SportPress.kz Qazaqstan sport jańalyqtary
Búgin Astanadaǵy «Qazanat» atshabarynda 1-2 maýsym kúnderi ótetin Teńge ilýden II Azııa jáne Aýdaryspaqtan III Azııa chempıonattary bastaldy. Mádenıet jáne sport mınıstrligi men Ulttyq sport túrleri qaýymdastyǵynyń uıymdastyrýymen Astana qalasynyń 20 jyldyq mereıtoıy qarsańynda ótkizilgen Azııa chempıonattarynda Qazaqstan, О́zbekstan, Qyrǵyzstan, Tájikstan, Mońǵolııa, Reseı, Aýǵanstan, Qytaı, Túrkııa memleketteriniń alpysqa jýyq sportshylary baq synady. Teńge ilýden II Azııa chempıonatynda ońtústiktiń oǵlany Maǵjan Saparbek chempıon atandy.
Búgin «Qazanat» atshabarynda tús aýa bastalǵan saltanatty ashylýdan soń aldymen Teńge ilýshi sheberlerdiń básekesi tamashalandy. Júırik atpen quıǵyta shapqan bette kóz ilespes shapshańdyqpen túıinshektegi teńgelerdi birinen soń birin ilip alǵan teńge ilýshi jigitterdiń saıysy qalyń jankúıerdiń kóńilin bir serpiltti. 9 memleket sportshylarynyń arasynan fınalǵa sanaýly sańlaqtar sýyrylyp shyqty.
On sportshy sarapqa salǵan Teńge ilýden II Azııa chempıonaty júldeleriniń ekeýin qazaqstandyq sheberler utyp aldy. Altyn medal men 1 500 000 teńge syılyq jas sańlaq Maǵjan Saparbekke buıyrdy. Kúmis júlde men 700 000 myń teńge syılyqty Ǵalymjan Izjanov ıelendi. Qola júlde men 500 000 teńge syılyqty Qyrǵyzstan sportshysy Amantýr Mınýýr ýýly qanjyǵasyna baılady.
Aýdaryspaqtan III Azııa chempıonatynyń júldesi de 9 memleket komandalary arasynda sarapqa salynady. Búgin 60 kg jáne 70 kg salmaqtaǵy balýandardyń saıysy tamashalandy. Balýandar saıysy qalyń kópshilikti beı-jaı qaldyrmady. Azııanyń taqymy tastaı, qurysh bilekti, túkti júrekti jigitteri at ústindegi jekpe-jekte alýan ádis, san tásilge salyp baqty.
Túptep kelgende, 60 kg salmaqta qarsylastaryn bet qaratpaı utqan aqtóbelik jas balýan Azamat Serǵazın Aýdaryspaqtan III márte ótken Azııa chempıonatynyń chempıony atandy. Al, Qazaqstannyń aýdaryspaq qurama komandasynyń taǵy bir múshesi, aqtóbelik Shyńǵyshan Erjanov 70 kg salmaqta Teńge ilýden II Azııa chempıonatynyń chempıony boldy.
Erteń 80 kg, 90 kg, 90 kılodan joǵary jáne absolıýtti salmaqtaǵy balýandar básekesi erteń tamashalanady. III Azııa chempıonatynyń fınalynyń qyzyǵy búgingi básekeden de asyp túsedi dep boljanýda. Bastalýy saǵat 11:00-de.
Qoǵamda ulttyq sport túrlerine degen qyzyǵýshylyqty arttyrý, jastardy otansúıgishtikke, patrıottyq rýhqa tárbıeleý jáne Ulttar arasyndaǵy dostyq pen ózara tatýlyq qatynastardy nyǵaıtý maqsatynda uıymdastyrylatyn osynaý Ulttyq sport jarystary kózdelgen meje údesinen kórinýde. Máselen, Astanada ótken Azııa chempıonattaryn IýNESKO-nyń Dástúrli sporttar men oıyndar komıtetiniń ókilderi arnaıy kelip tamashalaýynyń ózi kóp jaıtty ańǵartsa kerek.
Teńge ilýden II Azııa chempıonatynyń jeńimpazdaryn IýNESKO-nyń Dástúrli sport jáne oıyndar komıtetiniń tóraǵasy Halıl Ahmed Han, komıtettiń hatshysy Shammı Rana jáne komıtettiń úılestirýshisi Marsellın Dellı myrzalar, Mádenıet jáne sport mınıstri Arystanbek Muhamedıuly, Ulttyq sport túrleri qaýymdastyǵynyń qurmetti prezıdenti, general-maıor Qaırat Satybaldyuly marapattap, júldegerlerge arnap quttyqtaý sóz sóıledi.
Tólegen JÁKITAI
