الماتىدا وليمپياداعا ءىزباسارلار دايىندايدى

قازاقستانننىڭ قاي جەرىندە جارىس وتپەسىن، الماتىداعى قاركەن احمەتوۆ اتىنداعى وليپياداعا ءىزباسارلار دايىندايتىن ارنايى رەسپۋبليكالىق مامانداندىرىلعان مەكتەپ-ينتەرنات كوللەدجىنىڭ جالىندى دا دارىندى جاس سپورتشىلارى قاتىسپاي قالعان ەمەس. ويتكەنى، تامىرى تەرەڭنەن ءنار العان بۇل سپورت مەكتەبىنىڭ قابىرعاسىنان ەلىمىزگە، ءتىپتى الەمگە تانىمال دارابوز ساڭلاقتاردىڭ قاتارى كوپتەپ شىققانىن جانكۇيەر قاۋىم جاقسى بىلەدى. سوندىقتان دا ونى تالانتتاردى تاربيەلەپ، ۇلى دۇبىرگە قوسىپ بەرىپ وتىرعان بەرەكەلى ۇستاحانا دەپ بىلەمىز. سارالاي وتسەك، 1976 جىلعى مونرەال وليمپياداسىنىڭ چەمپيونى اناتولي بىكوۆ، 1996 جىلعى اتلانتا وليمپياداسىڭ التىن جۇلدەگەرى الەكساندر پارىگين، بەيجىڭ وليمپياداسىنىڭ كۇمىس جۇلدە يەسى اسحات جىتكەەۆ، ريو-دە- جانەيرو وليمپياداسىنىڭ كۇمىس جۇلدەگەرى، الەم چەمپيونى ەلدوس سمەتوۆ، سوچي وليمپيادانىڭ قولا جۇلدەگەرى دەنيس تەن، لوندون وليمپياداسىندا  رەسەي قۇراماسىنىڭ ساپىندا  كۇمىس مەدالگە يە بولعان، ايتۋلى ق.احمەتوۆ مەكتەبىنىڭ ءتول تۇلەگى سوفيا ۆەليكايا، الەم چەمپيونى جاسۇلان قىدىرباەۆ جانە دە قانشاما تالانتتاردى ەلىمىزە تانىتقان باپكەرلەر ۆيتالي شتىحلين، الەكسەي اتاەۆ، شورا يۋماشەۆ، الي حامحوەۆ، ەلدار ءالىمجانوۆ، دانيار وتەشوۆ،جاڭاباي وسپانوۆ سىندى ارداقتى ازماتتاردىڭ توككەن ماڭداي تەرلەرى بەكەر كەتپەدى.

ەل سپورتىنا وشپەستەي ءىز قالدىرعان جانداردىڭ سالىپ كەتكەن سارا جولدارىن بۇگىنگى  ق.احمەتوۆ اتىنداعى رەسپۋبليكالىق ارنايى مامانداندىرىلعان مەكتەپ-ينتەرناتتىڭ وليمپيادا ءىزباسارلارى كوللەدجىنىڭ جاس جەتكىنشەكتەرى ابىرويمەن جالعاستىرىپ كەلەدى.

