۋگە كۇش سالۋ»، — دەپ ويىن ورتاعا سالعان ەدى.  راسىمەن دە  جوعارى وقۋ ورىندارىندا ۇستازدار اراسىنداعى  وتەتىن وسىنداي تارتىستى سايىستار، جاس ستۋدەنتتەرگە  ۇلكەن ۇلگى ەكەنى داۋسىز.

«ءبىزدىڭ باقىتىمىزدىڭ وننان توعىزى دەنساۋلىعىمىزعا بايلانىستى» — دەگەن ەكەن ا.شوپەنگاۋەر. ەندەشە سول باقىتىمىزدى دەنساۋلىعىمىزدان تابۋ ءۇشىن، وسىنداي  پايداسى شەكسىز سپورت شارالارىن سىرتاي تاماشالاماي  بەلسەنە قاتىسىپ وتىرۋدىڭ ءجونى بولەك ەمەس پە. اۋىرىپ ەم ىزدەگەنشە، اۋىرماۋدىڭ جولىن ىزدەۋ كەرەكتىگىنە كەي كەزدە  ءمان بەرمەي سوڭىنان زاردابىن تارتىپ جاتامىز. سول سەبەپتى وسىنداي سپورت شارالارىنىڭ ءجيى  ۇيىمداستىرىپ تۇرىلۋى، سالاماتتى ءومىر سۇرۋگە جەتەلەيتىن بەرەكەلى شارا دەپ بىلەمىز.

اقىن ورداباي ۇلى،

 الماتى