ەۋروپادا قازاق كۇرەسىنەن ءتورتىنشى رەت قۇرلىقتىق چەمپيونات وتەدى

1 ماۋسىم كۇنى ەۋروپانىڭ قارت كارپات تاۋلارىنىڭ ەتەگىندە جاتقان سەربيا ەلىنىڭ زرەنيانين قالاسىندا  دۇنيەجۇزىلىك قازاق  كۇرەسى  فەدەراتسياسىنىڭ  ۇيىمداستىرۋىمەن ءتول كۇرەسىمىزدەن ءتورتىنشى رەت ەرەسەكتەر اراسىنداعى قۇرلىقتىق چەمپيوناتتىڭ تۋى كوتەرىلەدى.

بۇل دودا ەكى كۇن بويى ءوتىپ، وعان ەۋروپانىڭ  17 ەلىنەن  110  سپورتشى  قاتىسادى  دەپ  كۇتىلۋدە. چەمپيوناتتا العاش رەت ايەلدەر 6 جانە ابسوليۋتتىك  سالماق  دارەجەسىندە  جەكپە-جەككە شىعادى. ەرلەر  اراسىنداعى  جارىس   7 سالماق  دارەجەسى  بويىنشا وتكىزىلەدى.

وسى جارىستىڭ الدىندا قازاق كۇرەسىنە قاتىستى تاعى ءبىر شارا بولادى. 30 مامىر كۇنى زرەنيانين قالاسىندا حالىقارالىق  تورەشىلەر  سەمينارى  وتەدى. سەميناردا ءتول كۇرەسىمىزدەن وتەتىن جارىستارعا ەۋروپا  تورەشىلەرىن دايىنداۋ جانە سوعان ارنالعان  باعدارلامانى  جاساۋ ماسەلەسى قارالادى.

قازىرگى كەزدە جەر-جۇزىندە قازاق كۇرەسىنە دەگەن قىزىعۋشىلىق جىل وتكەن سايىن ارتىپ كەلەدى. اسىرەسە، بىرىككەن  الەم كۇرەسى  (UWW)  وداعىنىڭ  ۇلتتىق كۇرەسىمىزگە دەگەن قىزىعۋشىلىعى بىلتىر تۇركىمەنستاننىڭ اشعاباد قالاسىندا وتكەن V ازيا  ويىندارىنان كەيىن تىپتەن ارتتى. بۇعان سەربيادا جالاۋى جەلبىرەيتىن ەۋروپا چەمپيوناتىنا 17 ەلدەن 110 پالۋاننىڭ قاتىسۋعا نيەت ءبىلدىرىپ وتىرعانى دالەل بولا الادى.

 اقىن ورداباي ۇلى،

زرەنيانين قالاسى  (سەربيا)