• Қазақ
  •   
  • Qazaq
  •   
  • قازاق
  •   
  • Рус
  •   

    Kókbastaýda kókke qyrandar samǵady

    Kókbastaý ıppodromynda «Saıatshylyq» ulttyq sport túrlerinen «Sonar – 2018» halyqaralyq jarysy ótti. Birneshe oblystan búrkit, qarshyǵa, ıtelgilerin ala kelgen qusbegiler qus salýdan básekege tústi. Jarysqa Italııa, Ispanııa, Vengrııa, Reseı, Mońǵolııadan da osy ónerge den qoıǵandar qatysty.

    Bul dástúrli jarys túri negizinen Eńbekshiqazaq aýdanynda ótip kelse, bıyl aqyndar men batyrlar elinde uıymdastyryldy. «Qansonarda búrkitshi shyǵady ańǵa, tastan túlki tabylar ańdyǵanǵa», dep Abaı aqyn jyrlaǵan ultymyzdyń qanyna sińgen kóne dástúrdiń qyzyǵyn bul joly Jambyl jurtshylyǵy tamashalady. Ata dástúrdi ulyqtaý maqsatyndaǵy shara Tuńǵysh Prezıdent kúnine arnalǵan jáne Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasy aıasynda ótkizildi. Jylda tamyz aıynyń sońynda Konstıtýııa kúnine oraı Prezıdent Kýbogy úshin ulttyq at sporty túrlerinen tulparlar dodasy ótetin Kókbastaý jazyǵyna alystan at arytyp kelgender jalpy sany 70-ten asa qyrannyń babyn synady. Onyń ishinde 53 búrkit, 7 qarshyǵa, onnan asa ıtelgi Kókbastaý aspanynda kezek-kezek qyzyqtaldy.

    Jarystyń ashylý saltanatyndaǵy quttyqtaý sózderinde oblystyq deneshynyqtyrý jáne sport basqarmasynyń basshysy Nurbaqyt Teńizbaev, «Qyran» federaııasy qoǵamdyq qorynyń atqarýshy dırektory Baǵdat Múptekeqyzy, aýdan ákimi apparatynyń basshysy Abzal Nurpeıisov, «Saıatshylyq» Ulttyq sport túrlerinen Qazaqstan Respýblıkasynyń bas jattyqtyrýshysy Kúntýǵan Bazarbek qazaqtyń jeti qazynasynyń biri qyran qusty halqymyz ejelden janyna jaqyn etkenin, Uly Dala elindegi saıatshylyqtyń tarıhy úsh myń jylǵa ketetinin, sol dástúrdi jańǵyrtyp, jastarǵa salamatty ómir saltyn nasıhattap, ulttyń asyl murasy – qusbegilikti álemdik deńgeıge kóterýdi atap ótti. Búrkitbaı aqsaqal kópshilikke aq batasyn berdi. Shyǵys Qazaqstan oblysy Úrjar aýdanynan atbegi, qusbegi Táttimbet Kápuly at baptap, qyran ushyrǵan qazaqy qasıet týraly rýhty óleń oqydy.

    Saıatshylar búrkittiń tomaǵasyn sypyryp jiberip, qoıanǵa, túlkige saldy, qolǵa qondyrýdan sheberlikterin baıqasty. Qarshyǵany kepterge salyp, ıtelgini dalbaıǵa oınatýdan saıysqa tústi. Kútip-baptalǵan qyrandardyń ushqyrlyǵy, ań-qusqa túsý eptiligi, keskin-kelbeti tabıǵat aıasynda tóreshiler synyna salyndy. Tazy ertip, qus salyp júrgenderdiń kıim úlgileri qaraǵan kózdi toıdyrarlyqtaı kelisti boldy. Qyrany qyraǵylyq tanytqandar iriktele kele, fınalda úzdikteri belgili boldy. Jarys jeńimpazdary qustyń úsh túri boıynsha anyqtaldy.

    Úsh kúnge sozylǵan jarystyń qorytyndysy boıynsha búrkit salýdan Shyǵys Qazaqstan oblysynan kelgen Nuǵym О́mirbek jeńimpaz atandy. Ekinshi orynǵa Almaty oblysynan Áben Dýlat, úshinshi orynǵa Jambyl oblysynyń búrkitshisi Babajan Baqdáýlet, tórtinshi  orynǵa Almaty oblysynyń azamaty Seıitjan Almas, besinshi orynǵa Túrkistan oblysynan Ulan Tólemyrza ıe boldy. Qarshyǵa salý boıynsha birinshi oryndy Jetisý óńiriniń sportshysy Atyǵaı Erasyl jeńip alsa, ekinshi oryndy túrkistandyq Mahmuthan Zákı, úshinshi oryndy Taraz óńirinen Babajan Berikbolsyn oljalady. Itelgi boıynsha birinshi oryndy Almaty qalasynan Rýslan Abyl alsa, ekinshi oryndy Jambyl oblysynan Serikbolsyn Jalǵasuly, úshinshi oryndy Almaty oblysynyń sportshysy Medet Sharıpov ıelendi. Qusymen mereıi ústem bolǵan jeńimpazdarǵa Kýboktar, Dıplomdar, medaldar men aqshalaı syılyqtar tapsyryldy.

    Jarystyń tıisti deńgeıde ótkizilýine Jambyl, Qarasaı jáne Ile aýdandarynyń ákimdikteri men sport bólimderi atsalysty.

    Rıshad TURǴANBAI,

    Jambyl oblysy

     

    Pikir jazý

    Your email address will not be published. Required fields are marked *

    *