ەلىمىز ءبىرىنشى بۇكىلالەمدىك ەتنوسپورت ويىندارىن وتكىزۋگە ءۇمىتتى 

31 مامىر كۇنى استاناداعى قازاقستان رەسپۋبليكاسىنىڭ ۇلتتىق مۋزەيىندە يۋنەسكو-نىڭ ءداستۇرلى سپورتتار مەن ويىندار كوميتەتىنىڭ توراعاسى حاليل احمەد حان، كوميتەتتىڭ ۇيلەستىرۋشىسى مارسەللين دەللي جانە كوميتەتتىڭ حاتشىسى  شاممي رانانىڭ قاتىسۋىمەن ءباسپاسوز ءماسليحاتى وتەدى. 

جيىنعا، سونداي-اق، مادەنيەت جانە سپورت ءمينيسترى ارىستانبەك مۇحامەدي ۇلى، ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى قايرات ساتىبالدى ۇلى جانە ۇلتتىق سپورت تۇرلەرى قاۋىمداستىعىنىڭ پرەزيدەنتى، پارلامەنت ءماجىلىسىنىڭ دەپۋتاتى بەكبولات تىلەۋحان قاتىسادى.

كەزدەسۋدە يۋنەسكو، مادەنيەت جانە سپورت مينيسترلىگى مەن ۇلتتىق سپورت تۇرلەرى قاۋىمداستىعى اراسىنداعى ءوزارا تۇسىنىستىك جونىندەگى مەموراندۋمعا قول قويۋ جوسپارلانىپ وتىر.

مارتەبەلى مەيمانداردىڭ قازاقستانعا ارنايى ات باسىن بۇرۋىنىڭ باستى سەبەبى – 1-2 ماۋسىم  كۇندەرى استاناداعى «قازانات» اتشابارىندا وتەتىن تەڭگە ىلۋدەن ءىى ازيا چەمپيوناتى مەن اۋدارىسپاقتان ءىىى ازيا چەمپيوناتىن تاماشالاۋ.

يۋنەسكو ۇيىمى 2021 جىلى بۇكىلالەمدىك ءبىرىنشى ەتنوسپورت ويىندارىن وتكىزۋدى جوسپارلاپ وتىر. وسى الەمدىك باسەكەنى وتكىزۋگە ۇمىتكەر ءتورت مەملەكەتتىڭ قاتارىندا قازاقستان رەسپۋبليكاسى دا بار.

سونىمەن قاتار، يۋنەسكو وكىلدەرى «ەتنوسپورتتى دامىتۋ جانە ناسيحاتتاۋ» تاقىرىبىندا سەمينار كەڭەس ۇيىمداستىرادى.

ءباسپاسوز ءماسليحات ساعات 15.00-دە باستالادى.

باق وكىلدەرىنە اككرەديتاتسيادان ءوتۋى مىندەتتى، اتى-ءجونى ءارى وزدەرىمەن بىرگە اكەلەتىن تەحنيكالاردىڭ (كامەرا، فوتواپپارات، تەلەفون) ءتىزىمىن، ماركاسىن كورسەتىپ، مينيسترلىك ءباسپاسوز قىزمەتىنىڭ mki_gov@mail.ru ەلەكتروندى مەكەن-جايىنا جولداۋ قاجەت!

بارلىق سۇراقتار بويىنشا: +7 (7172) 74-09-24، + 7 707 278 6728 تەلەفون نومەرلەرىنە حابارلاسۋعا بولادى.

مادەنيەت جانە سپورت مينيسترلىگىنىڭ ءباسپاسوز قىزمەتى