• Қазақ
  •   
  • Qazaq
  •   
  • قازاق
  •   
  • Рус
  •   

    «فۋتبولدى اعىلشىن تىلىندە ۇيرەتەمىز…»

    بۇگىندە فۋتبول ميلليونداعان، ءتىپتى ميللياردتاعان جانكۇيەردىڭ سۇيىكتى ويىنىنا اينالعان.  ال ونىڭ ءتۇپ تامىرى سوناۋ ەۋروپانىڭ ءبىر شەتىندە جاتقان انگليادان شىققانىن بىلەمىز. بۇل ەلدە فۋتبولدى ۇيرەتۋدىڭ ءادىسناماسى دا مىقتى دامىعان. سوندىقتان جەر-جۇزىندە اعىلشىن ءتىلدى تەڭبىل دوپ ونەرى قاي ەلدە بولسىن جاقسى دامىپ كەلەدى.

    قازىر ەلىمىزدە بالالار مەن جاسوسپىرىمدەرگە سپورتتىڭ وسى ءتۇرىن اعىلشىنشا ۇيرەتىپ جاتقان «ارلاندار» دەگەن كلۋب بار. ول ارىپتەسىمىز فازىلبەك ابساتتار ۇلىنىڭ باستاماسىمەن قۇرىلعان. بۇل كوماندا استانا قالالىق فۋتبول فەدەراتسياسىنىڭ ۇيىمداستىرۋىمەن وتەتىن جارىستارعا قاتىسۋدا. جاقىندا اتالعان كلۋبتىڭ باسشىسىمەن كەزدەسىپ، بالالار فۋتبولى تۋرالى اڭگىمەلەسكەن ەدىك.

    –فازەكە، اعىلشىنداردىڭ ادىستەمەسىن نەگىزگە الىپ، بالالارعا تەڭبىل دوپ ونەرىنىڭ قىر-سىرىن ۇيرەتىپ جاتقانىڭىزدى بىلەمىن. بۇل وتە جاقسى ءىس ەكەن. ەندى وسىنى كەڭىرەك ايتىپ بەرسەڭىز.

    –وسى ىسپەن بىرنەشە جىلدان بەرى اينالىسىپ كەلەمىن.  سەبەبى، وسى كۇنگە دەيىن ەلىمىزدە اعىلشىن تىلىندە فۋتبول ۇيرەتەتىن كوماندانىڭ بار ەكەنىن ەستىمەپپىن. ال استانادا مۇلدەم جوق. سوندىقتان ءبىز بالالار مەن جاسوسپىرىمدەرگە فۋتبولدى اعىلشىنشا ۇيرەتۋ كەرەك دەگەن شەشىمگە كەلدىك. ءبىزدىڭ «ارلاندار» كلۋبىن قۇرعانداعى ماقساتىمىز – شەتەلدىڭ دامىعان ەلدەرىنىڭ كوماندالارىمەن تەرەزەسى تەڭ ويناي الاتىن كلۋب قۇرۋ، سول اتاقتى جاساقتارعا جاس تالانتتاردى وقۋعا جىبەرۋ، الەمدىك دەڭگەيدەگى فۋتبوليست دايىنداۋ. ول ءۇشىن بالالاردى ەۋروپانىڭ بايقاۋلارىنا اپارۋ كەرەك. ال ەگەر شاكىرتىمىز اعىلشىن ءتىلىن ءبىلىپ تۇرسا، وندا ءبىز ونى شەتەلدىك كومانداعا جىبەرە الامىز. سول كەزدە ول  قينالماي ساباعىن جالعاستىرا الادى. سوندا عانا ءبىز قازاق بالالارى اراسىنان مارادونا، مەسسي، رونالدو، رونالدۋ سياقتى فۋتبولشىلاردى شىعارا الامىز. قازىر سول جوسپار بويىنشا جۇمىس ىستەپ جاتىرمىز. پورتۋگاليانىڭ «براگا سپورت» كلۋبىمەن بايلانىس قۇردىق. كەلەسى ايدا براگا كۋبوگىنا قاتىسۋعا شاقىرتۋ الدىق. وزدەرىڭىز فرانتسياداعى قازاق جاستارىنىڭ «پاريج قازاق سپورت» كومانداسىن جاقسى بىلەسىزدەر. بۇل كلۋب پاريج كۋبوگىن ۇتىپ العان. بۇل كوماندا فرانتسيا ليگاسىندا وينايدى. سولارمەن بايلانىس ورناتتىق. تاعى كوپتەگەن ەۋروپانىڭ بەلگىلى كلۋبتارىمەن كەلىسسوزدەر جۇرگىزىلىپ جاتىر.

