SportPress.kz قازاقستان سپورت جاڭالىقتارى
ەلىمىزدە فۋتبول سپورتتان گورى ۇلكەن بيزنەسكە اينالىپ كەتتى. باسشىلار ءۇشىن اقشا اينالدىراتىن قۇرال، ال فۋتبولشىلار ءۇشىن بۇل — جاقسى جۇمىس. فۋتبولشىلاردىڭ ايلىقتارى ءىرى كومپانيالاردىڭ توپ-مەنەدجەرلەرىنەن دە كوپ. ال، ناتيجە جوق. فۋتبولعا قانشا اقشا سالىنسا دا №1 سپورتتان پايدا جوق ەكەنىن ءبارىمىز كورىپ وتىرمىز. فۋتبولدى ءوز دەڭگەيىنە جانە نەگىزگى سيپاتىنا، ياعني سپورت دەڭگەيىنە تۇسىرسەك شە؟ فۋتبولشىلاردىڭ ورتاشا ايلىعى اقش دوللارىمەن ەسەپتەگەندە 1000 دوللار بولاتىن بولسا قالاي بولار ەدى؟ مۇنداي ايلىقتى قازاقستاندا بارلىق سپورت شەبەرلەرى الا بەرمەيدى، ونىڭ ىشىنە الەم چەمپيوندارى دا كىرەدى. بىراق، ولاردا ناتيجە بار، فۋتبولشىلاردا جوق. ءادىل مە؟ باعامداپ كورەيىك.
سونىمەن قازاقستاندىق فۋتبول كومانداسىنداعى ورتانقول فۋتبولشى 500 دوللار السا، جاقسىلارى 1000، ۇزدىكتەۋلەرى 2000 دوللار الاتىن بولسا جاعداي قالاي بولادى؟
تازارۋ كەزەڭى
الدىمەن ءوزىن جوعارى ساناتتاعى فۋتبولشىمىن دەپ سانايتىندار كوماندادان كەتەدى. شەتەلدەن دۇرىس كوماندا قاراپ كورەدى، بولماعاسىن شەتەلدىڭ تومەنگى ليگالارىنان ىزدەيدى. تاپقاندار بارادى، تابا الماعاندار فۋتبولمەن قوش ايتىسادى، بۇرىن جيناعان قورلارىمەن بيزنەس باستايدى. وسىلايشا الدىمەن «جۇلدىزداردان» قۇتىلادى قازاق فۋتبولى. ايتپاقشى، ەۋروپانىڭ كوپ ەلىندە بىزدەگىدەي ايلىق جوق. 3000-5000 دوللارعا جۇمىس تابۋ دا قيىن. ءبىزدىڭ فۋتبولشىلاردىڭ ەشقايسىسى شەتەلدە ويناماۋىنىڭ ءبىر سەبەبى دە وسى: ول جاقتا جاتتىعۋ، ءتارتىپ قيىن، ال اقشاسى قازاقستاننان دا از. سونداي-اق شەتەلدە ويناي الاتىنداي ادام دا شىقپادى ءالى. ونداي تالانت البەتتە ءبىر جەردى تەسىپ شىعار ەدى. ياعني، شەتەلدە قازاقستاندىقتاردىڭ بولماۋى وسى 2 سەبەپكە بايلانىستى.
جاستارعا مۇمكىندىك
سونىمەن «جۇلدىزدارسىز» قالعان قازاق كوماندالارىندا جاستارعا، شىنىمەن فۋتبول ويناعىسى كەلەتىندەرگە ورىن اشىلا باستايدى. 1000 دوللار (340 مىڭ تەڭگە) — پروۆينتسيالاردا وتە جاقسى ايلىق. بۇنى كەز كەلگەن جاس تۇسىنەدى. كومانداعا كىرۋگە تىرىسادى. موتيۆاتسيا جوق ەمەس، بار: جۇلدەلى ورىنعا ءىلىنىپ، ەۋروپا ساحناسىنا شىعىپ كورۋ، ءوزىن كورسەتۋ، ۇلتتىق قۇراماعا ىلىنۋگە تىرىسۋ. شىن فۋتبولشى بولعىسى كەلەتىندەر ءۇشىن جاقسى مۇمكىندىك تۋادى. اقشا جاعىنان دا جامان ەمەس.
