SportPress.kz قازاقستان سپورت جاڭالىقتارى
ارقالىقتا قازاقستاننىڭ اۋىر اتلەتيكادان التى دۇركىن چەمپيونى، كسرو سپورت شەبەرى گايدار سارجانوۆتى ەسكە تۇسىرۋگە ارنالعان ەكىنشى رەسپۋبليكالىق تۋرنير باستالدى. وعان ەلىمىزدىڭ جەر-جەرىنەن ات تەرلەتىپ كەلگەن سپورتشىلار قاتىسىپ جاتىر.
بۇگىن جەڭىل سالماقتاعى بوزبالالار مەن قىزدار پوموستقا شىقسا، ەرتەڭ اۋىر سالماقتاعى جىگىتتەر مەن بويجەتكەندەر جارىسقا قاتىسادى.
وسى تۋرنير باستالماس بۇرىن «دوستار» مەيرامحاناسىندا «قايىڭدى» اۋىلىنان شىققان سپورت شەبەرىن ەسكە الۋ اسى بەرىلدى. استا گايدار اعامىزدىڭ تۋىستارى، جورا-جولداستارى ەستەلىكتەرىن ايتىپ، جەرلەسىنە ارناپ قۇران باعىشتادى. اعامىزدىڭ جاتقان جەرى جايلى، توپىراعى تورقا بولسىن! وسى جارىستى ۇيىمداستىرعان تۋعان-تۋىستارىنا اللا ريزا بولسىن!
گايدار سارجانوۆ كەزىندە كوپتەگەن جارىستاردا وليمپيادا چەمپيونى يۋري ۆاردانيان مەن باسقا دا زىلتەمىردى وڭاي باسىنان اسىراتىن مىقتى اتلەتتەردى ارتتا قالدىرىپ ءبىرىنشى ورىن الاتىن. جاراقاتىنا بايلانىستى سپورتتان ەرتە كەتىپ، جاتتىقتىرۋشى بولعان. ەندى قازىر ونىڭ بالالارى، شəكىرتتەرى مەن ءىنىسى ايدار سارجانوۆتىڭ ۇلدارى اعاسىنىڭ جولىن جالعاستىرىپ كەلەدى.
جارىس ءسəتتى ءوتسىن دەپ تىلەيىك!
داستان كەنجالين،
ارقالىق
