Jeńisimen jelpintken jastar

Qazirgi kezde elimizde kenjelep kele jatqan sport túrleriniń ishinde eńsesin bıik ustap turǵan bir sport túri bolatyn bolsa ol Meıbýakan Godzıýrý karate-do ekenin aıtýǵa bolady. Osy sport túrinde jattyǵatyn qarakóz jastarymyzdyń kópshiligi búginde  álem jarystarynda  topjara bastady.

Godzıýrý Meıbýkan karate túrinde kirpish, aǵash sekildi qatty zattardy saýsaqtardyń  ushymen syndyrý sekildi jattyǵýlary bar. Bul árıne,  kóp jattyǵyp, shynyqqannyń nátıjesinde jasaıtyn «tamshavarı» atty   kúrdeli  jattyǵý ekeni belgili. Osyndaı qıyn ádisterdi keregine tıimdi qoldaný has sheberdiń ǵana qolynan keletin sharýa. Negizi osy bir jaraqaty alý jaǵynan alda turǵan sport túri bolsa da batyr eldiń urpaǵy qazaq balalary óte qushtarlyqpen aınalysyp keledi. Bul sport túrinde sheketý joq. Aınalysqandarǵa jas shamasy shektelgen be? Negizi Godzıýrý Meıbýkan karate sportyna qyzyǵyp kelýshilerdiń arasynda nebir taýsoǵar alyp deneli jastar kelgenimen, bul sporttyń qupııasyn túsinbegendikten tastap ketip jatady eken. Ásirese, kirpish syndyrý sekildi jattyǵýlarǵa kelgende, saǵy synyp qoldaryn aýyrtyp, ketip qalatyndar kóptep tabylyp jatady. Al, basty qupııasy deneni qataıtý, durys tynys alý ádisterine kóp kóńil bólý ekendigin mán bere bermeıdi. Sondyqtan aıtýly sporttyń maıyn iship jiligin shaqqan maman bapkerler, qatty zattardy syndyrýǵa kelgende, mindetti túrde tynys alý júıesine asa mán berý kerektigin eskertedi.

Sońǵy jyldary sporttyń osy túri elimizde qarqyndy damyp keledi. Iá, súıikti sport túrine jan tánimen berilip, saıa tapqan keıbir arqaly azmattardyń arqasynda ol qazaq jerinde de qanatyn keńinen jaıa bastady. Sondaı bir jannyń biri, Qazaqstan Respýblıkasy Meıbýkan Godzıýrıý karate-do assoıaııasynyń prezıdenti, qara belbeý 4 dan ıegeri Nurlan Kerimbekovty aıtsaq bolady. Nurlannyń armany álemniń ár túkpirinde osy sporttan ótetin baıraqty básekelerde kók týymyzdy jeńis tuǵyrynan jelbiretý eken. Elim deıtin er bolmasa, erim deıtin el qaıdan  bolsyn degendeı, elim dep, eleýli eńbegimen alǵysqa bólene bastaǵan Nurlan Kerimbekovteı er tulǵaly, óz tańdaǵan sportyna janashyr jandardyń arqasynda  kenjelep bolsa  da kelip qosylǵan, godzıýrý meıbýkan karate-do túri, qazirdiń ózinde aıtarlyqtaı tabystarǵa qol jetkize bastady.

Onyń aıǵaqtary jeterlik desek sonyń biri jýyrda Odessada ótken Eýropa kýbogy bolyp sanalady.

Ýkraınada jalaýyn jelbiretken  Godzıýrıý karate –do  dan Álem Kýbogy úshin 15 memlekettiń  qatysýymen dúbirli jarys ótip, qazaqstandyq jasópirim sheberler 13 altyn, 8 kúmis, 5 qola medaldardy jeńip alyp, jalpy komandalyq 2 oryndy ıelenip keldi. Qazaqstan quramasy aldyna tek alań ıeleri ýkraınalyqtardy ǵana jiberip alǵan eken. Joǵary deńgeıde  uıymdastyrylǵan bul týrnırde Meıbýkan Godzıýrıý karate-do assoıaııasynyń prezıdenti,  Nurlan Kerimbaev bastap barǵan jalyndy jas qazaqtyń qaısar ul-qyzdary tamasha kórsetken ónerlerimen kórermenderdiń kóńil tórinen oryn alypty. Qazaqstandyq jas talanttar Kata, Kobýdo, Shobý kýmıte, Irıkýmı dzıý, Irıkýmı Go jattyǵýlary boıynsha synǵa túsip,  jeńis tuǵyryn eshkimmen bólispeý úshin jankeshti jekpe-jekterin ótkizgen eken. Nátıjesinde aıbarly da aııbynda  alashtyń jas ulandary jeńis tuǵyrynyń barlyq satysynan kórinip, elimizdiń abyroıyn asqatatyp qaıtty. Endigi maqsat álem jarysynda osy jetken jetistikti qaıtalaý. Endeshe jigerli jastarymyzǵa sáttilik tileımiz.

Aqyn ORDABAIULY 

ALMATY