ينفراقۇرىلىم دامۋى
كلۋبتار بۇرىنعىداي «ساپالى» لەگيونەرلەردەن، وتاندىق «جۇلدىزداردان» قۇتىلعاننان كەيىن بۇرىنعىداي بيۋدجەتتىڭ كوبىن ايلىقتارعا قۇرتپاي، فۋتبول اكادەميالارىن سالا باستايدى، ءار جاس ساناتى بويىنشا كوماندالارىن دايىنداي باستايدى. وسىلايشا بالالار فۋتبولى داميدى. ءوز بازالارىندا ءوز فۋتبولشىلارىن ءوسىرىپ شىعارادى.
ۇلتتىق قۇراما كۇشەيەدى
لەگيونەرلەر ۇلتتىق قۇرامامىزدان دا كەتە باستاپ، ءوز فۋتبولشىلارىمىز ويناي باستايدى. چەمپيونات ءالسىز بولعانىمەن شىن مىقتىلار ىرىكتەلىپ قۇرامانىڭ نەگىزىن قالاي باستايدى. مىسال رەتىندە قاراساڭىز ارمەنيا، بەلارۋس چەمپيوناتتارىنىڭ دەڭگەيى ءبىزدىڭ قازىرگى چەمپيوناتتان تومەن بولعانىمەن قۇرامالارى مىقتى. ول قۇرامالاردا شەتەلگە كەتكەن تالانتتى فۋتبولشىلارى جانە ىشكى چەمپيوناتتاعى كۇشتى ويىنشىلارى وينايدى.
باسقا سپورت تۇرلەرى دە داميدى
بۇرىن وبلىستىق بيۋدجەتتىڭ ۇلكەن بولىگى فۋتبولعا كەتىپ، باسقا تۇرلەرگە ماردىمسىز اقشا بولىنەتىن. ەندى ولاردىڭ دا پايلارى كوبەيىپ، سپورتشىلاردىڭ دايىندىقتارى كۇشەيەدى. ناتيجەسىندە ءبىرتالاي جاڭا الەم جانە وليمپيادا چەمپيوندارى پايدا بولادى. مىسال رەتىندە اقتوبە وبلىسىندا سوڭعى 10 جىلدا وليمپيادانى قويا تۇرساق نەشە الەم چەمپيونى شىقتى؟ فۋتبولدان باسقا قانداي كوماندالىق ويىن تۇرلەرى بار؟
جەكەشەلەندىرۋ
كوماندا ۇستاۋ بۇرىنعىداي قىمبات بولماعاندىقتان جەكە كاسىپكەرلەر ءوز كوماندالارىن قۇرۋى مۇمكىن. بۇل ءبىر جاعىنان فۋتبولداعى باسەكەلەستىكتى كۇشەيتەدى جانە كاسىپكەرگە بيزنەس تۇرعىسىندا دا پايدا اكەلەتىن بولادى. ويىنشى ترانسفەرلەرى، ەۋروكۋبوكتاردان تۇسەتىن سىياقىلار كاسىپكەرلەردى دە قىزىقتىرۋى ىقتيمال.
ليگالاردىڭ كوبەيۋى
فۋتبولدىڭ قىزىعى قازىر تەك پرەمەر ليگادا بولسا، بۇدان كەيىن 1-ليگا دا تارتىستى بولا باستايدى. ال، ودان تومەن ليگالاردا اۋداندىق، اۋىلدىق كوماندالار كوبەيە باستايدى. جاس تالانتتاردىڭ شىعۋى ءۇشىن بۇل دا جاقسى سەبەپ بولماقشى.
قورىتا كەلگەندە ايتارىم — ءبىزدىڭ فۋتبولدى ءوز دەڭگەيىنە تۇسىرمەي فۋتبولىمىز دامىمايدى. قازىر اقشانىڭ كوپتىگى كوپ نارسەگە كەدەرگى بولىپ تۇر. ءار نارسەگە ءوزىنىڭ شىن قۇنىن تولەسە عانا ناتيجە بولماق.
ارشات ورازوۆ
بىلتىرعى ماقالام ءالى دە وزەكتى 🙂
جاقسى ءبىر جاڭالىق جىل ەتسە، قۋانىپ قالامىز. مىنا جاڭادۆن اشىلىپ وتىرعان سايتتى قاراپ شىعىپ ريزا بولدىم. سپورت وقىرماندارىن قىزىقتىراتىن ارقيلى تاقىرىپتاعى اقپاراتتار كىمدى بولسا دا وزىنك تارتىپ اوارى بەلگىلى عوي. جانجاقتىلعى جوعارى ەكەن. ۋزاعىنان ءسۇيىندىرسىن. اق جول تىلەيمىن.