استانادا ازيا چەمپيوناتىنىڭ جالاۋى جەلبىرەدى

استاناعا اۋدارىسپاق جانە تەڭگە ىلۋدەن ازيا چەمپيوناتىنا قاتىساتىن سپورتشىلارىمىز بەن باپكەرلەر كەلدى. ءبىز ورايى كەلگەندە، قازاقستان رەسپۋبليكاسى ۇلتتىق قۇراماسىنىڭ باس جاتتىقتىرۋشىسى قۋانىشبەك قۇراماەۆتان  جانە اعا باپكەرلەر جانباتىر بەكمۇساەۆتان، نۇركەن بايبوريەۆتەن  جارىسقا دايارلىق بارىسى جانە چەمپيوناتقا قاتىساتىن سپورتشىلارىمىز تۋرالى پىكىرلەرىن ايتىپ بەرۋلەرىن وتىنگەن ەدىك. نازارلارىڭىزعا باپكەرلەردەن ەستىگەن  سول پىكىرلەردى قاز-قالپىندا ۇسىنۋدى ءجون كوردىك.

 ۇلتتىق قۇراما كوماندانىڭ باس باپكەرى، قازاقستاننىڭ ەڭبەك سىڭىرگەن جاتتىقتىرۋشىسى قۋانىشبەك قۇراماەۆ:

—  ازيا چەمپيوناتىنا قاپىسىز دايارلاندىق دەپ ويلايمىن. مامىر ايىنىڭ باسىنان باستاپ ۇلتتىق قۇراماداعى سپورتشىلارىمىزدى تاراز قالاسىنا تەگىس جينادىق. تارازداعى «اتلەتيك» سپورت كەشەنىندە وقۋ-جاتتىعۋ جيىنىن وتكىزدىك. بۇل سپورت كەشەنى رەسپۋبليكامىزداعى ءىرى سپورت كەشەنىنىڭ ءبىرى. مىسالى، وسى سپورت كەشەنىندە ءساۋىر ايىندا ەركىن كۇرەستەن ازيا چەمپيوناتىنا باراتىن سپورتشىلار وقۋ-جاتتىعۋ جيىنىن وتكىزدى. ءبىز تەك اۋدارىسپاقشىلار مەن تەڭگە ىلۋشىلەردى عانا ەمەس، جامبى اتۋشى مەرگەندەر مەن كوكپارشىلاردىڭ دا وقۋ-جاتتىعۋ جيىنىن قاتار وتكىزدىك. ال، اۋدارىسپاقشىلار مەن تەڭگە ىلۋشىلەر تۋرالى ايتسام، ولار 1 مامىر مەن 12 مامىر ارالىعىندا جالپى سپورتتىق دەنەشىنىقتىرۋ بويىنشا جاتتىقتى. بۇل دەگەنىڭىز، كادىمگى ۇلكەن سپورتتا قالىپتاسقان وقۋ-جاتتىعۋ جيىنىمەن بىردەي. ءبىر ايلىق وقۋ-جاتتىعۋ جيىنىنا قانشاما جاتتىقتىرۋشىلار قاتىستى.

جاتىقتىرۋشى دەگەننەن ەسكە تۇسەدى، وتكەن جىلدان باستاپ ۇلتتىق سپورت تۇرلەرى قاۋىمداستىعى رەسپۋبليكالىق «دەنە شىنىقتىرۋ جانە سپورت بويىنشا رەسپۋبليكالىق وقۋ-ادىستەمەلىك جانە تالداۋ ورتالىعىمەن» تىعىز بايلانىس ورناتىپ، بىرلەسە وتىرىپ جاتتىقتىرۋشىلارىمىزدى بىرنەشە كۋرستان وتكىزدى. اتاپ ايتسام، شىمكەنت قالاسىندا 2017 جىلعى 6-15 ناۋرىز ارالىعىندا ۇلتتىق ات سپورتى تۇرلەرىنەن (كوكپار، جامبى اتۋ، تەڭگە ءىلۋ، اۋدارىسپاق، قىز قۋ) بىلىكتىلىكتى ارتتىرۋ كۋرسى ءوتتى. كۋرستان 66 جاتتىقتىرۋشى-وقىتۋشى ءوتتى. بيىلعى جىلى تاراز قالاسىندا 2018 جىلعى 5-13 ناۋرىز ارالىعىندا ۇلتتىق ات سپورتى تۇرلەرىنەن (كوكپار، جامبى اتۋ، تەڭگە ءىلۋ، اۋدارىسپاق، بايگە تۇرلەرى) جاتتىقتىرۋشىلاردىڭ بىلىكتىلىكتى ارتتىرۋ كۋرسى ءوتتى. كۋرستان 47 جاتتىقتىرۋشى-وقىتۋشى ءوتتى. كۋرس تارازداعى «اۋليە اتا» ات سپورتى كلۋبىندا بولدى. سودان سوڭ، جامبىل وبلىسىنىڭ مەركە اۋدانىندا 2018 جىلعى 16-21 ءساۋىر ارالىعىندا ۇلتتىق ات سپورتى تۇرلەرىنەن (ساياتشىلىق، قۇسبەگىلىك) بىلىكتىلىكتى ارتتىرۋ كۋرسى ءوتتى. كۋرستان 19 جاتتىقتىرۋشى-وقىتۋشى ءوتتى

