Qazaqstannyń bes atleti Azııa chempıony atandy

Irannyń astanasy Tehran qalasynda ótip jatqan jeńil atletıkadan VIII jabyq keshendegi Azııa chempıonatynyń ekinshi jarys kúninde qyzdarymyz 3 altyn jáne 2 kúmis medal jeńip aldy. Bul týraly Qazaqstan jeńil atletıka federaııasynyń baspasóz qyzmeti habarlady.

Iran Islam Respýblıkasynyń zańyna sáıkes, áıelder erlerden bólek jeke saıysqa túsýi qajet. Sondyqtan tańerteńnen túske deıin áıelder, odan keıin erler arasyndaǵy jarystar ótip jatyr.

Búgin, 2 aqpan kúni tańerteńgi baǵdarlamada qyzdarymyz jattyqtyrýshylar shtabynyń senimin aqtady. Fınalda óner kórsetken 6 sportshynyń beseýi júldege ilikti. Onyń ishinde úsheýi altyn medal.

400 metrge júgirgen Svetlana Golendova (Jambyl oblysy) men Elına Mıhına (ShQO) altyn men kúmis júldeni ózara bólisti. 24 jastaǵy Golendova márege 53.28 sekýndta jetti. Elına Mıhına óz kezeginde 53.49 sekýndpen ekinshi bolyp keldi. Qola júlde Shrı-Lanka sportshysyna buıyrdy.

Al 60 metrge tosqaýyldar arqyly júgirgen Áıgerim Shynazbekova qazaq qyzdary arasynan alǵash bolyp, jeńil atletıkadan jabyq keshendegi Azııa chempıony atandy. Áıgerim 60 metrdi 8.32 sekýndta júgirdi.

Úshinshi altyn júldege syryqpen sekirýshi Anastasııa Ermakova ıe boldy.17 jastaǵy sportshy Tehranda 3.70 metrge sekirip, sonyń arqasynda chempıon atandy. Ekinshi oryndaǵy Iran sportshysy 20 santımetrge qalyp qoıdy.

Anastasııa buǵan deıin 10 qańtarda О́skemende ótken Qazaqstan kýbogynda 3.81 metrge sekirip, jastar arasyndaǵy Qazaqstan rekordyn jańartqan edi.

Taǵy bir kúmis 60 metrge júgirgen Vıktorııa Zıabkınaǵa buıyrdy.Almatylyq 25 jastaǵy atlet fınalda 7.39 sekýndpen márege ekinshi keldi. Bas júlde qytaı qyzy Lıan Sıaochjıǵa (7,20) buıyrdy. Aıtpaqshy, Qytaı sportshysy jabyq keshendegi Azııa chempıonatynyń rekordyn jańartty.  Ol rekord buǵan deıin Vıktorııa Zıabkınaǵa tıesili bolatyn. Vıktorııa 2016  jyly Dohada dál osy qashyqtyqty 7.27 sekýndta júgirgen edi.

О́kinishke qaraı, Rıma Kashafýtdınova fınalda joǵary nátıje kórsete almady. Qaraǵandy oblysynyń atleti 7.50 sekýndpen besinshi oryndy qanaǵat tutty. Rıma eń bolmasa keshegi irikteý kezeńindegi nátıjesin qaıtalaǵanda qola júldege ıe bolar edi.

Aıta keteıik, Qazaqstan sportshylary jabyq keshendegi Azııa chempıonatynan   ázirge 5 altyn, 2 kúmis, 1 qola medal jeńip aldy.  Jalpy komandalyq esepte birinshi orynda kelemiz.