    –كومانداڭىز استانا بىرىنشىلىگىندە دە وينايدى ەكەن. وعان قاي كەزدەن بەرى قاتىسىپ جاتسىزدار؟

    –بيىلدان باستاپ قاتىسىپ كەلەمىز. ونىڭ ناتيجەلەرىن فۋتبول فەدەراتسياسىنىڭ سايتتارىنان كورۋگە بولادى.

    ءبىز ءالى ەرەسەكتەر كومانداسىن شىعارمادىق. سەبەبى، جاڭا كلۋب بولعان سوڭ الدىمەن بالالار كومانداسىن قۇرۋدان باستادىق.  ءبارى ۋاقىتىمەن بولادى. الداعى كەزدە جاسوسپىرىمدەر ليگاسى، قازاقستاننىڭ ءبىرىنشى جانە پرەمەر-ليگاسىنا قاتىسامىز.

    –ەندى كوپشىلىگىمىزدىڭ كوكەيىمىزدە جۇرگەن مىنا ءبىر سۇراقتى قويعىم كەلەدى. ءبىزدىڭ ەلدە فۋتبولدى دامىتۋعا قانداي كەدەرگىلەر بولىپ تۇر؟

    ء–بىز ءالى فۋتبولدى كەڭەس وداعىنان قالعان ادىسپەن ۇيرەتىپ جاتىرمىز. اعىلشىن تىلىندە ۇيرەتۋگە ءتىل جەتپەيدى. ءبىزدىڭ بىلەتىنىمىز ورىسشا. سوندىقتان ورىس ءتىلىنىڭ اۋماعىنان الىس كەتە المادىق. فۋتبولدىڭ اينالاسىندا تەك قانا ورىستىلدىلەر. ەگەر بالالارىمىزدى فۋتبول كلۋبتارىنا بەرسەك ءتىلى ورىسشا شىعادى. مەنى قاتتى تاڭ قالدىرعانى وسى بولدى. ءىس-قاعازدارى تولىعىمەن كورشى ەلدىڭ مەملەكەتتىك تىلىندە جۇرگىزىلەدى. كلۋبىمىزعا كەلگەن ورىسشا قۇجاتتى مەملەكەتتىك تىلگە اۋدارىپ، تولتىرىپ جىبەرسەك فۋتبولعا ءتيىستى ورگاندار تۇسىنبەي جاتادى. قازىر قۇدايعا شۇكىر ءبىزدىڭ كلۋب بۇل ستەرەوتيپتى بۇزدى. وسىلايشا، مەملەكەتتىك ءتىلىمىزدىڭ قولدانىس اياسىن دامىتۋعا ءوز بەتىمىزشە ۇلەس قوسۋدامىز.

