• Қазақ
  •   
  • Qazaq
  •   
  • قازاق
  •   
  • Рус
  •   

    ءبىرتۋار ءبىرجان

    «ەلىمىزدە ۇلتتىق سپورتتىڭ ءورىسى كەڭەيدى» دەپ كەۋدە كەرە ايتىپ ءجۇرمىز. راسىندا دا سولاي عوي. مەملەكەتتىك تۇرعىدان كوڭىل ءبولىندى. اسىرەسە، كوكپار، اۋدارىسپاق، تەڭگە ءىلۋ، بايگە، جامبى اتۋدىڭ باسەكەلەرى ءتىپتى كوبەيدى. بىرنەشە مارتە حالىقارالىق جارىس ۇيىمداستىرىلدى. ىلگەرىدە توي-تومالاقتا عانا تاماشالاناتىن ۇلتتىق سپورتىمىز ەندى ەلىشىلىك چەمپيونات دەڭگەيىندە، كۇنتىزبەلىك جوسپارمەن تۇراقتى تۇردە وتە باستادى. ونىڭ ءوزى كەشەلى-بۇگىن ەمەس. مىسالى، 2017 جىلى كوكپار مەن اۋدارىسپاقتان ەرەسەكتەر اراسىنداعى قازاقستان چەمپيوناتى ون جەتىنشى مارتە ۇيىمداستىرىلدى. ارينە، ايتقانعا وڭاي، كورگەنگە قىزىق. بىراق، قايسىسى ەستە قالدى؟ قازاقستان چەمپيوناتى بىلاي تۇرسىن، ازيا چەمپيوناتىندا توپ جارىپ، ۇلتتىڭ ابىرويىن اسقاقتاتقان نامىستى سپورتشىلارىمىز از ەمەس. سولاردىڭ اراسىنان كىمدەردى بىلەمىز؟ بۇل ساۋالعا دا كوبىمىزدىڭ كۇمىلجيتىنىمىز انىق.

    ءبىز الداعى ۋاقىتتا وسى ولقىلىقتىڭ ورنىن تولتىرۋدى وزىمىزگە مىندەت تۇتتىق. ارينە، ۇلتتىق سپورتتىڭ وتىمەن كىرىپ، ك ۇلىمەن شىعۋعا ءبۇتىن ءومىرىن باعىتتاعان ازاماتتارىمىزدىڭ قاتارى قالىڭ. باپكەر دە، سپورتشى دا كوپ-اق. بارلىعىن ءبىر مەزەتتە تانىستىرۋدىڭ قيسىنى تاعى جوق. سوندىقتان، ەندىگى جەردە ءىستىڭ رەتىنە، ساتىنە قاراي ۇلتتىق سپورتىمىزدىڭ ۇزدىكتەرى تۋرالى جيىرەك قالام تەربەپ كورمەكپىز. بۇگىنگى كەيىپكەرىمىز، سوڭعى التى جىل بويى ەش جەكپە-جەكتە جەڭىلىپ كورمەگەن اۋدارىسپاق بالۋانى – ءبىرجان قوساليەۆ.

    الدىمەن ءبىرجاننىڭ سپورتتاعى جەتىستىكتەرىنىڭ سۇبەلى تۇستارىنا ءبىر توقتالىپ وتەيىك. ءبىرجان قوساليەۆ – ەلىشىلىك چەمپيوناتتا التى دۇركىن جەڭىمپاز، بىرنەشە مارتە جۇلدەگەر اتاندى. ءى اشىق ازيا چەمپيوناتىنىڭ اسا اۋىر جانە ءابسوليۋتتى سالماقتاعى چەمپيونى (2014). قىرعىزستاندا وتكەن ءىى دۇنيەجۇزىلىك كوشپەلىلەر ويىندارىندا باس جۇلدەنى يەلەندى (2016). قىتاي ەلىندە وتكەن ءىى اشىق ازيا چەمپيوناتىنىڭ جەڭىمپازى (2016). استانادا وتكەن ءى حالىقارالىق ءتۋرنيردىڭ اسا اۋىر جانە ءابسوليۋتتى سالماقتاعى چەمپيونى (2017).

