• Қазақ
  •   
  • Qazaq
  •   
  • قازاق
  •   
  • Рус
  •   
    ????????????????????????????????????

    Almatyda dástúrli dodanyń jalaýy jelbiredi

    «Adam denesiniń jetilýi  — onyń densaýlyǵy; eger deniń saý bolsa, onda ony saqtamaq kerek, al eger saý bolsa, onda dendi saýyqtyrý kerek» — dep, densaýlyqtyń qadiri týraly uly shyǵystyń oıshyly  ál-Farabı asqan  bilgirlikpen aıtqan eken. Sport ómirge optımıstik kózqarasty qalyptastyratyn bolsa, osy bir qamshynyń sabyndaı qysqa ýaqytta, dene qımylyn arttyryp, qozǵalysty kúsheıtkende ǵana ómirge degen súıispenshilik arta túsedi dep oılaımyz.

    Jýyrda Abaı atyndaǵy Qazaq ulttyq pedagogıkalyq ýnıversıtetiniń «Saýyqtyrý dene mádenıeti»  kafedrasynyń uıymdastyrýymen  tamasha bir densaýlyqty jaqsartýǵa  arnalǵan dástúrli spartakıada bastaldy.

    Negizi elimizdegi oqý ordalary  arasynda  tuńǵysh ret irgesi qalanǵan  kıeli  qara shańyraqtyń tarıhy tereńde jatqanyn  jaqsy bilemiz. Bıyl aıtýly bilim ordasy óziniń  90 jyldyq mereıtoıyn atap ótkeli otyr. Sondyqtan da ýnıversıtet ujymy mereıtoı aldyndaǵy izgilikti sharalardy bastap ta ketti. Sonyń biri – oqý ornynyń sport salasyna arnalǵan jarystary. 9 – 12 qańtar aralyǵynda «Densaýlyq-2018» atty dástúrli Spartakıada saltanatty túrde jalaýyn kóterdi. Bul sport sharasynyń densaýlyqqa paıdasy zor. Árıne, úlken sportta júrmegendikten anda-sanda osyndaı saıystarǵa qyzý kirisip ketken jandarǵa aýyr tıeri de sózsiz. Tipti, jaraqat alyp qalýy da múmkin. Mysaly, jastar atqa shaýyp, sporttyń birneshe túrimen belsene aınalyssa, orta jastan asqan egde adamdar úshin jaıaý júrip, azdap júgirgenniń ózi densaýlyǵyna úlken septigin tıgizetini sózsiz. Ataqty klassık jazýshy Ǵabıt Músirepov «Durys jolǵa qoıylǵan deneshynyqtyrý oıyndary oqý- bilim alýǵa bóget emes, qaıta boıdy sergitip, oıyna járdem etetin nárse» — degen eken. Sondyqtan da  sporttyń jalpy adamnyń densaýlyǵynyń shyńdala túsýine berer paıdasy sheksiz.

    Ýnıversıtettiń ishindegi professor-oqytýshylar quramy men qyzmetkerler  ózara myqtyny anyqtaý úshin syn alańdarynda óner kórsetedi.  Sporttyń  fýtzal, ústel tennısi, arqan tartý,  shahmat jáne voleıbol, konkı jáne shańǵymen syrǵanaý sekildi túrlerinen ótetin tartysty jarystar  densaýlyq úshin qanshalyqty mańyzdy ekendigin kórsetse, bir jaǵynan jeńis úshin  jan aıamaı synǵa túsýge múmkindik beredi.

    Jarystyń saltanatty ashylýynda sóz sóılegen Abaı atyndaǵy Qazaq ulttyq pedagogıkalyq ýnıversıtetiniń rektory  Tahır Ospanuly  Balyqbaev «Densaýlyq-2018 Spartakıadasynyń bilim salasynda ustazdyq etip júrgen oqytýshylar úshin orny aıyryqsha ekendigin sóz etip, salamatty ómir, sport arqyly  oıy júırik, bilimdi, densaýlyǵy myqty qoǵam jastaryn tárbıeleýge zor múmkindik beretindigin aıtyp, jarysqa qatysýshylarǵa jeńis tiledi.

    Dástúrmen elimizdiń ánurany  oınalyp, komandalar jarys alańdaryna  shyǵyp, jeńis úshin oıyndaryn bastap ketti.

    Spartakıadanyń Aýyspaly Kýbogyn komanda bolyp jeńip alý ońaı sharýa emes. Sondyqtan da ustazdar qaýymy bir qoldyń salasyndaı ujymdyq nátıje kórsetýge baryn salyp jatty.

    Jarystyń joǵary deńgeıde  uıymdastyrylýyna    muryndyq bolyp úlesin qosqandardyń biri  — «Saýyqtyrý dene mádenıeti» kafedarasy meńgerýshisi, professor Amantaı Qaraqovpen kezdesip, aıtýly shara týraly pirkirin tyńdaǵanamyzda: «Bizdiń Spartakıadanyń jyldan jylǵa deńgeıi kóterilip keledi. Ýnıversıtet oqytýshylary men qyzmetkerleriniń sportqa degen qumarlyǵy arta túskenin kórip kelemiz. Negizigi maqsat sport arqyly jas stýdentterge úlgi kórsetip, salamatty ómir súrýge kúsh salý», — dep oıyn ortaǵa salǵan edi.  Rasymen de  joǵary oqý oryndarynda ustazdar arasyndaǵy  ótetin osyndaı tartysty saıystar, jas stýdentterge  úlken úlgi ekeni daýsyz.

    «Bizdiń baqytymyzdyń onnan toǵyzy densaýlyǵymyzǵa baılanysty» — degen eken A.Shopengaýer. Endeshe sol baqytymyzdy densaýlyǵymyzdan tabý úshin, osyndaı  paıdasy sheksiz sport sharalaryn syrtaı tamashalamaı  belsene qatysyp otyrýdyń jóni bólek emes pe. Aýyryp em izdegenshe, aýyrmaýdyń jolyn izdeý kerektigine keı kezde  mán bermeı sońynan zardabyn tartyp jatamyz. Sol sebepti osyndaı sport sharalarynyń jıi  uıymdastyryp turylýy, salamatty ómir súrýge jeteleıtin berekeli shara dep bilemiz.

    Aqyn ORDABAIULY,

     ALMATY

     

    Pikir jazý

    Your email address will not be published. Required fields are marked *

    *