تەڭگە ءىلۋ مەن اۋدارىسپاقتان ازيا چەمپيوناتتارى باستالدى

بۇگىن استاناداعى «قازانات»  اتشابارىندا 1-2 ماۋسىم كۇندەرى وتەتىن تەڭگە ىلۋدەن ءىى ازيا جانە اۋدارىسپاقتان ءىىى ازيا چەمپيوناتتارى باستالدى.  مادەنيەت جانە سپورت مينيسترلىگى مەن ۇلتتىق سپورت تۇرلەرى قاۋىمداستىعىنىڭ ۇيىمداستىرۋىمەن استانا قالاسىنىڭ 20 جىلدىق مەرەيتويى قارساڭىندا وتكىزىلگەن ازيا چەمپيوناتتارىندا قازاقستان، وزبەكستان، قىرعىزستان، تاجىكستان، موڭعوليا، رەسەي، اۋعانستان، قىتاي،  تۇركيا مەملەكەتتەرىنىڭ  الپىسقا جۋىق سپورتشىلارى باق سىنادى. تەڭگە ىلۋدەن ءىى ازيا چەمپيوناتىندا وڭتۇستىكتىڭ وعلانى ماعجان ساپاربەك چەمپيون اتاندى. 

بۇگىن «قازانات»  اتشابارىندا ءتۇس اۋا باستالعان سالتاناتتى اشىلۋدان سوڭ الدىمەن تەڭگە ءىلۋشى شەبەرلەردىڭ باسەكەسى تاماشالاندى. جۇيرىك اتپەن  قۇيعىتا شاپقان بەتتە كوز ىلەسپەس شاپشاڭدىقپەن تۇيىنشەكتەگى تەڭگەلەردى بىرىنەن سوڭ ءبىرىن ءىلىپ العان تەڭگە ءىلۋشى جىگىتتەردىڭ سايىسى قالىڭ جانكۇيەردىڭ كوڭىلىن ءبىر سەرپىلتتى. 9 مەملەكەت سپورتشىلارىنىڭ اراسىنان فينالعا ساناۋلى ساڭلاقتار سۋىرىلىپ شىقتى.

ون سپورتشى ساراپقا سالعان تەڭگە ىلۋدەن  ءىى ازيا چەمپيوناتى جۇلدەلەرىنىڭ ەكەۋىن قازاقستاندىق شەبەرلەر ۇتىپ الدى. التىن مەدال مەن 1 500 000 تەڭگە سىيلىق جاس ساڭلاق ماعجان ساپاربەككە بۇيىردى. كۇمىس جۇلدە مەن 700 000 مىڭ تەڭگە سىيلىقتى عالىمجان ءىزجانوۆ يەلەندى. قولا جۇلدە مەن 500 000 تەڭگە سىيلىقتى قىرعىزستان سپورتشىسى امانتۋر مينۋر ۋلى قانجىعاسىنا بايلادى.

اۋدارىسپاقتان ءىىى ازيا چەمپيوناتىنىڭ جۇلدەسى دە 9 مەملەكەت كوماندالارى اراسىندا ساراپقا سالىنادى. بۇگىن 60 كگ جانە  70 كگ سالماقتاعى بالۋانداردىڭ سايىسى تاماشالاندى. بالۋاندار سايىسى قالىڭ كوپشىلىكتى بەي-جاي قالدىرمادى. ازيانىڭ تاقىمى تاستاي، قۇرىش بىلەكتى، تۇكتى جۇرەكتى جىگىتتەرى ات ۇستىندەگى جەكپە-جەكتە الۋان ءادىس، سان تاسىلگە سالىپ باقتى.

تۇپتەپ كەلگەندە، 60 كگ سالماقتا قارسىلاستارىن بەت قاراتپاي ۇتقان اقتوبەلىك جاس بالۋان ازامات سەرعازين اۋدارىسپاقتان ءىىى مارتە وتكەن ازيا چەمپيوناتىنىڭ چەمپيونى اتاندى.  ال، قازاقستاننىڭ اۋدارىسپاق قۇراما كومانداسىنىڭ تاعى ءبىر مۇشەسى، اقتوبەلىك شىڭعىسحان ەرجانوۆ 70 كگ سالماقتا تەڭگە ىلۋدەن ءىى ازيا چەمپيوناتىنىڭ چەمپيونى بولدى.

ەرتەڭ 80 كگ،  90 كگ، 90 كيلودان جوعارى جانە ءابسوليۋتتى سالماقتاعى بالۋاندار باسەكەسى ەرتەڭ تاماشالانادى.  ىىى ازيا چەمپيوناتىنىڭ فينالىنىڭ قىزىعى بۇگىنگى باسەكەدەن دە اسىپ تۇسەدى دەپ بولجانۋدا.  باستالۋى ساعات 11:00-دە.

قوعامدا ۇلتتىق سپورت تۇرلەرىنە دەگەن قىزىعۋشىلىقتى ارتتىرۋ، جاستاردى وتانسۇيگىشتىككە، پاتريوتتىق رۋحقا تاربيەلەۋ جانە ۇلتتار اراسىنداعى دوستىق پەن ءوزارا تاتۋلىق قاتىناستاردى نىعايتۋ ماقساتىندا ۇيىمداستىرىلاتىن وسىناۋ ۇلتتىق سپورت جارىستارى كوزدەلگەن مەجە ۇدەسىنەن كورىنۋدە. ماسەلەن، استانادا وتكەن ازيا چەمپيوناتتارىن يۋنەسكو-نىڭ ءداستۇرلى سپورتتار مەن ويىندار كوميتەتىنىڭ وكىلدەرى ارنايى كەلىپ تاماشالاۋىنىڭ ءوزى كوپ جايتتى اڭعارتسا كەرەك.

تەڭگە ىلۋدەن ءىى ازيا چەمپيوناتىنىڭ جەڭىمپازدارىن يۋنەسكو-نىڭ ءداستۇرلى سپورت جانە ويىندار كوميتەتىنىڭ توراعاسى حاليل احمەد حان، كوميتەتتىڭ حاتشىسى  شاممي رانا جانە كوميتەتتىڭ ۇيلەستىرۋشىسى مارسەللين دەللي مىرزالار،  مادەنيەت جانە سپورت ءمينيسترى ارىستانبەك مۇحامەدي ۇلى، ۇلتتىق سپورت تۇرلەرى قاۋىمداستىعىنىڭ قۇرمەتتى پرەزيدەنتى، گەنەرال-مايور قايرات ساتىبالدى ۇلى  ماراپاتتاپ، جۇلدەگەرلەرگە ارناپ قۇتتىقتاۋ ءسوز سويلەدى.

تولەگەن جاكىتاي