ۇلتتىق قۇراما كوماندانىڭ اعا جاتتىقتىرۋشىسى نۇركەن بايبوريەۆ:

— بىلىكتى جاتتىقتىرۋشى رەتىندە مەنىڭ ايتارىم، تەڭگە ىلۋدەن وسى ازيا چەمپيوناتىندا رەكوردتتىق كورسەتكىش جاڭارۋى مۇمكىن. بىرەر جىل بۇرىن تەڭگە ىلۋدەن رەكوردتىق كورسەتكىش 14 سەكۋند بولاتىن. بۇنى ءالىحان باشىمباەۆ جاساعان بولاتىن. ودان سوڭ 13 سەكۋنت بولدى. بۇل ۇزدىك تەڭگە ءىلۋشىمىز عالىمجان ءىزجانوۆتىڭ رەكوردى ەدى. وتكەن جىلى تەڭگە ءىلۋ سپورتىندا الدىنا قارا سالماي تۇرعان جاس سپورتشىمىز ماعجان ساپاربەك قىزىلوردا وبلىسىندا وتكەن ۇلتتىق سپورت فەستيۆالىندە رەكورتتىق كورسەتكىشتى 11 سەكۋندقا ءتۇسىردى.

ەندى مىنا ازيا چەمپيوناتىنا قاتىساتىن 9 مەملەكەت سپورتشىلارى اراسىندا مىقتى دايىندىقپەن كەلە جاتقان سپورتشىلار از ەمەس. سوندىقتان، وسى جولى دا جاڭا رەكوردتىق كورسەتكىشتەرگە كۋا بولۋىمىز مۇمكىن.

ال، اۋدارىسپاق تۋرالى ايتار بولسام، ءبىزدىڭ بالۋاندار جاقسى دايارلىقتان ءوتتى. اۋىر سالماقتاعى بالۋاندارىمىز باس جۇلدەنى تاعى دا يەلەنۋى مۇمكىن.

ۇلتتىق قۇراما كوماندانىڭ اعا جاتتىقتىرۋشىسى جانباتىر بەكمۇساەۆ:

— اۋدارىسپاق جاتتىقتىرۋشىسى بولعان سوڭ، مەن وسى جارىس تۋرالى ايتايىن. بالۋاندارىمىز ءبىر اي تولىق جاتتىعۋدان ءوتتى. تاڭداۋلى ون سپورتشىمىز بەس سالماق بويىنشا ىرىكتەۋدەن ءوتتى. ولاردىڭ ەسىمدەرى جاريالانعالى ءبىرتالاي ۋاقىت بولدى. بارلىعى دا تاجىريبەلى بالۋاندار. ءبىرجان قوساليەۆ، سىرىم ءىزباساروۆ، ەسىمحان ءراحماتىللا ءوزىمنىڭ ءتول شاكىرتتەرىم. ۇشەۋى دە حالىقارالىق جارىستاردىڭ قىر-سىرىنا قانىق. سوندىقتان، بۇل بالۋاندار جەڭىستى قولدان بەرمەس دەپ ويلايمىن. ال، 60 كيلو مەن 70 كيلو سالماقتاعى اقتوبەلىك بالۋاندار بۇعان دەيىن حالىقارالىق جارىستا بەلدەسىپ كورگەن جوق. ونىڭ ۇستىنە ءدال وسى سالماقتاردا شەتەلدىك بالۋاندار اراسىندا تاجىريبەلىلەرى كوپ. بىراق، اقتوبەلىك ارىپتەسىم ابات ايماعامبەتوۆتىڭ شاكىرتتەرى دە اۋدارىسپاق سايىسىنا وتە مىقتى. ىرىكتەۋ جارىسىندا قارسىلاستارىن ايقىن باسىمدىلىقپەن ۇتتى. سوندىقتان، 70 كيلوداعى شىڭعىسحان ەرجانوۆ پەن 60 كيلوداعى ازامات سەرعازين دە جۇلدەلى ورىننان كورىنۋى مۇمكىن. اللا بۇيىرتسا، قازاقستان ۇلتتىق قۇراماسى ءىىى ازيا چەمپيوناتىنىڭ دا باس جۇلدەسىن قانجىعاسىنا بايلايدى دەپ ۇمىتتەنەمىن.

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

تولەگەن جاكىتاي