Las-Vegasta Golovkın men Alvares jankúıerlermen júzdesti

Armysyzdar, sport jankúıerleri!

Boksty jaqsy kóretin qyz-jigitterimiz, Golovkın men Alvarestiń jekpe-jegi qashan ótedi, qashan bitedi dep taǵatsyzdana kútip júrgenderińizdi bilemin. Árıne, júrekterińiz lúpildep, bizdiń jigit ne bolar eken dep, jandaryńyzdy shúberekke túıip júrgenderińizdi sonaý muhıttyń arjaǵynda júrgen men jaqsy sezip turmyn. Bul elge, jerge, týǵan jerdiń azamatyna degen qurmetterińizdiń belgisi. Sál shydasaq, qos myqtynyń arasyndaǵy alapat aıqasty da kórip qalamyz. Sol shaıqasty óz kózimmen kórýge, sizderge jaqsy habar taratýǵa men de AQSh-qa attanǵan bolatynmyn. Alla sátin salsa, súıinshi habardy jetkizýge men de asyqpyn. Endi 15 qyrkúıekte ótetin ǵasyr jekpe-jeginiń aldyndaǵy shara jaıly taǵy bir baıandap óteıin. Boks aldyndaǵy eń negizgi sharanyń úlkeni búgin ótti. Olaı bolsa, osy habarymdy tezdetip, ózderińizben qaýyshtyrýǵa bel býdym.

