Azııa chempıonatynda el namysyn qorǵaıdy

Tarazda oqý-jattyǵý jıynyn ótkizip jatqan Ulttyq sport túrleri jattyqtyrýshylarynan súıinshi habar kelip jetti. Aýdaryspaq pen Teńge ilý boıynsha irikteý aıaqtalyp, 1-2 maýsymda Astana tórinde ótetin qos Azııa chempıonatyna qatysatyn sportshylardyń aty-jóni anyqtalypty.

Sonymen, 1 maýsym kúni bastalatyn Teńge ilýden II Azııa chempıonatyna kimder qatysady?

Tarazda ótken irikteý synyna ilgeri jyldary Teńge ilýden el chempıonatynda júldeger atanǵan birneshe sportshy shaqyrylǵan. Sol úzdikter arasynan sýyrylyp shyqqan eki teńge ilýshi sportshymen tanys bolyńyzdar.

 Maǵjan SAPARBEK – 2001 jyly týǵan. Týǵan jeri – Ońtústik Qazaqstan oblysy  Qazyǵurt aýdany, Qazyǵurt eldimekeni. Teńge ilý sportymen 2014 jyldan bastap shuǵyldanǵan. Respýblıkalyq jarystarda kóptegen júldeli oryndardy ıelendi. 2016 jyly  qazan aıynda Aqtóbe qalasynda ótken jastar arasyndaǵy el chempıonatynda – 1 oryndy,  2017 jyly Almaty qalasynda ótken eresekter arasynda Qazaqstan chempıony atandy.

Qazaqstan Respýblıkasy Ulttyq qurama komandasynyń múshesi, Qazaqstan Respýblıkasynyń sport sheberi. II Azııa chempıonatyna irikteý jarysynda úzdik tanylǵan sportshy.

 Ǵalymjan IZJANOV  – 1999 jyly týǵan. Týǵan jeri – Ońtústik Qazaqstan oblysy  Shymkent qalasy. Teńge ilý sportymen 2010 jyldan bastap shuǵyldanǵan. Kóptegen respýblıkalyq jarystardyń jeńimpazy atandy.  Teńge ilýden 2015 jyly Shymkent qalasynda ótken Á.Daýylbaev atyndaǵy respýblıkalyq týrnırdiń  jeńimpazy. 2016 jyly jasóspirimder arasyndaǵy Qazaqstan chempıonatynyń kúmis júldegeri. 2017 jylǵy «Aq bıdaı» VI respýblıkalyq aýyl sporty oıyndarynyń chempıony. 2015 jyly Astana qalasynda Teńge ilýden ótken I ashyq Azııa chempıony.

 Al,  Aýdaryspaqtan III Ashyq Azııa chempıonatynda el namysyn kimder qorǵaıdy?

 Dúbirli dodalarda Qazaqstannyń kók baıraǵyn san márte kótergen dańqty balýandarymyzdyń esimin de oqyrmandarymyz aldyn-ala bile júrsin.

 Birjan Qosalıev – 90 kılodan joǵary salmaqtaǵy bas balýan.  Ol 1985 jyly týǵan. Týǵan jeri – Ońtústik Qazaqstan oblysy Tóle bı aýdany, Maıbulaq aýyly. Aýdaryspaq sportyna 2011 jyldan bastap qatysqan. Aýdaryspaq jekpe-jeginde alǵan ataqtary – Qazaqstannyń 6 dúrkin chempıony. Asa aýyr salmaqta eki ret Azııa chempıonatyn jeńip alǵan (2014, 2016 j.j). 2014 jyly Astanada  ótken I Ashyq Azııa chempıonatynyń absolıýtti salmaqtaǵy chempıony. 2017 jyly halyqaralyq týrnırdiń absolıýtti salmaqtaǵy chempıony atandy. Qazaqstannyń birneshe dúrkin chempıony.

