ۇلتتىق ارنا قاتاردا وتەتىن فۋتبولدان  الەم چەمپيوناتىن كورسەتەدى

بۇگىن «Qazaqstan» ۇلتتىق تەلەارناسى جانە «Qazsport»  تەلەارناسى فۋتبولدان رەسەيدە وتكەن الەم چەمپيوناتىنىڭ كورسەتىلىمىن قورىتىندىلادى.

«قازمەديا» ورتالىعىنداعى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىنا  «قازاقستان» تەلەراديوكورپوراتسياسىنىڭ باسقارما توراعاسى ەرلان قارين مەن  «Qazsport» تەلەارناسىنىڭ ديرەكتورى پاۆەل تسىبۋلين قاتىستى.

ەرلان قاريننىڭ اتاپ وتكەنىندەي، فۋتبولدان الەم چەمپيوناتى بۇل بارلىق فۋتبولسۇيەر قاۋىم ءۇشىن سپورت الەمىندەگى  ماڭىزدى دا، قۋانىشتى وقيعالاردىڭ بىرىنەن سانالادى. وزدەرىڭىزگە ءمالىم، «Qazaqstan» جانە «Qazsport» تەلەارنالارى فۋتبول ويىندارىنىڭ بارلىق 64 ماتچىن تولىعىمەن تىكەلەي ەفيردە كورسەتتى.

«Qazaqstan» ۇلتتىق تەلەارناسىنان ەڭ كوپ قارالعان ماتچ رەسەي مەن ەگيپەت كوماندالارى اراسىنداعى ويىننىڭ ۇلەسى 47،4 پايىز، ال كورسەتكىشى 6،97 پايىز بولدى. وسى تەلەارنادا كورسەتىلگەن رەسەي مەن حورۆاتيا كوماندالارىنىڭ ويىنى ۇزدىكتەر  قاتارىنا كىرىپ، 44.3 پايىز ۇلەسى بويىنشا 7.32 پايىزدىق  رەيتينگتىك كورسەتكىشكە جەتتى. ال ەڭ تومەنگى رەيتينگ شۆەيتساريا مەن كوستا-ريكا اراسىنداعى ماتچتىڭ ۇلەسى  5،3 پايىز،  رەيتينگىسى 0،58 پايىز عانا بولدى. ءاربىر ماتچتىڭ ورتاشا اۋديتورياسى شامامەن جارتى ميلليونعا جۋىق كورەرمەندى قامتىعان. رەسەي مەن حورۆاتيا ويىنى ەڭ كوپ قارالدى. بۇل ماتچتى LIVE رەجيمىندە 339 455 ادام تاماشالادى. ال رەسەي مەن ساۋد ارابيا ويىنىن 16 819 ادام تاماشالاعان ەكەن. جاعىمدى جاڭالىق، «Qazaqstan» ۇلتتىق تەلەارناسى 2022 جىلى قاتاردا وتەتىن فۋتبولدان الەم چەمپيوناتىن  ترانسلياتسيالاۋ قۇقىعىنا يە بولدى.

ءباسپاسوز ءماسليحاتىندا «Qazsport» تەلەارناسىنىڭ ديرەكتورى پاۆەل تسىبۋلين فۋتبولدان الەم چەمپيوناتىنىڭ تىكەلەي ەفيردەگى كورسەتىلىمىنىڭ جوعارى دەڭگەيدە وتكىزىلگەنىن اتاپ ءوتتى. ماسەلەن،  7 شىلدەدە، «Qazsport» تەلەارناسى ورتاشا تاۋلىكتىك ۇلەس جاعىنان 18،3 پايىزدى كورسەتىپ، ءابسوليۋتتى رەكورد جاساعان. ارنانىڭ رەيتينگى 1،6 پايىز بولدى. ال رەسەي مەن حورۆاتيا ماتچىندا بارلىق 6+ اۋديتورياسىمەن 1 018 910 كورەرمەن جيناپ رەكورد جاسالعان.

«Qazaqstan» ۇلتتىق تەلەارناسىنىڭ تىڭ ىزدەنىستەرگە قادام باسقانى جاسىرىن ەمەس. ول بويىنشا الەۋمەتتىك جەلىلەردە جىلى لەبىزدەر ايتىلادى. بىراق، ءباسپاسوز ءماسليحاتىندا سپورت كوممەنتاتورلارىنا قاتىستى ايتىلعان سىن دا بولدى. ءبىر ارىپتەسىمىز كەيبىر سپورت كوممەنتاتورلارىنىڭ حابار بارىسىندا «اۋىل ءسوزىن ايتادى» دەگەن سىڭايداعى پىكىرىن ايتتى. بۇعان قاتىستى «قازاقستان» تەلەراديوكورپوراتسياسىنىڭ باسقارما توراعاسى ەرلان قارين بىلاي دەدى: «اۋىل ءسوزى نەمەسە قالا ءسوزى دەگەن ۇعىم جوق. قاسيەتتى ءسوزدىڭ بارىمىزگە ورتاق ەكەنىن جادىمىزدا ساقتاعانىمىز ابزال. ال سپورت كوممەنتاتورلارىنىڭ ءبىرى ويىنداردى قاجەتتى جەرىندە سپورت تەرميندەرىمەن تۇسىندىرسە، ال ەكىنشىسى  ونى كورەرمەندەر اۋديتورياسىنا قاراي، ويىنداردى كوپشىلىككە ءمالىم سوزبەن تۇسىندىرەدى».

باسقارما توراعاسى ە.قارين ترانسلياتسيانى جوعارى دەڭگەيدە ۇيىمداستىرىپ، ەشقانداي دا قاتەلىكتەرگە جول بەرمەگەنى ءۇشىن «قازاقستان» تەلەراديوكورپوراتسياسىنا فيفا تاراپىنان العىس حات جولدانعانىن ايتىپ ءوتتى. بۇل ارينە، ۇلتتىق ارنا مەن «قازسپورت» ارناسىنا بەرىلگەن جوعارى باعا. سوندىقتان بارشامىز ءۇشىن وسىنداي تىكەلەي ترانسلياتسيالاردىڭ ماڭىزى وتە زور.

ءامىرحان الماعانبەتوۆ،

استانا قالاسى