SportPress.kz Qazaqstan sport jańalyqtary
Qyrǵyzstannyń Osh oblysynda djıý-djıtsýden (ne-vaza) ótken «Alay open» halyqaralyq týrnırinde qazaq sportshylary 15 altyn, 5 kúmis jáne 5 qola medaldi ıelendi.
Oǵan «Sagadat batyr QTT» sport klýbynan 7 men 17 jas aralyǵyndaǵy 23, al eresekterden 4 sportshy qatysty. Týrnırde jasyna qaramaı, Jibek Qulymbetovanyń jeńimpaz atanǵanyn aıta ketken jón. Jarysta ol qyrǵyz, ózbek, tájik sportshylaryn tize búktirip, taǵy da altyn júldeni jeńip aldy. Jibek 11 jasta. Ol jas bolsa da qazirdiń ózinde álem chempıony, halyqaralyq týrnırlerdiń jeńimpazy atanyp otyr.
Osy týrnırde «Sagadat batyr QTT» klýbynyń jattyqtyrýshysy Samat Aıtpanbet te el namysyn qoldan bermeı, qurmet tuǵyrynyń eń bıik satysyna kóterildi. Jalpy, týrnırde Qazaqstan sportshylary 25 júlde alyp, Alataýdyń ar jaǵyndaǵy aıyrqalpaqty aǵaıynǵa kók baıraǵymyzdy kótertti. Atap ótetin bir nárse, júldelerdiń bárin Nursultan Orynbasarov jetekshilik etetin «Sagadat batyr – QTT» sport klýbynyń saıypqyrandary jeńip aldy.
Týrnırde Nursultan Orynbasarovtyń ózi de 84 kılo salmaqta jeńimpaz atandy. Ol bir jyl úzilisten keıin bozkilemge qaıta oralyp, qurmet tuǵyrynyń bıik satysynda turýǵa laıyq ekenin dáleldedi.
–Uzaq merzimdi demalystan keıingi jarys óte sátti aıaqtaldy. Bul jeńis osy týrnırmen tuspa-tus kelgen týǵan kúnime keremet syı boldy. Aldaǵy ýaqytta barlyq týrnırler men chempıonattarǵa qatysamyn, – dedi ol.
Nursultan Orynbasarov bir jyl bozkilemde boı kórsetpegenimen sporttan alshaqtaǵan emes. Ol byltyrdan beri halyqaralyq deńgeıdegi jeti týrnır uıymdastyryp, álem chempıonatyna shákirtterin daıyndap, balalardyń kásibı sheberligin arttyryp qoımaı, rýhanı turǵyda da tárbıe jumystarmen aınalysty. Qazir qarap otyrsaq, álem chempıonaty men halyqaralyq týrnırlerde «Saǵadat batyr» sport mektebiniń shákirtteri kórsetip júrgen nátıjeler Nursultan Orynbasarovtyń eńbeginiń jemisi.
Baqyt JAQASh
Qyrǵyzstan, Osh oblysy