    ءبىرجان 2011 جىلدان بەرى قازاقستاننىڭ اۋدارىسپاق قۇراما كومانداسىندا اسا اۋىر سالماقتاعى ءنومىرى ءبىرىنشى سپورتشى. ونىڭ ۇلكەندى-كىشىلى فەستيۆال، تۋرنيرلەردەن يەلەنگەن باسقا اتاقتارى ءوز الدىنا ءبىر توبە. ەندەشە ازيا قۇرىلىعىندا قارسىلاس شاق كەلتىرمەي، التى جىل بويى كىلەڭ جەڭىس تۇعىرىنا تابان تىرەۋمەن كەلگەن وسى اۋدارىسپاق الىبىمەن جاقىنىراق تانىسىپ كورىڭىزدەر. اتاقتى قوساليەۆ تۋرالى ءبىرجاننىڭ وزىنەن اسىرىپ ەشكىمنىڭ ايتا الماسى انىق. اۋدارىسپاقتىڭ قىر-سىرىن دا ودان ارتىق بىلەر كىم بار؟ سوندىقتان سىرتىنان جازىپ، سىپىرا ماقتاۋعا ۇرىنباي ءبىرجاننىڭ وزىمەن تىكەلەي تىلدەسكەندى ءجون كوردىك. نازارلارىڭىزعا ۇسىنعانىمىز ءبىزدىڭ ساۋالىمىزعا وراي ايتقان ءبىرجاننىڭ ءوز اڭگىمەلەرى.

    – ءبىرجان، سەنىڭ اۋدارىسپاق جەكپە-جەگىندەگى جەڭىستى جولىڭدى جولىڭدى جاقسى بىلەمىز. ال، وسى اۋدارىسپاققا دەيىن قانداي سپورت تۇرىمەن اينالىستىڭ؟ العان اتاقتارىڭ بار ما؟

    – مەن تۋىپ-وسكەن وڭتۇستىك قازاقستان وبلىسىنىڭ تولەبي اۋدانىنا قارايتىن مايبۇلاق اۋىلىندا ناقتى ءبىر سپورت تۇرىمەن شۇعىلداناتىن مۇمكىندىك بولعان جوق. سوعان ءوزىم دە اسا قىزىعا قويعان جوقپىن. ءبىزدىڭ قۇمارىمىز كوكپار ەدى. قورامىزدان جىلقى ۇزىلمەدى. بالا شاعىمىزدان اتقا ءمىنىپ، جاپپاي كوكپاردى جاعالاپ وستىك. اۋدارىسپاققا دەيىن، ءتىپتى قازىردىڭ وزىندە دە ءبىزدىڭ ءوڭىردىڭ جاپپاي كوكپارىنا شاۋىپ تۇرامىز.

    تولەبي اۋدانى – قازاعى قالىڭ قونىستانعان ولكەنىڭ ءبىرى. سۇندەت تويعا دا ات شاپتىرىپ، كوكپار بەرۋ، بايگەسىنە قوماقتى سىيلىق تىگۋ ءداستۇرى ۇزىلمەگەن. سول توي-مەرەكەلەردە ۇيىمداستىرىلاتىن اۋدارىسپاقتان شەت قالماۋعا تىرىسامىز. كەزىندە اۋدان كولەمىندەگى كوماندالىق كوكپاردى دا جامان ويناعان جوقپىن. سوندىقتان العاشقى جۇلدەلەردى دە وسى كوكپار مەن اۋدارىسپاقتان يەلەندىم.

