اقتوبەدە ح بۇكىلقازاقستاندىق جازعى ۋنيۆەرسيادا باستالدى

بۇگىن اقتوبە قالاسىنداعى «مۇز ايدىنى» سپورت كەشەنىندە جاستار جىلىنا ارنالعان ح  بۇكىلقازاقستاندىق ۋنيۆەرسيادانىڭ اشىلۋ سالتاناتى ءوتتى.

بيىل ىرگەتاسى قالانعانىنا 150 جىل تولاتىن اقتوبە مەكەنىنە 60-قا جۋىق جوعارى ءبىلىم وردالارىنىڭ سپورتشىلارى جينالدى.

ۋنيۆەرسيادانى اقتوبە وبلىسىنىڭ اكىمى وڭداسىن ورازالين  قۇتتىقتاۋ سوزىمەن اشىپ، قاتىسۋشىلارعا ساتتىلىك تىلەدى.

قازاقستان رەسپۋبليكاسى ستۋدەنتتەر سپورتى فەدەراتسياسىنىڭ پرەزيدەنتى قايرات زاكيريانوۆ شارانى ءتيىستى دەڭگەيدە وتكىزگەنى ءۇشىن ۇيىمداستىرۋشىلارعا العىس ايتتى.

وسىدان كەيىن ۋنيۆەرسيادا-2019 تۋىن نارتاي قاجەكوۆ (دجيۋ-دجيتسۋدان جازعى ازيا ويىندارىنىڭ جۇلدەگەرى)، يگور ۆورنيكوۆ (دجيۋ-دجيتسۋدان جاستار اراسىنداعى الەم چەمپيوناتىنىڭ جۇلدەگەرى)، مۇحتار ەسەنعوس ۇلى (گرەك-ريم كۇرەسىنەن الەم چەمپيوناتىنىڭ جۇلدەگەرى)، مالايدار بەكسۇلتان (ەركىن كۇرەستەن الەم چەمپيوناتىنىڭ جۇلدەگەرى)، مۇراتبەك ماجيتوۆ (ەركىن كۇرەستەن قازاقستان چەمپيونى) جانە امانكەلدى داستان (پانكراتيوننان ازيا چەمپيوناتىنىڭ جۇلدەگەرى) سەكىلدى اقتوبە سپورتىنىڭ ماقتانىشتارى الىپ شىقتى. ۋنيۆەرسيادانىڭ گيمنى وينالىپ، تۋى كوككە كوتەرىلدى.

ەڭ اسەرلى شىققان ءسات ۋنيۆەرسيادا الاۋىن جاعۋ ءراسىمى بولدى. الاۋدى سۋعا جۇزۋدەن الەم كۋبوگىنىڭ يەگەرى، پارا ازيا ويىندارىنا قاتىسۋشى، «قازاقستاننىڭ 100 جاڭا  ەسىمى»  تىزىمىنە ەنگەن شاحان جولداسپاەۆ الىپ شىعىپ، ستۋدەنتتەر اراسىندا بوكستان الەم چەمپيونى اباي قۋاندىقوۆقا تابىس ەتتى. وسىدان كەيىن دزيۋدو كۇرەسىنەن الەم چەمپيوناتىنىڭ كۇمىس جۇلدەگەرى، بۇكىلالەمدىك ۋنيۆەرسيادانىڭ قولا جۇلدەگەرى، قازاقستانعا ەڭبەك سىڭىرگەن سپورت شەبەرى رۇستەم يبراەۆ الاۋدى جاقتى.

وسىلايشا ح جازعى بۇكىلقازاقستاندىق ۋنيۆەرسيادا ويىندارى باستالدى. سپورتشى-ستۋدەنتتەرگە ساتتىلىك تىلەيمىز!

مۇساعالي تاسقاليەۆ،

«سپورت جۇلدىزدارى» رەسپۋبليكالىق جۋرنالىنىڭ باس رەداكتورى

اقتوبە