سەمەيدە حالىق قاھارمانىنا قۇرمەت كورسەتىلدى

جىل سايىن تاۋەلسىزدىك مەرەكەسىندە سەمەيدىڭ سپورت اكادەمياسىنىڭ ۇيىمداستىرۋىمەن ەلىمىزدىڭ ەندى بۋىنى بەكىپ كەلە جاتقان جاس بالۋاندارىنىڭ باسىن قوساتىن جارىس وتەدى.

ولاي دەيتىنىمىز، سەمەي سپورت اكادەمياسىندا دزيۋدو كۇرەسىنەن حالىق قاھارمانى قايرات رىسقۇلبەكوۆ اتىنداعى تۋرنير وتكىزۋ ءداستۇرى قالىپتاسقان. بيىل دا بىلگەننەن جاڭىلماي، مەرەكە كۇنى سەمەي تورىنە كىلەم توسەلدى. مۇزدا جانعان الاۋ قايراتتىڭ قۇرمەتىنە ارنالعان رەسپۋبليكالىق اشىق تۋرنيردە ون سەگىز بەن جيىرما جاستاعى قىز – جىگىتتەر جان الىسىپ، جان بەرىستى. ايتپاقشى، بۇل جارىس تۇڭعىش رەت رەسپۋبليكالىق دەڭگەيدە ۇيىمداستىرىلىپ، ءباسى جوعارى بايراقتى باسەكەلەردىڭ قاتارىنا قوسىلعانىن ايتا كەتۋ ءلازىم. سوندىقتان بيىلعى جارىس بۇرىنعى جارىستاردان وزگەرەك. استانا مەن الماتى قالالارىنان، الماتى، قاراعاندى، قىزىلوردا، پاۆلودار جانە شىعىس قازاقستان وبلىستارىنىڭ كوماندالارىنان جينالعان 160-قا تارتا ۇلدار مەن قىزدار 9 سالماقتا سىنعا ءتۇستى.

— ءاربىر ەلدىڭ جىلناماسىندا ونىڭ جاڭا تاريحىنىڭ باستاۋى بولعان تاعدىرشەشتى تاڭدارى بولادى عوي. ءبىز ءۇشىن جاڭا ءداۋىردىڭ ارايلى تاڭى 1991 جىلدىڭ 16 جەلتوقسانىندا اتتى. مىنە، بيىل رۋحى اسقاق، تۇعىرى بيىك ەلىمىزدىڭ تاۋەلسىزدىگىن جاريالاعانىنا 27 جىل تولدى. ءبىز بابالارىمىزدىڭ جۇرەكپەن قالاعان تاۋەلسىزدىگىن كوزبەن كوردىك. ۇلى دالانىڭ ۇلىق مەرەكەسىندە سەمەي سپورت اكادەمياسىنىڭ ۇيىمداستىرۋىمەن دزيۋدو كۇرەسىنەن 1998 – 2000 جىلى تۋعان جاسوسپىرىمدەر اراسىندا حالىق قاھارمانى قايرات رىسقۇلبەكوۆ اتىنداعى رەسپۋبليكالىق اشىق ءتۋرنيردى وتكىزۋدى داستۇرگە اينالدىرعان ەدىك. بۇگىنگى جاس ۇرپاق قايراتتىڭ، ءلاززاتتىڭ، ەربولدىڭ ەرلىكتەرىن ۇمىتپاۋى ءتيىس. ءبىز ەلدىكتىڭ، ەگەمەندىكتىڭ جولىندا جانىن قۇربان ەتكەن باتىرلاردى ەسكە الا وتىرىپ، بۇگىنگى بۋىنعا پاتريوتتىق تاربيە بەرە الامىز، – دەيدى جارىستىڭ وتۋىنە نەگىزگى باستاماشى بولعان ازامات قازاقستان رەسپۋبليكاسىنا ەڭبەك سىڭىرگەن جاتتىقتىرۋشى، سەمەي سپورت اكادەمياسىنىڭ ديرەكتورى مەرەيعالى كوشكىنوۆ.

البەتتە، جارىس بولعان سوڭ باق پەن باپتىڭ قاتار شاپقانى كەرەك. بالعىن بالۋانداردىڭ اياق الىسى، بوز كىلەمدەگى قيمىلى، ايلا – تاسىلگە ۇشقىرلىعى قانداي، بەلدەسۋلەرگە باپكەرلەردىڭ كوڭىلى تولا ما، جاڭا ەسىمدەر ەستي الامىز با دەگەن ماقساتپەن سەمەي سپورت اكادەمياسىنىڭ دزيۋدو ءبولىمىنىڭ جوعارى دارەجەدەگى اعا جاتتىقتىرۋشىسى ەرجان جانتاسوۆپەن پىكىرلەستىك.

– قايرات رىسقۇلبەكوۆ اتىنداعى اشىق ءتۋرنيردى قازاقستان رەسپۋبليكاسى دزيۋدو فەدەراتسياسىنىڭ كۇنتىزبەلىك جوسپارىنا ەنگەن ەل كولەمىندەگى جىلدى قورىتىندىلايتىن سوڭعى جارىستاردىڭ ءبىرى دەپ ايتۋعا بولادى. بويىندا نامىسى بار بالۋان بوز كىلەمگە جەڭەمىن دەپ شىعادى عوي. جارىس جولىنا شىققانداردىڭ دايارلىعى، دايىندىعى جاقسى ەكەن. كوبىنىڭ ەسىمدەرى ەلدىڭ اۋىزىنا ىلىگە باستاعاندار. جاتتىقتىرۋشى رەتىندە ايتارىم، مۇنداي جارىستار تاجىريبە جيناۋعا ۇلكەن مۇمكىندىك بەرەدى. دزيۋدو شاپشاڭدىقتى تالاپ ەتەتىن كۇرەستىڭ ءتۇرى. ەلدوستىڭ، جانسايدىڭ، عۇمار مەن عۇسماننىڭ، ەراسىلدىڭ ءىزباسارلارى وسى جەردە بەلدەسىپ جاتقانىنا بەك سەنىمدىمىن، – دەيدى ەرجان جانتاسوۆ باپكەر.

سونىمەن باعى جانعاندار، بابى كەلىسكەندەر توپ جاردى. ەرلان وڭالوۆ، نۇرجان ابەت، راۋان بەگالى، قۋان بارىس، ەرزات ارعىنوۆ، تەمىرجان قۇلباەۆ، ءىزباسار ەراليەۆ، دارىن بەيىسحانوۆتار ءوز سالماعىندا جەڭىمپاز اتاندى. قىزدار اراسىندا ايسۇلۋ ورىنعازىقىزى، جانسايا احمەتبەكوۆا، رىسالدى اقشايىقوۆا، زارينا ساريپوۆا، نۇرجاز سابيوللا جەڭىستىڭ بيىك تۇعىرىنا كوتەرىلدى.

سەمەي سپورت اكادەمياسىنىڭ ءباسپاسوز قىزمەتى     

شىعىس قازاقستان وبلىسى،

 سەمەي قالاسى