    – اۋدارىسپاقپەن شۇعىلدانۋدى قاي جىلدان باستادىڭ؟ كىمدەردىڭ ىقپالى بولدى؟

    – جاڭا ايتىپ ءوتتىم، اۋدارىسپاق، كوكپار ويىندارى ءبىزدىڭ وڭىردە وتە ءجيى وتەدى. سودان شىعار، اۋدارىسپاققا ءبىرتالاي بەيىمىم بار. سونى بايقاعان بولسا كەرەك، قازىرگى باپكەرىم مانكەەۆ اقىلباي مەنى اۋدارىسپاقپەن شىنداپ اينالىسۋعا ۇگىتتەپ، ات ۇستىندەگى كۇرەس تاسىلدەرىنە جاتتىقتىرا باستادى. اقىلبايدىڭ ءوزى دە بىرنەشە چەمپيوناتتا جەڭىمپاز اتانعان مىقتى اۋدارىسپاقشى، كوكپارشى جىگىت. ءسويتىپ، 2011 جىلى اۋداندىق، وبلىستىق سايىستاردى ۇتىپ، سول جىلى العاش رەت رەسپۋبليكالىق چەمپيوناتتا ءبىرىنشى ورىن الدىم. ول كەزدە 26 جاستا ەدىم. بىراق، كەلەر جىلعى چەمپيونات فينالىندا جامبىلدىق دانيار سمايىلوۆتان ۇتىلىپ قالعانىم بار. سول جەڭىلىسىم ماعان ەستەن كەتپەس ساباق بولدى. جارىستىڭ الدىندا عانا جاساعان اپىل-عۇپىل دايىندىقتىڭ كەسىرى عوي. جاتتىعۋ-شىنىعۋمەن تۇراقتى اينالىسىپ، ءوزىڭدى ۇنەمى بابىڭدا ۇستاماساڭ جەڭىستىڭ اۋىلى الىس ەكەن. سونى جاقسى ءتۇسىندىم. سودان بەرى جىل ونەكى اي جاتتىعۋدان قول ۇزگەن ەمەسپىن. بۇل جاعىنان ءۇش بىردەي ازيا چەمپيونىنىڭ ۇستازى، حالىقارالىق دارەجەدەگى جاتتىقتىرۋشى جانباتىر بەكمۇساەۆتىڭ اقىل-كەڭەسىن، كومەگىن كوپ كوردىم. نەگىزگى باپكەرىم سول كىسى عوي. ءدال قازىرگى كەزدە بۇرىڭعى باپكەرىم مانكەەۆ اقىلبايدىڭ قول استىندا جاتتىعامىن. مەن ءۇشىن ەكەۋىنىڭ دە ورنى ەرەكشە. جاتتىعۋدىڭ جۇيەلى بولۋى باپكەرگە بايلانىستى عوي.

    – سوندا اۋدارىسپاقشىنىڭ جاتتىعۋلارى قالاي جۇيەلەنەدى؟ ءىزباسار ىنىلەرىڭ ۇلگى الا ءجۇرسىن، ءوزىڭنىڭ ۇنەمى اينالىساتىن شىنىعۋ ادىستەرىڭدى ايتىپ وتسەڭشى.

    – جۇيەلى جاتتىعۋ دەگەنىم، مىسالى، ۇلكەن جارىسقا ەكى-ءۇش اي ۋاقىت قالدى دەلىك. وسى ارالىقتاعى دايىندىقتى باپكەرمەن كەڭەسە وتىرىپ رەتتەۋىڭ قاجەت. قانداي جاتتىعۋلار ءتيىمدى؟ جارىسقا ءبىر اي قالعاندا، جارتى اي قالعاندا نەمەن اينالىساسىڭ، قالاي شىنىعۋ كەرەك؟ ءبارى ەسەپتەۋلى بولۋعا ءتيىس. ءتىپتى، تاماقتانۋدىڭ وزىنە دە قاتتى ءمان بەرگەن ءجون.

