ساعادات باتىر سايىسىندا سايىپقىراندار سىنعا ءتۇستى

الماتى وبلىسى، ىلە اۋدانىنىڭ ورتالىعى وتەگەن باتىر كەنتىندە دجيۋ-دجيتسۋدان تۋرنير ءوتتى.

جىل سايىن قوڭىر كۇزدە  ۇيىمداستىرىلاتىن دوداعا بيىل قىرعىزستاننىڭ وش وبلىسىنان جانە بىشكەك قالاسىنان دا سپورتشىلار كەلىپ باقتارىن سىنادى. بۇدان بولەك  «International Sagadat batyr jiu-jitsu kids cup-2018» تۋرنيرىنە ەلىمىزدىڭ ءار وبلىسىنان جانە الماتى، تالدىقورعان قالاسىنان دا كوماندالار قاتىستى. حالىق قاھارمانى، ارميا گەنەرالى ساعادات نۇرماعانبەتوۆتىڭ ەسىمىمەن اتالاتىن  «Sagadat batyr» كلۋبىنىڭ باسشىسى، بىلىكتى باپكەر نۇرسۇلتان ورىنباساروۆ  باس بولىپ وتكىزگەن تۋرنيرگە 5-17 جاس ارالىعىنداعى 300-دەن اسا سپورتشى قاتىسىپ،  شەبەرلىكتەرىن پاش ەتتى.

الماتى وبلىسى، ىلە اۋداندىق اكىمدىگى مەن «نۇر وتان» پارتياسىنىڭ ىلە اۋداندىق فيليالىنىڭ مۇرىندىق بولىپ، قولداۋىمەن وتكىزىلگەن دودادا دجيۋ-دجيتسۋ سپورتىنىڭ ەرەن ۇلگىسىن كورسەتىپ، تالانتىمەن دارالانعان  «Qazaqstan Top Team» كلۋبىنىڭ سپورتشىلارى جالپىكوماندالىق ەسەپتە توپ جاردى. ەكىنشى ورىن «KDS» كلۋبىنا بۇيىرسا، ۇزدىك ۇشتىككە «Roller» كلۋبىنىڭ ورەندەرى ورنىقتى.

ءتۋرنيردىڭ سالتاناتتى اشىلۋ راسىمىندە ىلە اۋداندىق ءماسليحاتىنىڭ حاتشىسى روزا ءابىلوۆا جانە الماتى وبلىستىق ءماسليحاتىنىڭ دەپۋتاتى، ىلە اۋداندىق كاسىپكەرلەر اسسوتسياتسياسىنىڭ ءتورايىمى جاننا تەلپەكباەۆا، «نۇر وتان» پارتياسى ىلە اۋداندىق فيليالى توراعاسىنىڭ ءبىرىنشى ورىنباسارى ەربولات تۇرىمبەتوۆ  قۇتتىقتاۋ سوزدەرىن ايتىپ، جەڭىمپازدار مەن جۇلدەگەرلەردى ماراپاتتادى.

– «نۇر وتان» پارتياسىنىڭ ىلە اۋداندىق فيليالى  توراعاسىنىڭ ءبىرىنشى ورىنباسارى ەربولات ساپار ۇلى اۋدانىمىزدا سپورت تۇرلەرىنىڭ قارقىندى دامۋىنا ارقاشان دا قولداۋ كورسەتىپ، دەمەپ جۇرەدى. ءبىزدىڭ «Sagadat batyr» كلۋبىنداعى سپورتشىلاردىڭ الاڭسىز دايىندالۋى ءۇشىن ارنايى ورىن تاۋىپ بەرىپ، ءتۇرلى سايىستارعا قاتىسۋعا دەمەۋشىلەردى تارتىپ، ۇنەمى قولداپ جۇرەدى. وسى حالىقارالىق ءتۋرنيردىڭ جاقسى وتۋىنە ەربولات اعايدىڭ كوپ كومەگى ءتيدى، – دەيدى  نۇرسۇلتان ورىنباساروۆ.

«International Sagadat batyr jiu-jitsu kids cup-2018» تۋرنيرىنە دجيۋ-دجيتسۋدان الەم چەمپيونى جىبەك ق ۇلىمبەتوۆا ەر بالالار اراسىندا كۇش سىناستى. سىناسىپ قانا قويعان جوق، 32 كگ سالماق دارەجەسىندە ءتۋرنيردىڭ جەڭىمپازى اتاندى. نۇرسۇلتان ورىنباساروۆ وسىمەن ءۇشىنشى مارتە ۇيىمداستىرىلعان حالىقارالىق جارىستىڭ جىل سايىن كوكجيەگى كەڭەيىپ، قاتىسۋشىلاردىڭ سانى ارتىپ كەلە جاتقانىن ماقتانىشپەن ايتتى. «قازاقتىڭ باتىر ۇلى، تاۋەلسىز قازاقستاننىڭ ارمياسىن قۇرىپ، قولباسشىلىق ەتكەن ارميا گەنەرالى، حالىق قاھارمانى ساعادات نۇرماعانبەتوۆ اتامىزدىڭ ايبىنى مەن باتىرلىعىن وسكەلەڭ ۇرپاقتىڭ جادىندا جاڭعىرتۋ ماقساتىندا جۇزەگە اسقان شاراعا قاتىسقان بارلىق سپورتشىلار  مەن باپكەرلەرگە العىس ايتامىن»، – دەدى نۇرسۇلتان ورىنباساروۆ.

تاعى ءبىر اقجولتاي اقپار «Sagadat batyr» سپورت كلۋبىنىڭ ورەندەرى رەسپۋبليكالىق جانە حالىقارالىق تۋرنيرلەردىڭ جۇلدەگەرى اتانىپ، سپورت شەبەرلىگىنە ۇمىتكەر دارەجەسىن الدى.

ق.راحمەت،

وتەگەن باتىر كەنتى،

ىلە اۋدانى،

الماتى وبلىسى