    فۋتبول كلۋبىڭىز قاشان قۇرىلدى؟

    –مەن جاپونيادا ءبىراز ۋاقىت تۇردىم. سودان استاناعا قايتىپ كەلىپ،  بيزنەسپەن اينالىسا باستادىم.  ال كاسىپكەر بولۋ وڭاي ەمەس. شارشايسىڭ، شالدىعاسىن. وسىلاردىڭ بارلىعى جۇيكەگە سالماق سالدى. وسى پسيحولوگيالىق قيىنشىلىقتاردى ارتتا قالدىرۋدىڭ جالعىز جولى دەنەگە سالماق سالۋ دەپ ويلايمىن. كەشكە ۇيگە كەلگەن سوڭ اۋلادا فۋتبول ويناۋدى ادەتكە اينالدىردىم. ءبىراز جەڭىلدەي باستادىم. اۋلاداعى بارلىق بالالارمەن دوس بولدىم. سودان جاز شىقتى. بالالار «جاز بويى ءىشىمىز پىساتىن بولدى» دەپ ءجۇردى. ءبارىنىڭ شەتەل اسىپ دەمالمايتىنى، لاگەرگە بارا المايتىنى بەلگىلى. ىزدەندىم. اۋلا كلۋبتارىنىڭ ليگاسىن تاپتىم. بالالاردى جاز بويى جارىسقا اپارىپ ءجۇردىم. ءبىر ءسات بولسا دا بوس ۋاقىتتارى بولمادى. ءار جەڭىس سايىن داستارحان جاياتىن بولدىق. ءوزىمىزدىڭ داستۇرلەر قالىپتاسا باستادى. وعان كورشى اۋلالار قوسىلدى. سوڭىندا 5-6 اۋلا ءبىر ءۇيدىڭ بالالارىنداي بولىپ شىعا كەلدىك. جارىستان جارىس قويمادىق. قاتىسا بەردىك. ءبىر كۇنى كاسىپقوي فۋتبولشىلاردىڭ تۋرنيرىنە قاتىساتىن بولدىق. بۇل جارىس بىزگە قىزىق بولدى. بارساق، بارلىعى سپورتتىق كيىممەن ءجۇر، دارىگەرلەرى جانىندا. ويىن الدىندا اۋىلدىڭ كىر قوجالاق بالالارىنداي الاباجاق كيىمدەرمەن مۇرىندارىن ءسۇرتىپ قويىپ قاتارعا تۇردىق. ناتيجەسىندە شەتتەرىنەن ۇتىپ شىقتىق. بارلىعى اڭ-تاڭ. سودان فۋتبول كلۋبىن قۇرامىن دەگەن شەشىمگە كەلدىم. ەڭ باستى سەبەپ، وسىنداي تالانتتى بالالاردى تاستاپ كەتۋگە قيمادىم. تالاي مارتە تاستاپ كەتكىم كەلدى. ياعني، اركىم ءوز بەتىنشە كەتە بەرسىن دەدىم. ەش بولمادى. بالالار ءۇيدى جاعالاپ ءجۇرىپ الدى. ولاردى دا ءبىراز سىنادىم. جۇرەگىمە دەيىن جەتكەن نارسە، ول قىستىڭ قاقاعان ايازىندا، – 20 گرادۋس سۋىعىندا مەنى ۇيدەن شىعارىپ الىپ، اۋلاداعى الاڭدا فۋتبول ويناتتىرۋ بولدى. مۇرنىمىزدىڭ ىشىنە مۇز قاتىپ، دەمالا الماي قالعانشا فۋتبول وينادىق. كەش بولسا دا ەسىگىمە تىنىم جوق. كەيدە ءتۇن جارىمدا بالالار جينالىپ كەلىپ «اعاي فۋتبول وينايىقشى» دەگەن كەزدە، بۇل بالالارعا ەشنارسە كەدەرگى بولا المايتىنىن ءتۇسىندىم. ۇرسا دا المايسىڭ. بالالارىم ۇيىقتاپ جاتىر دەگەندى تۇسىنبەيدى. جاسىراتىنى جوق، ءوز باسىم دەنساۋلىق ءۇشىن جۇگىرىپ تەرلەگەنشە عانا وينادىم. ارى قاراي زاۋقىم بولمادى. جاس بار. ءبارى اسەر ەتەدى ەكەن. مەنى سۋىرىپ شىعارعان، بەلدى بايلاتقان بالالار بولدى. بىراق باستاۋىن باستادىق-اۋ، بالالاردىڭ قىزۋى  ەكى-اق جىلعا جەتتى. باستى سەبەپ، فۋتبولداعى ادىلەتسىزدىكتەر بولدى. جەڭىپ تۇرسا دا كوزبە كوز جەڭىلدى ساناعان ويىنداردى وتكىزدىك. ادىلەتسىزدىكتەرگە شىداماي ويىن سوڭى جاپپاي توبەلەس بولعان كەزدەر بولدى. پسيحولوگيالىق تۇرعىدان بالالار سىندى. قولىمنان كەلگەنشە كومەكتەسۋگە تىرىستىم. بىراق بالالارعا جەمقورلىق، ادىلەتسىزدىك دەگەندەردى ءتۇسىندىرۋ ماعان قيىنعا، اۋىرعا سوقتى. ودان قالدى قادام اتتاعان سايىن ماسەلە اقشاعا تىرەلە بەردى. بالالاردىڭ جاعدايى جوق. اقشانىڭ جوقتىعى قاتتى سوققى بولدى. ال مەن باستاپ قويعان سوڭ، ءىستى جارتى جولدان قالدىرۋ ادەتىمدە جوق. العا كەتە بەردىم. بىراق قازاقستانداعى سپورتتىڭ بىلىق شىلىقتارىنا باتا باستادىم. سوسىن شەتەلدىك فۋتبول ۇيىمدارى مەن كلۋبتارىمەن بايلانىس ورناتۋدى كوزدەدىم. وسىلايشا «ارلاندار» فۋتبول كلۋبى قۇرىلدى. بىزبەن بايلانىس ءۇشىن مىنا نومەرگە حابارلاسۋعا بولادى: +77754800035

    –اڭگىمەڭىزگە راحمەت! «ارلاندار» كلۋبى تالاي اسۋلاردان ءوتىپ، بيىك شىڭدارعا شىعا بەرسىن!

    -اڭگىمەلەسكەن داستان كەنجالين

    پىكىر جازۋ

    Your email address will not be published. Required fields are marked *

    *