    ال ەندى، اۋدارىسپاقشىعا ءدال مىناداي جاتتىعۋلار عانا كەرەك دەيتىن وقۋ-ادىستەمەلىك قۇرال ءالى شىققان جوق. ءبىز ءوزىمىز قاجەت دەپ تاپقان دەنەشىنىقتىرۋلارمەن اينالىسامىز. ماسەلەن، سپورتزالعا بارعاندا قولدىڭ، اياقتىڭ بۇلشىق ەتتەرىن شيراتاتىن جاتتىعۋلاردى جاسايمىن. كۇش جيناۋ ءۇشىن 90-100 كەلى زىلتەمىردى جاتىپ كوتەرەمىن. ات ۇستىندەگى كۇرەسكە قاجەتتى ادىستەردى قايتالاۋ ءۇشىن اتپەن دە دايىندىق جاسايمىن. ارينە، كۇن سايىن تۇسكە دەيىن ءۇش ساعات، تۇستەن كەيىن ءتورت ساعات سپورتزالدان شىقپاي ءجۇرمىز دەي المايمىن. توقتاۋسىز دايىندىقتىڭ ءوزى ادامدى قاجىتادى. بىركەلكى تىرلىكتەن جالىعۋ دا بولادى. كۇتىمىڭ، كوڭىل-كۇيىڭ بولماسا قايداعى دايىندىق. وتباسىڭدا تىنىشتىق، تاتۋلىق بولماسا جارىسقا تياناقتى دايارلىق قايدا؟ قاجي باستاعانىمدى سەزىنسەم كەيدە قالاداعى دوستارعا تارتىپ كەتەمىن. اڭسارىم اۋىپ تۇرسا بالىققا اۋلاۋعا كەتىپ قالۋدى، اڭعا شىعۋدى ادەت قىلعانمىن. وندايدا كادىمگىدەي سەرگىپ، تىنىعىپ قالامىن. ەڭ باستىسى، سپورتتىق بابىڭدى ءوزىڭ ۇنەمى سەزىنىپ جۇرۋگە مىندەتتىسىڭ.

    ءبىز سياقتى اۋىر سالماقتىلارعا ءبىر قالىپتى سالماق ۇستاپ تۇرۋدىڭ ءوزى وڭاي شارۋا ەمەس. اۋدارىسپاققا كىرىسكەلى كىلەڭ ءبىر سالماقتا ءجۇرمىن. بەس-التى جىل بولدى سالماعىم سول 107-110 كەلى اراسىندا. بۇدان ارتىق سالماق قوسپاۋعا تىرىسامىن. كۇنىنە كەمىندە ون شاقىرىم جۇگىرىپ تۇرامىن. قاجەتىنە قاراي 20-25 شاقىرىمعا جۇگىرەتىن كەزىم دە بولادى. جۇگىرۋدىڭ پايداسى وتە كوپ. وكپەڭ اشىلىپ، تىنىسىڭ كەڭىپ قالادى. كۇنى بويى سەرگەك جۇرۋگە، ارتىق سالماق قوسپاۋعا جاقسى.

    – جەكپە-جەككە شىققاندا ءوزىڭ ءجيى قولداناتىن ءادىسىڭ قانداي؟ جالپى، وسى ات ۇستىندەگى كۇرەستىڭ بەلگىلى ءبىر ءادىس-تاسىلدەرى بار ما؟

    – ارينە، اۋدارىسپاق تا بەكىتىلگەن ەرەجەگە ساي جۇرگىزىلەتىن سپورت ءتۇرى. اۋدارىسپاق ەرەجەسىندە قولدانۋعا بولمايتىن، تىيىم سالىنعان ادىستەردىڭ ءبىرتالايى جازىلعان. بىراق، وسى ۋاقىتقا دەيىن سايىستا قالىپتاسقان مىناداي-مىناداي ءبىر بەلگىلى كۇرەس ءادىسى بار دەپ ايتا المايمىن. سەبەبى، سەن سايىسقا شىقتىڭ با، بارىنە دايىن بولۋعا ءتيىسسىڭ. كەلگەن ىڭعايىڭا قاراي كۇرەسەسىڭ. وسى ۋاقىتقا دەيىن وسال قارسىلاس كورگەنىم جوق. اۋدارىسپاق دەگەنىڭىز، تەك قارا كۇشتىڭ عانا ەمەس، ايلا-امالدىڭ كۇرەسى. قايتسەم دە جەڭەمىن دەپ شىققان قارسىلاسىڭ قاراۋلىق تا جاساپ جىبەرۋى مۇمكىن. كوردىك قوي تالاي سويقاندى. ونداي ءادىس وتە كوپ. ۇمتىلا شابۋىلداعان بولىپ اتتىڭ باسىمەن سوعادى. ۇستاسا قالعاندا ساۋساعىڭدى قايىرادى. كۇرەسە كەتكەندە قاپىسىن تاۋىپ، ەڭكەيە كەلىپ بەتىڭنەن باسپەن سوعادى. مۇنداي قاتتى سوققى العان ادام ءبىر مەزەت ەسەڭگىرەپ قالادى. وعان كەرەگى دە سول. سول ساتتە ءوزى ءادىس جاساپ كەتەدى.