Amerıkanyń Las-Vegas shtatynda «MGM grand» oıyn-saýyq kesheninde Gennadıı men Alvarestiń arasyndaǵy bokstyń aldyndaǵy úlken oqıǵa bolyp ótti. Bul kúni Gennadıı Golovkın men Saýl Alvares jurtshylyqpen júzdesti. Mundaı kezdesý álemdik kásipqoı bokstyń negizgi sharalarynyń biri bolyp sanalady. Saıysqa shyǵatyn qos myqtyny alaýlatyp, jalaýlatyp, jurtshylyqpen júzdestiredi. Mine, sol saltanatty shara burynǵydan da ózgeshe boldy. Biz turǵan «MGM grand» oıyn-saýyq kesheniniń ishi, syrty halyqqa tolyp ketti. Tipti, úsh saǵat ýaqyt buryn kelip alǵandar qanshama. Barlyǵynyń qoldarynda súıikti boksshylarynyń sýretteri, ústilerine kıgen kıimderine beınelerin basyp alǵandardyń da qarasy kóp. Solardyń arasynda bizdiń Genanyń belgisi belgilengen «GGG» bas kıim kıgender jetip artylady. Muny kórgen bizdiń ishimiz jylyp, qýanyp qaldyq. Genany qurmetteıtin, jaqsy kóretin, onyń talantyna súısinetin sheteldik jankúıerlerdiń sany molshylyq. Onyń syrtynda qos boksshydan suhbat alamyn, sýretke túsiremin degen álemniń barlyq buqaralyq aqparat quraldarynyń ókilderin qosyńyz. Asaı-múseıin súıretip, entelep, alǵa qaraı umtylyp, men birinshi kóremin, elden buryn saýaldy men joldaımyn, kerekti jaýabymdy tez alyp, elime elden buryn habar taratamyn degen áriptesterimniń qyzý tirligin kórdim. Olardyń arasynda men jáne elden barǵan sanaýly áriptesterimdi kózim shalyp qaldy. Sonymen dúbirlegen jurttyń delebesin qozdyratyn, kópten kútken merekeniń shymyldyǵy túrildi. Eń alǵashqy bolyp sahnaǵa eki myqtynyń shaıqasynyń aldynda óner kórsetetin jas boksshylar (andekard) shyqty. Toptyń basyn búginde atyn áıgilep úlgergen, Gennadııdiń jankúıeri, álemdik reıtıngte ózindik orny bar jeńil salmaqtaǵy Roman Gonsales (Shokalıta) pen Moızes Fýentes  keldi. Odan keıin kezinde Gennadııden ońbaı taıaq jep, jetinshi raýndta tize búkken Davıd Leme  men túptiń – túbinde Genaǵa qarsylas bolatyn boksshy dep alqalap júrgen Gerı O Sallıvan shyqty. Artynsha eldi shýlatyp Brenden Kýk pen meksıkalyq taǵy bir boksshy Haıme Mýngııa ortaǵa keldi. Bulardyń barlyǵyn el qoshemetpen qarsy alyp, qurmet kórsetti. Jas bolsa da talaı básekede shyńdalyp, kásipqoı bokstyń qyr-syryn ábden meńgergen boksshylar ortada júrip, ózderin naǵyz chempıonǵa balap, bir-birine kózben ses kórsetip, merekeniń kórigin qyzdyrdy. Osydan keıin keshenniń ishi jańǵyryp ketti. Buǵan deıingi aıǵaı ananyń qasynda jaıshylyq bolyp qalǵandaı. Bul kezde keshenge Gennadıı Golovkın kirdi dep habarlady. Osyny estigen jankúıerler  «MGM grand» oıyn-saýyq kesheniniń ishin jańǵyrtyp jiberdi. Tolqyny jaǵaǵa sharpyǵan teńizdeı entelep, Golovkındi men birinshi kóremin degendeı saraıdyń ishin tolqytyp jiberdi. Sol ýaqytta ortany qaq jaryp, bapkerlerimen, óziniń ujymynda birge isteıtin mamandarymen birlesip Gena da kelip jetti. Únemi jaıdary minezimen, aqjarqyn kóńilimen kópshilikti baýrap alatyn qazaqstandyq boksshy sol baıaǵy qalpynan taıqymaı, jankúıerlerine qurmet kórsetip sahnaǵa shyqty. Kóńil kúıi de, baby da jaqsy sekildi. Syńary Maksım de qolqanat bolyp, baýyrynyń bar jaǵdaıyn týǵyzyp júr. Osyny kórgen men de iship jylyp, Gennadııdiń kelbetine súısinip, talantyna bas uryp, qýanyp qaldym. Avel Sanches te ózderine senimdi. Genany jankúıerler de, baspasóz ókilderi de kóp ustady. Qoıǵan saýaldaryna saýatty jaýap berip, naǵyz er maıtalman boksshy ekenin kórsetti. Qalyń meksıkalyq jankúıerlerdiń arasynda biz de boı kórsetip, Genaǵa qoldaý bildirdik. Qazaqstannan barǵan úsh jýrnalıst bar ekenimizdi, Qazaqstannan kelgenimizdi bildirip, Gena, biz keldik, seniń qasyńdamyz, Qazaqstannyń ystyq sálemi men qoldaýyn ala keldik dep aıqaıladyq. Muny estip, kórgen Gennadıı de qýanyp arqalanyp qaldy. Árıne, jaýap qaıtarmasa da, bizge qarap, kórdim, rahmet, senimderińizdi aqtaımyn degendeı syńaı tanytty. Qoıylǵan saýal kóp, barlyǵyna da jaýap berip úlgerip jatyr. Ásirese, boksqa daıyndyǵy jaıly, Alvaresqa qandaı tosynsyı daıyndap otyrsyń degen suraqqa naqty jaýap qaıtty.

– Men shaıqasqa tolyq daıynmyn. О́zimdi jaqsy sezinip, babymdamyn. Sol kúni Meksıkanyń táýelsizdik merekesi. Bul úlken qasıetti mereke. Merekege oraılastyryp uıymdastyrǵan boks keshinde men sharshy alańda naǵyz shoý kórsetemin. Meksıkanyń merekesi maǵan kedergi bola almaıdy, kersinshe kúshime qýat qosatyn bolady. Men professıonalmyn, Meksıkanyń táýelsizdik merekesine ózimniń ataqtarymdy qorǵap qalamyn, bul qarymta bolady. Biraq, basqa tarıh, ol tarıh jaqsy jaǵynan kórsetkish beredi jáne jaqsy nátıjege jetemin, – dedi.

