Arqalyqta aýyr atlet Gaıdar Sarjanovty eske alý týrnıri bastaldy

Arqalyqta Qazaqstannyń aýyr atletıkadan alty dúrkin chempıony, KSRO sport sheberi Gaıdar Sarjanovty eske túsirýge arnalǵan ekinshi respýblıkalyq týrnır bastaldy. Oǵan elimizdiń jer-jerinen at terletip kelgen sportshylar qatysyp jatyr.

Búgin jeńil salmaqtaǵy bozbalalar men qyzdar pomostqa shyqsa, erteń aýyr salmaqtaǵy jigitter men boıjetkender jarysqa qatysady.

Osy týrnır bastalmas buryn «Dostar» meıramhanasynda «Qaıyńdy» aýylynan shyqqan sport sheberin eske alý Asy berildi. Asta Gaıdar aǵamyzdyń týystary, jora-joldastary estelikterin aıtyp, jerlesine arnap quran baǵyshtady. Aǵamyzdyń jatqan jeri jaıly, topyraǵy torqa bolsyn! Osy jarysty uıymdastyrǵan týǵan-týystaryna Alla rıza bolsyn!

Gaıdar Sarjanov kezinde kóptegen jarystarda Olımpıada chempıony Iýrıı Vardanıan men basqa da ziltemirdi ońaı basynan asyratyn myqty atletterdi artta qaldyryp birinshi oryn alatyn. Jaraqatyna baılanysty sporttan erte ketip, jattyqtyrýshy bolǵan. Endi qazir onyń balalary, shəkirtteri men inisi Aıdar Sarjanovtyń uldary aǵasynyń jolyn jalǵastyryp keledi.

Jarys sətti ótsin dep tileıik!

Dastan KENJALIN,

ARQALYQ