    مىسالى، قىرعىزستاندا وتكەن فەستيۆال فينالىنداعى قارسىلاسىم قاناتبەك الپانوۆ بولدى. قاناتبەك بەلبەۋىن تاس قىپ بايلاپ تاستاعان. ۇستايىن دەسەم مۇلدە قول سيار ەمەس. وندايدا تورەشىگە شاعىمدانۋعا قۇقىڭ جوق. امال جوق، بەلبەۋدەن ۇستاماي-اق كۇرەستىم. ال، اۋدارىسپاقتاعى ەڭ قيىنى – بەلبەۋسىز كۇرەسۋ. وسىنىڭ بارىنە ساق بولۋعا، بارىنە شىدامدى بولۋعا مىندەتتىسىڭ.

    سوندىقتان، مەندە قاتىپ قالعان ءبىر ءادىس جوق. قارسىلاس تا سەن سياقتى ايلا-ءتاسىلدىڭ سان ءتۇرىن بىلەتىن ادام. ەگەر كۇشىڭە سەنىپ سۇيرەتىپ اكەتەم دەسەڭ، تاستاي قاتىپ جاتىپ قالادى. قاپىدا اتى ءسۇرىنىپ، يا، تارتپاسى ءۇزىلىپ كەتپەسە قۇر سۇيرەي تارتقانىڭنان ناتيجە جوق. سول سەبەپتى، ۇستاسا كەتكەنىڭنەن باستاپ، قارسىلاسىڭنىڭ وسال تۇسىن بىردەن بايقاي بىلۋگە داعدىلان. وتىرىسىن، قيمىل-قوزعالىسىن شامالا. اتىنىڭ داعدىسى قانداي؟ ءالسىز جاعىن بىردەن اڭعار. سوعان قاراي جاسايتىن ءادىسىڭدى سول مەزەتتە ويلا جانە شاپشاڭ جاساپ ۇلگەر. وعان بىرنەشە سەكۋند قانا قاجەت. ۇلگەرسەڭ ۇتاسىڭ. مىسالى، وزىڭە قاراي قاتتى جۇلقا تارتىپ قالساڭ، ول مىندەتتى تۇردە شالقالاي قيسايادى. سول ساتىندە سەن ونى ارى يتەرىپ، اۋدارىپ تۇسىرۋگە ءتيىسسىڭ. شاپشاڭ بولساڭ جەڭىس سەنىكى.

    – اۋدارىسپاقتا جەڭىسكە جەتۋ كوبىنە اتقا دا بايلانىستى دەپ ەستيمىز. ءوزىڭ سايىسقا تەك ءبىر اتپەن عانا شىعىپ ءجۇرسىڭ بە؟

    – دۇرىس ايتاسىز، سايىسقا ءمىنىپ شىققانىڭ اۋدارىسپاققا ابدەن ۇيرەنگەن ات بولماسا، ۇتىلىپ قالۋىڭ وپ-وڭاي. اتقا دا، وعان قوسا ەرتوقىمعا دا كوپ نارسە بايلانىستى. وزىمە سوناۋ جىلدارى ارنايى جاساتقان، تاقىمىم ابدەن ۇيرەنگەن ءبىر ەرىم بار. قاي جاققا بارسام دا سونى ارقالاپ جۇرەمىن. وزگە ەرتوقىم مەن ءۇشىن وتە قولايسىز، ءوز ەرىمدەي ورنىعىپ، مىعىم وتىرا المايمىن. مىنەتىن اتىم كوڭىلىمدەگىدەي بولماسا تاعى قيىن. ەشقاشان سىرىن بىلمەيتىن اتپەن سايىسقا شىعىپ كورگەنىم جوق.