Odan ári Alvaresqa qatysty saýalyna da nyq senimmen jaýap berdi. «Men ózim armandaǵan qarsylasyma keldim, onymen jaqsy kezdesý ótkizemin jáne baqytty kezeńime jetemin. Ol úshin Alvares maǵan múmkindik berýi kerek, ózi aıtqandaı judyryqtasýy kerek. Eger dál aıtqanyndaı judyryqtasatyn bolsa men ony nokaýtqa jiberemin. Ýaqyt keldi, men kúshtimin», dep jankúıerlerin dúr silkindirdi.

Osydan keıin Gennadıı óziniń adamdarymen keri attanyp ketti. Olardyń ketip qalǵanyna biz de alǵashynda túsinbeı qaldyq. Múmkin uıymdastyrýshylar qandaı da bir shoý uıymdastyryp qoıǵan bolar dep ishteı oı túıdik.

Sodan soń Saýl Alvares keledi dep habarlady. Baǵanaǵy aıǵaı odan da artyp, tipti sheginen shyǵyp ketti. Biz teńiz tolqyǵandaı dedik, bul joly muhıt tolqyǵandaı boldy. О́zderi de osyndaı dańǵaza men daraqylyqty jaqsy kóretin halyq emes pe. Shýlaǵanda shyńyraý shegine jetti. Sonymen Saýl da sahnada kóp boldy. О́ziniń túrli jattyǵýlaryn kórsetip, sýretke túsip, jýrnalısterdiń suraqtaryna jaýap qaıtty. О́z qyzmetterin atqarǵannan keıin Alvares te jaqtastarymen birge ketip qaldy. Buǵan biz qatty tańǵaldyq. Bulary qalaı? Olar bir-birine qarap kózderimen ses kórsetpeýshi me edi. Birin biri kórmeıtin bolǵan ba dep oılanyp qaldyq. Rasymen de eki myqtynyń arasy ýshyǵyp ketkeni sonsha biz sharshy alańdaǵy shaıqasqa deıin bir-birimizdi kórmeımiz, sol kúni, boks keshinde sharshy alańda biraq kezdesemiz dep bel býypty.

Osydan keıin bokstyń qyzyq bolatyny kórinip tur. 15 qyrkúıek kúni eki boksshy da aıanyp qalmaıtyny anyq, bir-birin qulatyp tynbaı istiń aıaqtalmaıtynyn sezdim. Bul da sizderdiń kókeılerińizge túıe júretin oqıǵanyń biri. Sondyqtan sizder sol kúni boks keshin jiberip almańyzdar, men aıtqan oqıǵanyń úshinshi kezeńi ıaǵnı, núktesi osy kúni qoıylmaq.

Búgingi kezdesýden úlken bir suraqtyń jaýaby belgili bolatyn. О́tken jylǵy shaıqastan keıin túrli alyp qashpa áńgimelerden keıin, mamandardyń san túrli oılarynan keıin alańǵa qaı boksshynyń birinshi keletini jumbaq bolǵan edi. Esterińizde bolsa byltyr boksshylardyń jankúıerlermen júzdesýine Saýldiń birinshi shyqqanyn bilesizder. Munyń da ózindik syry bar.  Bizdiń elimizdegi konert keshindegideı naǵyz myqty, qurmeti men ataǵy alysqa ketken ánshi sol kúngi án keshiniń sońynda shyǵyp, keshtiń núktesin qoıatyn. Sol sekildi munda da birinshi shyqqan boksshynyń ataǵy men myqtylyǵy anyqtalady. Endeshe ózderińiz bilgendeı birinshi bolyp sahnaǵa bizdiń Golovkın shyqty. Iaǵnı, dál qazirgi ýaqytta qazaqstandyq boksshyny barlyǵy moıyndap, chempıon ekenine kúmán keltirip otyrǵan joq. Shyn máninde qanjyǵasynda úsh belbeýi bar Gennadıı Golovkın – chempıon. Olaı bolsa, búgingi keshte Golovkındi birinshi bolyp jankúıerler qarsy alsa, 15 qyrkúıek kúni ortadaǵy tóreshi birinshi bolyp, bizdiń jigittiń qolyn kótersin dep tileıik!

Nesip JÚNISBAIULY, belgili sport jýrnalısi, Las-Vegastan arnaıy sportpress.kz saıty úshin.