جاڭا كەلگەن 2018 جىلدان بەرى ايتۋلى مەكتەپتىڭ دارىندى جاستارى ەل بىرىنشىلىكتەرىندە دە تولاعاي تابىستارمەن باستادى. ايتالىق، قاڭتار ايىندا سۇلۋ كوكشەنىڭ بۋراباي تاۋىنىڭ ەتەگىندە باسكەتبولدان 2003-2004 جىلداردا تۋعان جاسوسپىرىمدەر اراسىندا وتكەن قازاقستان چەمپيوناتىندا ۆيكتور كونكوۆ 1 ورىندى جەڭىپ السا، وسمان ۋسمانوۆ، باحودير سايديكاريموۆ، قازىبەك سەرىكباي  كۇمىس جۇلدەگەر اتانعان. ال، اندرەي رەپالوۆ قولا جۇلدەگە يە بولعان. سونىمەن بىرگە،  اقتاۋ قالاسىندا اقپان ايىندا دزيۋدو كۇرەسىنەن ەرەسەك جاسوپىرىمدەر اراسىندا جالاۋىن كوتەرگەن قازاقستان چەمپيوناتىندا اسلان لەس پەن بەكارىس سادۋاقاس التىن جۇلدەلەردى جەڭىپ السا، كۇمىس مەدالدى مۇحامبەت راحمەت مويىنىنا تاعىپ قايتتى. قولا جۇلدەلەلەر  جانسايا امانباەۆا، كاميلا ىسقاقوۆا، تىلەگەن تىنىربايعا تابىس ەتىلدى. ەركىن كۇرەستەن اقپان ايىنىڭ باسىندا قارعاندى قالاسىندا 23 جاسقا دەيىنگى جاستار اراسىندا وتكەن ەل بىرىنشىلىگىندە الىشەر ەرعالي مەن ايار كەنجەەۆ جۇلدەلى ءۇشىنشى ورىندى يەلەنگەن.  اۋىر اتلەتيكادان وتكەن ءدۇبىرلى باسەكەدە دە ايتۋلى مەكتەپتىڭ تۇلەكتەرىنىڭ  قانجىعالارى مايلانىپ كەلەدى. قىزىلوردا قالاسىندا 20 جاسقا دەيىنگى جاستار اراسىندا ۇيىمداستىرىلعان قازاقستان چەمپيوناتىندا اينۋر ابدىقالىقوۆا ەكىنشى، نۇراي قاسەنالى قولا جۇلدەنى قاناعات تۇتتى. سەمسەرلەسۋ سپورتى دا بۇل مەتەپتىڭ تالانتتارى ءۇشىن ءساتتى جىلدىڭ باسى بولىپ باستالدى. دۋبايدا سەمسەرلەسۋدەن اقپان ايىندا  وتكەن حالىقارالىق سىندا كيريلل پاۆلوۆ تاماشا ونەر كورسەتىپ قولا جۇلدەمەن ەلگە ورالدى.

مىنە، وسى اتتارى اتالعان دارىندى جاستاردىڭ بارلىعى دەرلىك ق.احمەتوۆ اتىنداعى مەكتەپتىڭ ورەندەرى.

ق.احمەتوۆ اتىنداعى رەسپۋبليكالىق ارنايى مامانداندىرىلعان مەكتەپ-ينتەرناتتىڭ وليمپياداعا ءىزباسارلار دايىندايتىن كوللەدجىنىڭ ءبىر ەرەكشىلىگى – اۋىل-ايماقتاردا تالانتىمەن تانىلىپ جۇرگەن قاراكوز جاسوسىپىمدەردىڭ وسى مەكتەپتىڭ تابالدىرىعىن اتتاۋىنا  كوپ مۇمكىندىكتەر قاراسىتىرىلىعان. ق.احمەتوۆ اتىنداعى سپورت ورداسىنىڭ جاستارى باسكەتبول، ۆەلوسپورت، ۆولەيبول، سۋ دوبى، ەركىن كۇرەس، اۋىر اتلەتيكا، ءجۇزۋ، گرەكو-ريم كۇرەسى، دزيۋدو، قازىرگى بەسسايىس، بايداركا مەن كانوەدا ەسكەك ەسۋ، سينحروندى ءجۇزۋ، سەمسەرلەسۋ، جاعاجاي ۆولەيبولى، كوركەم گيمناستيكا، سپورتتىق گيمناستيكا، مۇزدا سىرعاناۋ، شايبالى حوككەي، تەننيس، جەڭىل اتلەتيكا، سۋعا سەكىرۋ سەكىلدى وليمپيادالىق سپورت تۇرلەرىمەن اينالىسىپ، شەبەرلىكتەرىن شىڭدايدى.