    قازاقستاندا وتكەن بارلىق جارىسقا كوپ جىلدان بەرى تەك ءبىر اتپەن عانا قاتىسقانىم راس. ءوزىمىز «استانا» دەپ اتاپ كەتكەن جيرەن توبەل ات. وڭتۇستىك وڭىردەگى ۇلتتىق سپورتتىڭ دامۋىنا ۇيىتقى بولىپ جۇرگەن احمەتباەۆ عاني اعامىز باسقاراتىن ۇلتتىق سپورت مەكتەبىنىڭ اتى. كەزىندە استانا جاقتا وتكەن ءبىر جارىس ۇستىندە ساتىپ الىنىپ، سودان «استانا» اتالىپ كەتتى. بۇل جيرەن توبەلدى ءبىر كورگەن ادام ونشا ۇناتا قويمايدى. ءتۇر-تۇرقى سونداي ءىرى ەمەس. تۇلعاسى دا «بالۋان اتقا» جاتپايدى. ونىڭ ۇستىنە ءبىر اياعىنىڭ ازداعان سىلتىماسى بار. اتاعىن ەستىپ، ارنايى كەلىپ كورگەندەردەن «ماقتاعان اتتارىڭ وسى ما؟» دەگەندى تالاي ەستىگەنبىز. بىراق، وسى جيرەن توبەلدىڭ ەستىلىگى كەرەمەت. سايىسقا شىققاندا تۋرا ادام سياقتى، ءار ادىمىنىڭ ءوزىن ويلانىپ باساتىنىن قايتەرسىڭ. ىڭعايىڭدى تاقىمىڭنان سەزىپ، وزىڭمەن بىرگە الىسقانداي، ساعان بولىسقانداي بولىپ جۇرەدى. سوندىقتان، سايىسقا وسى «استانانى» ءمىنىپ شىعۋعا مەن عانا ەمەس، كومانداداعى بارلىق جىگىتتەر قۇلشىنىپ تۇرادى. كوبىنەسە سونى مىنەمىز.
    ارينە، ارا-اراسىندا باسقا دا اتتاردى مىنۋگە تۋرا كەلەدى. مىسالى، قىرعىزستاندا وتكەن ءىى دۇنيەجۇزىلىك كوشپەلىلەر ويىنىندا، قىتايدا وتكەن ءىى ازيا چەمپيوناتىندا باسقا اتپەن شىقتىق. بىراق، اۋدارىسپاقتا «استانا» سياقتى ابدەن توسەلە ۇيرەنگەن ەستى اتتار از.

    – وزىڭمەن ۇزەڭگىلەس جۇرگەن ەلىمىزدەگى اۋدارىسپاقشىلار تۋرالى پىكىرىڭ قانداي؟ جاتتىقتىرىپ جۇرگەن شاكىرتتەرىڭ بار ما؟

    – شىنىمدى ايتسام، ءبىزدىڭ ەلدە مىقتى اۋدارىسپاقشىلار وتە كوپ-اق. مىسالى، 90 كەلى سالماقتا توپ جارىپ جۇرگەن سىرىم ءىزباساروۆتىڭ اتاعى مەنەن كەم ەمەس. سىرىم دا ازيانىڭ ەكى دۇركىن چەمپيونى، قازاقستان چەمپيوناتىنىڭ بىرنەشە دۇركىن جەڭىمپازى. سونداي-اق، دانيار سمايىلوۆ، رۇستەم باينازاروۆ، ەرمەك جاپىشەۆ، مانسۇر تانەكەنوۆ، تۇيمەبەك جۇماليەۆ، حاميت مەرەي، اقىلبەك امانجولوۆ، مەيىربەك قۇسايىنوۆ، ەرنازار بايعونوۆتار ەلىمىزدىڭ چەمپيوناتتارىندا كىلەڭ جۇلدەلى ورىندا جۇرگەن بالۋاندار. ءار وڭىردەن جىل سايىن تالاپتى جاستار شىعىپ، قاتارىمىزدى تولىقتىرىپ كەلەدى. مىسالى، 2017 جىلعى ەلىشىلىك چەمپيوناتتا ەرەسەكتەر باسەكەسىنە العاش قاتىسقان ءراحماتىللا ەسىمحاننىڭ بولاشاعىنان قاتتى ۇمىتتەنىپ قالدىم. 1994 جىلى تۋعان ءراحماتىللا تاجىريبەلى، ساقا جىگىتتەرمەن تايسالماي سايىسىپ، 80 كەلى سالماقتا قازاقستان چەمپيونى اتاندى. ءى حالىقارالىق تۋرنيردە جەڭىمپاز بولدى. سونداي-اق، اقتوبە، قىزىلوردا جاعىنىڭ جاستارى جاقسى شىعىپ كەلەدى. وسىعان قاراعاندا، الەم بويىنشا اۋدارىسپاق باسەكەسىنىڭ باس جۇلدەسى ءالى تالاي جىل قازاق جىگىتتەرىنىڭ قانجىعاسىندا بولۋى ءتيىس.

