جەڭىل اتلەتتەر الەم چەمپيوناتىنا بارا جاتىر

جەڭىل اتلەتيكادان جابىق كەشەندەگى  الەم چەمپيوناتىنا قاتىساتىن قازاقستاندىق جەڭىل اتلەتتەر تولىعىمەن انىقتالدى. بۇل تۋرالى قر جەڭىل اتلەتيكا فەدەراتسياسىنىڭ ءباسپاسوز قىزمەتى حابارلادى.

1-4 ناۋرىز ارالىعىندا وتەتىن الەم چەمپيوناتىنىڭ ءنورماتيۆىن ورىنداۋ ۋاقىتى اياقتالدى.

جابىق كەشەندەگى جارىسقا قاتىسۋ جازعى الەم چەمپيوناتى مەن وليمپيادا ويىندارىنان دا قيىن. ويتكەنى، مۇندا ءنورماتيۆتىڭ كورسەتكىشتەرى وتە جوعارى بولۋ كەرەك.

بيىلعى الەم چەمپيوناتى ۇلىبريتانيانىڭ بيرمينگەم قالاسىندا بولادى. وسى سىندا قازاقستان 400 مەترگە جۇگىرەتىندەرگە سەنىم ارتىپ وتىر.

ەرلەردەن ەل نامىسىن جالعىز ميحايل ليتۆين قورعايدى. ول 2017 جىلى اشعابادتا وتكەن جابىق كەشەندەگى ازيا ويىندارىندا قولا مەدال جەڭىپ الىپ ءارى ءوزىنىڭ جەكە رەكوردىن جاڭارتقان – 46.51 سەكۋند. الەم چەمپيوناتىنىڭ ءنورماتيۆى –  46.70.

ايەلدەردەن جەكەلەي سىندا ەكى سپورتشى قاتىساتىن بولدى. ولار – ەلينا ميحينا مەن سۆەتلانا گولەندوۆا.

16 اقپان كۇنى وسكەمەندە وتكەن قازاقستان كۋبوگىنىڭ ەكىنشى كەزەڭىندە 400 مەترگە جارىسقان ميحينا مەن گولەندوۆا الەم چەمپيوناتىنىڭ ءنورماتيۆىن ورىنداعان بولاتىن. العاشقىسى مارەگە 52.53 سەكۋندتا جەتىپ، قازاقستاننىڭ جابىق كەشەندەگى رەكوردىن جاڭارتتى. سۆەتلانانىڭ ۋاقىت كورسەتكىشى – 52.76.

ايتا كەتەيىك، ايەلدەر اراسىندا 400 مەتردىڭ ءنورماتيۆى – 53.15 سەكۋند.

الەم چەمپيوناتىندا سونداي-اق، كوماندالىق ەستفەتادان 4ح400 مەترگە جۇگىرەتىن قىزدار قۇراماسى ونەر كورسەتەدى. ۇلتتىق قۇرامانىڭ باپكەرلەر شتابى ەستافەتادا – ەلينا ميحينا، سۆەتلانا گولەندوۆا، ادەلينا احمەتوۆا، ليۋبوۆ ۋشاكوۆاعا سەنىم ارتىپ وتىر.

جوعارىدا اتالعان سپورتشىلاردان بولەك، وليمپيادا چەمپيونى ولگا رىپاكوۆانىڭ دا قاتىسۋىنا بولار ەدى. بىراق ەلىمىزدەگى ەڭ تيتۋلدى جەڭىل اتلەت قىسقى ماۋسىمداعى جارىستاردان دەمالىپ، جازعى ازيا ويىندارى مەن «گاۋھار ليگا» سايىستارىنا دايىندالاتىنىن ايتتى.

چەمپيوناتتا ەرلەر مەن ايەلدەر اراسىنداعى 26 مەدال جيىنتىعى ساراپقا سالىنادى.