• Қазақ
  •   
  • Qazaq
  •   
  • قازاق
  •   
  • Рус
  •   

    استانادا شارشى الاڭعا شويىن جۇدىرىقتى جىگىتتەر شىعادى

    بۇگىن استاناداعى ورتالىق كوممۋنيكاتسيالار قىزمەتىندە «قازاقستان» كورپوراتسياسىنىڭ ۇيىمداستىرۋىمەن «Astana arlans» كۋبوگىنىڭ كورسەتىلىمىنە بايلانىستى بريفينگ ءوتتى.

    وعان «Qazsport»  تەلەارناسىنىڭ ديرەكتورى پاۆەل تسىبۋلين، بوكستان وليمپيادا چەمپيونى باقتيار ارتاەۆ پەن وليمپيادانىڭ قولا جۇلدەگەرى قانات يسلام قاتىستى.

    جيىندا «Qazsport» تەلەارناسىنىڭ باسشىسى سپورت ارناسىنىڭ  وتانداستارىمىزدى ۇنەمى  قولداپ كەلەتىنىن،  گەننادي گولوۆكين، قانات يسلام، فيرۋزا شاريپوۆا، بەيبىت شۇمەنوۆ پەن باسقا دا مىقتى بوكسشىلارىمىزدىڭ جەكپە-جەكتەرىن، سونداي-اق، ەلىمىزدەگى جارىستار مەن حالىقارالىق تۋرنيرلاردى تۇراقتى تۇردە ارنادان كورسەتىپ جاتقانىن ايتتى. «ەندى مىنە، 16 جەلتوقساندا «Astana Arlans» كۋبوگىن كورسەتەمىز. بۇل جارىستى سول كۇنى ساعات 23:00-دە «Qazsport»  ارناسى  كورە الاسىزدار»، — دەدى ول.

    وسى كۇنى استانا قالاسىنداعى «داۋلەت» سپورت كەشەنىندە «QAZAQ promotions» پروموۋتەرلىك كومپانياسىنىڭ ۇيىمداستىرۋىمەن كاسىپقوي بوكس كەشى وتەدى. وعان ايدار شارىباەۆ، اسحات ءۋاليحانوۆ، ابىلايحان قۇسايىنوۆ، ەلشات نىعىمەتوللا ۇلى مەن رۋسلان مىرساتاەۆ قاتىسادى.

    بريفينگتە قانات يسلام «Astana Arlans» ءتۋرنيرىنىڭ نەگىزگى ماقساتىنا توقتالدى. ول جارىستىڭ ماقساتى – ەلىمىزدە كاسىپقوي بوكستى دامىتۋ ەكەنىن ايتا كەلىپ، قازىر ءبىزدىڭ ەلدە اۋەسقوي بوكستان ەل بىرىنشىلىگىنىڭ وزىنە ەكى جۇزدەي بوكسشىنىڭ قاتىساتىنىن، ونىڭ جيىرما شاقتىسى عانا قۇراماعا ىلىكسە، سونىڭ بىرەۋى عانا وليمپياداعا باراتىنىن ايتتى. «ءبىزدىڭ ەلدە اۋەسقوي بوكس جاقسى دامىعان. ونىڭ وزىندىك جولى، مەكتەبى بار. ءبىر وكىنىشتىسى، بالالاردىڭ ءبارى جارىستارعا قاتىسىپ، قۇراماعا ىلىكپەي قالادى. قازاقستان چەمپيوناتىنا قاتىسپايتىندارى قانشاما. بىزدە ءار وبلىستا بەس-التى مىڭ بالا بوكسقا بارادى. ال امەريكا ەلدەرىندە اۋەسقوي بوكس تا كاسىپقوي بوكس تا جاقسى دامىعان. سوندىقتان ول جاقتا ۇلتتىق قۇراماعا ىلىكپەگەن بوكسشىلار بوس جۇرمەيدى. ءبىز قازاقتىڭ جىگىتتەرىنە امەريكاداعىداي كاسىپقوي بوكسقا جول اشقىمىز كەلەدى»،دەدى ول.

    وسىعان بايلانىستى باقتيار ارتاەۆ تا تۋرنير تۋرالى تولىعىراق مالىمەت بەردى. ول قازاق جىگىتتەرىنىڭ اراسىندا كۇش-جىگەرى تاسىعان، الدىنا ماقسات قويعان بوكسشىلاردىڭ كوپ ەكەنىن، سولاردىڭ ارمانىن ورىنداۋ ءۇشىن وسى بوكس كەشىن ۇيىمداستىرىپ جاتقانىن، كەشتە سپورتشىلار ءار ءتۇرلى سالماق دارەجەسىندە شارشى الاڭعا شىعاتىنىن، سونىڭ ىشىندە جاسى 60-تان اسقان ەكى ادامنىڭ دا بولاتىنىن ايتتى.

    جەڭىمپازدار «Astana» پرەزيدەنتتىك كاسىبي سپورت كلۋبىنىڭ  ارنايى سىيلىعى جانە كۋبوگىمەن، «ءتۋرنيردىڭ ەڭ مىقتى بوكسشىسى»، «جەڭىسكە دەگەن ەرىك ءۇشىن» — «Astana Arlans» كۋبوگى، «كورەرمەندەر كوزايىمى» — «Astana Arlans» كۋبوگى   اتالىمدارى بويىنشا ماراپاتتالادى.

    «Astana arlans» كۋبوگىنىڭ جەڭىمپازدارىن ەلىمىزدىڭ  تانىمال سپورتشىلارى، وليمپيادا چەمپيوندارى باقتيار ارتاەۆ، سەرىك ساپيەۆ، دانيار ەلەۋسىنوۆ، وليمپيادانىڭ ەكى دۇركىن كۇمىس جۇلدەگەرى بولات ءجۇمادىلوۆ، قولا مەداليسى قانات يسلام، مەرەي اقشالوۆ پەن  قانات ءابۋتالىپوۆ ماراپاتتايتىن بولادى.

    راقىمجان كەمەل،

     استانا

    پىكىر جازۋ

    Your email address will not be published. Required fields are marked *

    *