    ءبىزدىڭ دە جاسىمىز وتىزدان استى. سوندىقتان، الداعى ۋاقىتتا ءوز باپكەرلىك مەكتەبىمدى قالىپتاستىرۋدى ويلايمىن. باۋلىپ جۇرگەن بىرنەشە شاكىرتتەرىم دە بار. جۇرگەن جەرىمىزدە «انا بالانىڭ ءبىتىمى ءىرى ەكەن. تۇبىندە وسىدان اۋىر سالماقتى اۋدارىسپاقشى شىعىپ قالادى-اۋ» دەپ، دەنەسى كەلىستى بالا كورسەك، كوزدەي جۇرۋگە، وزىمە تارتا جۇرۋگە ادەتتەنە باستادىم. سەبەبى، اۋىر سالماقتىلارعا كەرەكتى جاتتىعۋدى، ولاردى سايىسقا قالاي ۇيرەتۋدى جاقسى بىلەمىن عوي. باپكەرلىگىمنىڭ ناتيجەسى دە جامان ەمەس سياقتى. جاسوسپىرىمدەر چەمپيوناتىندا ساپارحان، ايبەك ەسىمدى شاكىرتتەرىم جەڭىمپاز اتاندى.

    – وتكەن جىلعى جازدا استانادا اۋدارىسپاقتان ءى حالىقارالىق تۋرنير ءوتتى. بۇل باسەكەگە الەمنىڭ وننان استام ەلىنىڭ كومانداسى كەلدى. اۋىر سالماقتاعى شەت ەل اۋدارىسپاقشىلارىن قالاي باعالايسىڭ؟

    – بۇعان دەيىن مەن ءبىر رەت حالىقارالىق تۋرنيردە، ەكى مارتە ازيا چەمپيوناتىندا باق سىنادىم. سول كەزدە كورگەنبىز. موڭعوليانىڭ، وزبەكستاننىڭ، قىتايدىڭ بالۋاندارى وسال بولعان جوق. اسىرەسە، وسى اۋدارىسپاقتان قىرعىزستاننىڭ 10 دۇركىن چەمپيونى نۇرلان مولداقۇلوۆ، بىلتىرعى كوشپەلىلەر ويىندارىندا كۇمىس جۇلدە العان قاناتبەك الپانوۆتاردىڭ قارىم-قابىلەتى وتە كۇشتى. وزبەكتىڭ زاحيد بۋحابوەۆ، اۋعانستاننىڭ تاشقۇرعاني گۇلبودين دەگەن مىقتىلارى بار. قىتاي ەلىنىڭ اتىنان شىعاتىن نۇربولات ەرەجەپ، موڭعوليالىق ىدىرىش باعلان ءوز ەلدەرىنىڭ ۇزدىك بالۋاندارى عوي. بىراق، بىرنەشە جىلدان بەرى اللانىڭ قالاۋىمەن ەلدىڭ نامىسى ءۇشىن جەڭىستى قولدان بەرمەۋگە كۇش سالىپ كەلەمىز.

    جەكپە-جەكتە جەڭىس جالاۋىن جەلبىرەتە بەرۋىڭە ءبىز دە تىلەكتەسپىز، ءبىرجان!

    سۇحباتتاسقان تولەگەن جاكىتاي

    سۋرەتتە: ءبىرجان بالۋان مەن حالىقارالىق دارەجەدەگى جاتتىقتىرۋشى جانباتىر بەكمۇساەۆ.

    ءبىر پىكىر

    1. اقتوبە، قىزىلوردا جاعىنىڭ جاستارى جاقسى شىعىپ كەلەدى.

    پىكىر جازۋ

    Your email address will not be published. Required fields are marked *

    *