قازىرگى تاڭدا بۇل مەكتەپ تۇگەلدەي كۇردەلى جوندەۋدەن ءوتىپ، ەرەكشە زاماناۋي ورىنعا اينالىپ وتىر. ونىڭ بارلىعى باسشىلىققا تىكەلەي بايلانىستى ەكەندىگىندە ءسوز جوق. ارينە، وتكەن كەزەڭدەردەگى ءار جىلداردا باسشىلىق تىزىگىن تارتقان ازماتتاردىڭ جۇمىسىن جوققا شىعارۋعا بولمايدى. دەگەنمەن قازىرگى جان-جاقتى جاڭارۋ زامانىندا، تەحنولوگيالىق دامۋ داۋىرىندە ەسكى ادەتپەن، مارعاۋ ءومىر ءسۇرۋ توقىراۋعا اپاراتىنىن ۋاقىت دالەلدەپ وتىر. سوندىقتان دا زامان اعىمىنا ساي قىراعى كوزدى، بىلىكتى مامان باسشىلار ءاربىر مەكەمەگە اۋاداي قاجەت. وسى ورايدا، 2016 جىلدىڭ ءساۋىر اتالعان مەكەمەگە ايىندا سەيىلحان قاراقوۆ باسشىلىققا شاقىرىلعان بولاتىن. تاريحى تەرەڭدە جاتقان سپورت مەكتەبىنىڭ سىرتقى  جۇپىنى كورىنىسى مەن ايانىشتى ءحالىن ءبارىمىز بىلەتىنبىز. وسىنداي ولقىلىقتىڭ ورنى تولتىرۋ جولىندا جاڭادان كەلگەن سۋ جاڭا ديرەكتور سەيىلقان باقتىعالي ۇلى بىردەن ىسكە بەلسەنە  كىرىسىپ كەتتى. جىل بويى قۇرىلىس جۇمىستارى كوپ ۇزاماي كوزگە دە كورىندى. وقۋ-اكىمشىلىك كورپۋسى، 300 ورىندىق جاتاقحانا، سپورت زالى، دزيۋدو اكادەمياسىنىڭ عيماراتى، 25 مەترلىك 5 ءجۇزۋ جولدارىنا بولىنگەن  حاۋىزى، 100 ادام كەڭىنەن وتىرىپ تاماقتاناتىن اسحانالاردىڭ  تولىقتاي جاڭادان قۇرىلىسى جۇرگىزىلىپ قاراسا  قىزىعاتىن كورىنىسكە اينالعان. مەديتسينالىق بولىمشەگە قازىرگى زامانعا ساي مەديتسينالىق قۇرىلعىلار قويىلسا، وقۋ جانە كومپيۋتەرلىك-لينگوفوندىق كابينەتتەر، كىتاپحانا قورى تۇگەلدەي دەرلىك جاڭاشا تەحنولگيالارمەن جابدىقتالىپ، تالاپكەر جاستاردىڭ  بىلىممەن سۋسىنداۋىنا ايىرىقشا جاعداي جاسالعان. مىنە، ايتا بەرسە، تاۋسىلمايتىن تولاعاي تابىستارعا تولى ايتۋلى  سپورت مەكتەبىنىڭ كەلەشەگى كەمەل ەكەندىگىنە كوز جەتكىزىپ تۇرعانداي. جاعداي جاسالعان جەردە جەتىستىكتەر مىندەتتى تۇردە كەلەتىنى ول  زاڭدىلىق اكسيوما. جىل باسىنان بەرى ق.احمەتوۆ اتىنداعى رەسپۋبليكالىق ارنايى مامانداندىرىلعان مەكتەپ-ينتەرناتتىڭ كوللەدجىندە  دارىس الىپ، سپورتپەن شىڭدالىپ جاتقان جاس جەتكىنشەكتەردىڭ الداعى كۇنگە دەگەن ارمانى  اسقاق. ەڭ بيىك ماقسات ول ارينە وليمپيادا اسۋىنا كوتەرىلىپ، ەلىمىزدىڭ كوك بايراعىن كوكتەن جەلبىرەتۋ ەكەندىگى كوڭىل قۋانتادى.

اقىن ورداباي ۇلى

الماتى