سەمەيدە سامبودان ەل چەمپيوناتىنا جولداما بەرىلدى

سەمەي قالاسىندا سامبو كۇرەسىنەن ەرلەر مەن ايەلدەر اراسىندا، جاۋىنگەرلىك سامبو كۇرەسىنەن ەرلەر اراسىندا شىعىس قازاقستان وبلىسىنىڭ چەمپيوناتى ءوتتى، دەپ حابارلادى سەمەي سپورت اكادەمياسىنىڭ ءباسپاسوز قىزمەتى.

شىعىس وڭىرىندە سامبو كۇرەسىنەن وتەتىن جارىستاردىڭ نەگىزگى ۇيىمداستىرۋشىلارى – سەمەي قالاسى بويىنشا №1 شىعىس قازاقستان وبلىستىق وليمپياداعا رەزەرۆتى دايىندايتىن مامانداندىرىلعان بالالار جانە جاسوسپىرىمدەر سپورت مەكتەبى (سەمەي سپورت اكادەمياسى) مەن شىعىس قازاقستان وبلىستىق «سپورتتىق جانە جاۋىنگەرلىك سامبو» فەدەراتسياسى» قوعامدىق بىرلەستىگى.

بۇل جولى دا قوس ۇجىم بىلگەنىنەن جاڭىلمادى. جىلداعى ءداستۇر بويىنشا جارىستى جاقسى وتكىزدى. 160-قا جۋىق سامبو شەبەرىنىڭ باسىن قوسقان دودادا ەرلەر مەن ايەلدەر 9 سالماقتا باقتارىن سىناسا، جاۋىنگەرلىك سامبوعا سايلانىپ كەلگەندەر دە وسى سالماقتاردا سىنعا ءتۇستى. ايتا كەتەيىك، وبلىستىق چەمپيونات شىعىس قازاقستان وبلىستىق دەنە شىنىقتىرۋ جانە سپورت باسقارماسىنىڭ كۇنتىزبەلىك جوسپارىنا ساي وتكىزىلىپ وتىر. ءۇرجار، اياگوز، تارباعاتاي، كوكپەكتى، اباي اۋداندارى، كۋرچاتوۆ پەن وسكەمەن جانە سەمەي قالالارىنان جينالعان بالۋاندار بوز كىلەمدە ايلا-تاسىلدەرى، شالت قيمىلدارى، شاپشاڭ ادىستەرىمەن جەڭىسكە جەتۋدىڭ جولىن ىزدەدى. ويتكەنى، بۇل بەلدەسۋدە ءبىرىنشى جانە ەكىنشى ورىن العان سپورتشىلار ەل چەمپيوناتىنا جولداما الادى. ەل چەمپيوناتى بۇيىرسا 4-8 ءساۋىر كۇندەرى سەمەيدە وتەدى دەپ جوسپارلانۋدا.

–جارىستىڭ دەڭگەيىنىڭ جىل ساناپ ءوسىپ كەلە جاتقانى قۋانتادى. وعان بالۋانداردىڭ تىڭعىلىقتى دايىنداعى دالەل بولا الادى. جالپى، سەمەي قالاسىندا سامبو كۇرەسى جاقسى دامىپ كەلەدى. وبلىستىق جارىستىڭ وزىنە سەمەي قالاسى بويىنشا №1 شىعىس قازاقستان وبلىستىق وليمپياداعا رەزەرۆتى دايىندايتىن مامانداندىرىلعان بالالار جانە جاسوسپىرىمدەر سپورت مەكتەبى، جوعارعى سپورت شەبەرلىك مەكتەبى، سپورت كوللەدجى، قازاق جەكپە-جەك فەدەراتسياسى، «شىعىس» وڭىرلىك اسكەري قولباسشىلىعىنا قاراستى ارمياشىلاردىڭ ورتالىق سپورت كلۋبىنىڭ سپورتشىلارى قاتىسىپ وتىر. وعان سامبو كۇرەسى قارقىندى دامىعان اۋدانداردى قوسىڭىز. بۇل ىشكى باسەكەلەستىكتىڭ ارتىپ كەلە جاتقانىن كورسەتەدى. باسەكەلىستىك بار جەردە ناتيجە دە بولادى ال ناتيجە بار جەردە جەڭىستىڭ بيىك تۇعىرى تۇر، – دەيدى سامبو كۇرەسىنەن شىعىس قازاقستان وبلىسى بويىنشا اعا جاتتىقتىرۋشىسى ءارى جارىستىڭ باس تورەشىسى ءبىرجان يماحانوۆ.

سونىمەن وبلىس بىرىنشىلىگىندە سەمەي قالاسى بويىنشا №1 شىعىس قازاقستان وبلىستىق وليمپياداعا رەزەرۆتى دايىندايتىن مامانداندىرىلعان بالالار جانە جاسوسپىرىمدەر سپورت مەكتەبى، ياعني سەمەي سپورت اكادەمياسىنىڭ سامبوشىلارىنىڭ مەرەيلەرى ۇستەم بولدى. ەرلەر اراسىندا 9 سالماقتىڭ 8-ىندە اكادەميا سپورتشىلارى توپ جاردى. ءتىپتى بىرقاتار سالماقتاردا سپورت اكادەمياسىنىڭ سامبوشىلارى فينالدىق باسەكەدە بەلدەسىپ جاتتى. ەندى فينالدا بەلدەسكەن بالۋاندار كوكتەمدە وبلىستىڭ نامىسىن ابىرويمەن قورعايتىنىنا سەنىم مول.

سەمەي