 Syrym Izbasarov — 90 kılo salmaqtaǵy dańqty balýanymyz. Ol 1989 jyly týǵan. Týǵan jeri – Ońtústik Qazaqstan oblysy Tóle bı aýdany, Qaratóbe aýyly. Aýdaryspaq sportyna 2008 jyldan bastap qatysqan. Aýdaryspaq jekpe-jeginde alǵan ataqtary – Qazaqstannyń 9 dúrkin chempıony. Aýyr salmaqta eki dúrkin Azııa chempıony atanǵan (2014, 2016 j.j). 2016 jyly Qytaı elinde ótken II Ashyq Azııa chempıonatynyń absolıýtti salmaqtaǵy jeńimpazy. 2017 jyly 90 kıloda halyqaralyq týrnırdiń bas júldesin ıelendi. Qazaqstannyń birneshe dúrkin chempıony.

 Esimhan RAHMATILLA — 80 kılo salmaqta qarsylas shydatpaıtyn jas balýan.  Esimhan 1994 jyly týǵan. Týǵan jeri – Ońtústik Qazaqstan oblysy Saraǵash aýdany, Ǵ.Muratbaev aýyly. Aýdaryspaq sportyna 2012 jyldan bastap qatysqan. Aýdaryspaq jekpe-jeginde alǵan ataqtary – jastar arasyndaǵy Qazaqstannyń eki dúrkin chempıony, 2016 jyly eresekter arasynda ótken «Uly dala oıyndary» festıvaliniń absolıýtti salmaqtaǵy jeńimpazy, 2017 jyly 80 kılo salmaqta eresekter arasyndaǵy el chempıony. 2017 jyly 90 kıloda halyqaralyq týrnırdiń bas júldesin ıelendi. Qazaqstannyń birneshe dúrkin chempıony.

 Shyńǵyshan Erjanov  –  70 kılo salmaqta synǵa túsedi. Shyńǵys 1995 jyly týǵan. Týǵan jeri – Aqtóbe qalasy, Qarǵaly aýyly. 2011 jyly 16 jasynan bastap Aýdaryspaq sportymen aınalysty. Respýblıkalyq jarystarda Aýdaryspaq jeginde alǵan ataqtary – 2013 jyly jasóspirimder arasyndaǵy Qazaqstan chempıonatynda 60 kılo salmaq dárejesinde I oryndy jeńip aldy. 2015 jyly Qazaqstan Respýblıkasynyń jastar arasyndaǵy chempıonatynda 70 kılo salmaq dárejesinde I orynǵa ıe boldy. 2016 jyly jastar arasyndaǵy el chempıonatynda 70 kılo salmaqta chempıon atandy. 2017 jyly «Aqbıdaı» respýblıkalyq VI aýyl sporty oıyndarynda eresekter arasynda 70 kılo salmaqta II oryndy ıelendi. III Azııa chempıonatyna irikteý jarysynda jeńimpaz atandy. Aýdaryspaqtan  Qazaqstan Respýblıkasynyń sport sheberi.

 Azamat Serǵazın – 60 kılo salmaqta synǵa túsedi. Azamat 1996 jyly týǵan. Týǵan jeri – Aqtóbe oblysy, Áıteke bı aýdany, Qarabutaq aýyly.  15 jasynan bastap Aýdaryspaq sportymen aınalysty. Respýblıkalyq jarystarda Aýdaryspaq jeginde alǵan ataqtary – 2012 jyly aýdaryspaqtan jastar  arasyndaǵy Qazaqstan  chempıonatynda  50 kılo salmaqta, 2013 jyly jasóspirimder arasyndaǵy el chempıonatynda  50 kılo salmaqta II oryndy ıelendi.  2017 jyly jastar arasyndaǵy  Qazaqstan chempıonatynda  60 kılo salmaqta II oryn aldy. 2017 jyly «Aqbıdaı» respýblıkalyq VI aýyl sporttyq oıyndarynda eresekter arasynda 60 kılo salmaqta I oryndy jeńip aldy.   III Azııa chempıonatyna irikteý jarysynda jeńimpaz atandy. Aýdaryspaqtan  Qazaqstan Respýblıkasynyń sport sheberi.

 Tólegen JÁKITAI