بوكس كەشىنە بيلەتتەر ساتىلىمعا ءتۇستى

24 ناۋرىز كۇنى Almaty Arena سپورت كەشەنىندە ۇلكەن بوكس كەشى بولادى. وسى كۇنى كەشكىسىن الماتىلىقتار مەن قالا قوناقتارى كاسىپقوي بوكسشىلاردىڭ  جەكپە-جەكتەرىن تاماشالايدى.

قازىر وسى سىنعا بيلەتتەردى بوكس دەسە ىشكەن اسىن جەرگە قوياتىن جانكۇيەرلەر Ticketon.kz، Zakazbiletov.kz، Kassir.kz سايتتارىنان جانە Almaty Arena سپورت كەشەنىنىڭ كاسساسىنان ساتىپ الىپ جاتىر.  ال 24 ناۋرىزدا شارشى الاڭعا ايدوس ەربوسىن ۇلى، سادريددين احمەتوۆ، نۇرسۇلتان جاڭاباەۆ، داستان سادۋ ۇلى، يسكاندەر حارسان، اسقات جانتۇرسىنوۆ پەن دياس تاستەمىروۆ شىعادى.

وسى كۇنى بوكستىڭ تىسقاققان ماماندارى مەن كانىگى شەبەرلەرى جەكپە-جەكتەردىڭ ەڭ تارتىسى جانە ەڭ قىزىقتىسى ايدوس ەربوسىن ۇلى مەن لۋكاس ندافولۋمنىڭ اراسىندا بولادى دەپ وتىر. ايدوس ءالى ەشكىمگە تىزە بۇگىپ كورمەگەن. ول 10 كەزدەسۋ وتكىزىپ، بارىندە جەڭىسكە جەتكەن. ونىڭ قارسىلاسى دا وڭاي ادام ەمەس. 16 رەت رينگكە كوتەرىلىپ، سونىڭ 15-ءىن ۇتقان. بۇل ايقاستا ايدوس WBO Global، WBC Asia مەن WBA International تيتۋلدارى ءۇشىن قولعاپ تۇيىستىرەدى.

تاعى ءبىر ايتاتىن نارسە، بوكس كەشىن Suleimen Promotions پروموۋتەرلىك كومپانيا مەن  الماتى قالاسىنىڭ اكىمدىگى ۇيىمداستىرىپ وتىر.

مۇنىڭ الدىندا، 22 ناۋرىز كۇنى «دوستىق پلازا» ساۋدا ويىن-ساۋىق ورتالىعىندا بوكسشىلار جاتتىعۋلارىن كورسەتەدى. ول ساعات 13.00-دە باستالادى. كەلەسى كۇنى وسى جەردە ساعات 17.00-دە ءباسپاسوز ءماسليحاتى مەن سالماق ولشەۋ ءراسىمى وتەدى.

بوكس كەشىنىن ءوزى جوعارىدا اتاپ وتكەنىمىزدەي، 24 ناۋرىز كۇنى Almaty Arena سپورت كەشەنىندە ساعات 19.00-دە باستالادى. قىزىقتى جانە تارتىستى جەكپە-جەكتەردەن قالىس قالماڭىزدار.

رۇستەم جۇمان،

الماتى