Boks keshine bıletter satylymǵa tústi

24 naýryz kúni Almaty Arena sport kesheninde úlken boks keshi bolady. Osy kúni keshkisin almatylyqtar men qala qonaqtary kásipqoı boksshylardyń  jekpe-jekterin tamashalaıdy.

Qazir osy synǵa bıletterdi boks dese ishken asyn jerge qoıatyn jankúıerler Ticketon.kz, Zakazbiletov.kz, Kassir.kz saıttarynan jáne Almaty Arena sport kesheniniń kassasynan satyp alyp jatyr.  Al 24 naýryzda sharshy alańǵa Aıdos Erbosynuly, Sadrıddın Ahmetov, Nursultan Jańabaev, Dastan Sadýuly, Iskander Harsan, Asqat Jantursynov pen Dıas Tastemirov shyǵady.

Osy kúni bokstyń tisqaqqan mamandary men kánigi sheberleri jekpe-jekterdiń eń tartysy jáne eń qyzyqtysy Aıdos Erbosynuly men Lýkas Ndafolýmnyń arasynda bolady dep otyr. Aıdos áli eshkimge tize búgip kórmegen. Ol 10 kezdesý ótkizip, bárinde jeńiske jetken. Onyń qarsylasy da ońaı adam emes. 16 ret rıngke kóterilip, sonyń 15-in utqan. Bul aıqasta Aıdos WBO Global, WBC Asia men WBA International tıtýldary úshin qolǵap túıistiredi.

Taǵy bir aıtatyn nárse, boks keshin Suleimen Promotions promoýterlik kompanııa men  Almaty qalasynyń ákimdigi uıymdastyryp otyr.

Munyń aldynda, 22 naýryz kúni «Dostyq Plaza» saýda oıyn-saýyq ortalyǵynda boksshylar jattyǵýlaryn kórsetedi. Ol saǵat 13.00-de bastalady. Kelesi kúni osy jerde saǵat 17.00-de baspasóz máslıhaty men salmaq ólsheý rásimi ótedi.

Boks keshinin ózi joǵaryda atap ótkenimizdeı, 24 naýryz kúni Almaty Arena sport kesheninde saǵat 19.00-de bastalady. Qyzyqty jáne tartysty jekpe-jekterden qalys qalmańyzdar.

Rústem JUMAN,

ALMATY