سەمەيدە تاەكۆوندو شەبەرلەرى جىلدى قورىتىندىلادى

مەملەكەت باسشىسى نۇرسۇلتان نازارباەۆتىڭ ۇسىنىسىمەن بيىلعى جىل «جاستار جىلى» بولىپ جاريالانعانى بەلگىلى. سەمەي قالاسىندا «جاستار جىلى» اياسىندا اۋقىمدى دەڭگەيدەگى ءىس-شارالار وتكىزۋ جوسپارلانۋدا.

«جاستار جىلى» اياسىندا شىعىس قازاقستان وبلىسىنىڭ تاەكۆوندو فەدەراتسياسى وتكەن جىلدى قورىتىندىلادى. جىل جەتىستىكتەرىن جىپكە تىزگەن جيىن سالتاناتتى جاعدايدا ءوتىپ، ۇزدىك سپورتشىلار مەن ۇزدىك جاتتىقتىرۋشىلار ماراپاتتالدى. ءوڭىر تاەكۆوندوشىلارىنىڭ باسقوسۋىنا سەمەي قالاسى اكىمىنىڭ ورىنباسارى نادەجدا شاروۆا قاتىستى.

قازاق توپىراعى شىعىس جەكپە – جەگىنىڭ ەڭ تانىمال ءتۇرى تاەكۆوندو ونەرىن مۇستافا وزتۇرىك ارقىلى ءبىلدى. 90-شى جىلداردىڭ باسىندا ەلىمىزدە دامي باستاعان سپورتتىڭ وسى ءتۇرى بۇگىندە قاناتىن كەڭگە جايعان. وعان دالەل ءبىر عانا شىعىس قازاقستان وبلىسىنداعى تاەكۆوندو فەدەراتسياسىن ايتۋعا بولادى. قازىرگى تاڭدا فەدەراتسيادا 20-عا جۋىق باپكەر بولسا، 600-گە جۋىق سپورتشى وسى سپورتتىڭ تۇرىمەن كاسىبي تۇردە اينالىسادى.

«2018 جىل فەدەراتسيا ءۇشىن جەمىستى جىل بولدى»، – دەيدى شقو تاەكۆوندو فەدەراتسياسىنىڭ پرەزيدەنتى ماحاببات سوۆەتحان. ونىڭ ايتۋىنشا، وتكەن جىلى فەدەراتسيا جاتتىقتىرۋشىلارى 3 حالىقارالىق دارەجەدەگى سپورت شەبەرىن، 13 سپورت شەبەرىن جانە 14 سپورت شەبىرىنە ۇمىتكەرلەر دايىنداعان. شىعىستىڭ تاەكۆوندوشىلارى  شىمكەنت، الماتى، قاراعاندى، ەكىباستۇز قالالارىندا وتكەن حالىقارالىق جارىستاردا جاقسى ونەر كورسەتكەن. بۇدان بولەك، حالىقارالىق دەڭگەيدەگى جارىستاردا دا شقو تاەكۆوندو فەدەراتسياسىنىڭ سپورتشىلارى توپ جارعان. اتاپ ايتقاندا، موڭعوليانىڭ ۇلان – باتىر قالاسىندا وتكەن ازيا چەمپيوناتىندا، بەلارۋس استاناسى مينسك قالاسىندا وتكەن الەم كۋبوگىندا دايانگ شەبەرلەرى قۇرمەت تۇعىرىنان كورىنگەن.

قورىتىندى جيىندا تاەكۆوندو الىپپەسىن ەندى اشقان كىشكەنتاي سپورتشىلارىنا دا قولداۋ كورسەتىپ، گراموتالار تابىس ەتتى. ويتكەنى ولار دا ەرتەڭ ءدۇبىرلى جارىستاردا شىعىستىڭ نامىسىن قورعايتىن مىقتى سپورتشىلارعا اينالاتىنى ءسوزسىز. وعان فەدەراتسيا باپكەرلەرى بەك سەنىمدى.

 ە.جانات،

 سەمەي