• Қазақ
  •   
  • Qazaq
  •   
  • قازاق
  •   
  • Рус
  •   

    الماتىدا اتان جىلىك، ءاپايتوس الىپتار انىقتالدى

    بۇگىنگى تاڭدا ءتول  كۇرەسىمىزدى دامىتۋدا ستۋدەنت جاستاردىڭ قوسىپ جاتقان ۇلەسى زور.

    كەشە اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ شاڭىراعىندا الماتى قالاسى جوو ستۋدەنتتەرىنىڭ اراسىندا قازاق كۇرەسىنەن جەكپە-جەكتەر بولىپ ءوتتى. بۇل جارىس ستۋدەنتتەر اراسىندا شاhارداعى ەڭ مىقتى تۇيە پالۋاندى انىقتاۋعا ارنالعان ەدى.

    بۇل بەلدەسۋلەر  ءبىر جاعىنان جاستاردىڭ ۇلتتىق كۇرەسىمىزدى  دارىپتەپ، قۇرمەتپەن قاراۋىنا باعىشتالسا، ەكىنشى جاعىنان،  ستۋدەنتتەردىڭ سالاۋاتتى ءومىر سالتىنا بەت بۇرۋدى ماقسات ەتىپتى.

    جارىستىڭ سالتاناتتى اشىلۋىندا ءسوز سويلەگەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى، پەداگوگيكا عىلىمدارىنىڭ دوكتورى، پروفەسسور تاحير وسپان ۇلى بالىقباەۆ ايتۋلى بەلدەسۋدىڭ ۇلتتىق كۇرەسىمىزدىڭ دامۋىنا قوسار ۇلەسى ەرەكشە ەكەندىگىنە توقتالىپ، پالۋاندارعا تابىستى جەكپە-جەكتەر تىلەدى. سونىمەن بىرگە قۇرمەتتى قوناقتاردىڭ قاتارىندا ءسوز العان، قازاق كۇرەسى فەدەراتسياسىنىڭ مەملەكەتتىك جاتتىقتىرۋشىسى جەڭىس بيتكوزوۆ پەن وسى ۇيىمنىڭ باس حاتشىسى باقداۋلەت ءسابيتوۆ قازاق كۇرەسىنىڭ بولاشاعىنا جاستاردى كوپ تارتۋ باعىتىندا ۇلكەن جۇمىس جاساپ وتىرعان اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ۇجىمىنا زور العىستارىن جەتكىزدى. ال، قازاق كۇرەسىنىڭ ەلىمىزدە كەڭىنەن ءورىس الۋىنا ولشەۋسىز ۇلەس قوسقان ازاماتتىڭ ءبىرى، قازاق كۇرەسىنىڭ تۇڭعىش پرەزيدەنتى، قازاق كسر-ءىنىڭ ەڭبەك سىڭىرگەن جاتتىقتىرۋشىسى، اباي اتىنداعى ۇپۋ-ءنىڭ دەنەشىنىقتىرۋ جانە سپورت كافەدراسىنىڭ مەڭگەرۋشىسى، پروفەسسور ەرعالي مۇحيتدينوۆتىڭ وسىنداي الاماندى ۇيىمداستىرۋدا ەڭبەگى ەرەن. سوندىقتان دا جارىس شىمىلدىعى اشىلاردا سويلەگەن سوزىندە بەلگىلى كۇرەس مامانى قازاق كۇرەسىنىڭ ستۋدەنتتەر اراسىندا وتكىزۋدىڭ ماڭىزى ايرىقشا ەكەندىگىنە توقتالىپ، پالۋاندارعا ساتتىلىك تىلەدى. سوسىن جەكپە-جەكتەر باستالىپ كەتتى.  راسىمەن دە اباي اتىنداعى ۇپۋ-ءنىڭ الماتى شاhارىندا العاش بولىپ ستۋدەنت جاستاردىڭ اتا كۇرەسىمىزگە ۇلكەن سۇيىسپەنشلىكپەن قاراپ، دامىتۋ باعىتىندا العاشقىلاردىڭ ءبىرى بولىپ وسىنداي  تارتىستى بەلدەسۋلەردى قولعا الىپ ۇيىمداستىرۋى ۇلكەن ماقتاۋعا لايىق دەۋگە بولادى.

    سونىمەن بوزكىلەمدە تۇيە بالۋان اتانۋعا ءۇمىتتى قالاداعى بارلىق جوو ورىندارىنىڭ 30-عا تارتا جاس پالۋاندارى جەڭىس ءۇشىن جان اياماي بەلدەستى. جەڭىس قاشاندا قانداي سپورت ءتۇرى بولماسىن، شىن نيەتىمەن جاتتىعۋدا بارىنشا تەر توككەنگە بۇيىرارى بەلگىلى. بۇل جولى دا سولاي بولدى. سوڭعى فينالدىق كەزدەسۋدە ايتۋلى وقۋ ورنىنىڭ  قوس بىردەي  ستۋدەنتى كەزدەسكەن ەدى. ءبىر وقۋ ورداسىنىڭ ەكى بىردەي ستۋدەنتىنىڭ سوڭعى سىندا جولىعۋىنىڭ ءوزى كەزدەيسوقتىق ەمەس ەدى. ويتكەنى، ەكى بىردەي پالۋان دا قازاق كۇرەسىنەن  الەم چەمپيوناتىنىڭ كۇمىس جۇلدەگەرى، ءتول كۇرەسىمىزدىڭ مايتالمان مامانى  ەركىن سايداقوۆتىڭ قاراماعاندا  جاتتىعادى. سوندىقتان دا ءبىر-ءبىرىنىڭ قيمىل-قوزعالىسىن جاقسى بىلەتىن قوس الىپتىڭ اراسىندا جەڭىمپازدى انىقتاۋ وڭاي بولماسى انىق ەدى. دەگەنمەن دە  ونەر-مادەنيەت جانە سپورت ينستيتۋتىنىڭ  دەنەشىنىقتىرۋ  جانە سپورت فاكۋلتەتىنىڭ 1 كۋرس  ستۋدەنتى 124 كگ سالماعى بار اتاڭجىلىكتى جاس پالۋان ەرسۇلتان جورابەكوۆتىڭ مىسى باسىم بولدى. ويتكەنى، ەرسۇلتان – سامبو كۇرەسىنەن جاسوسپىرىمدەر اراسىندا رەسپۋبليكالىق جارىستىڭ جەڭىمپازى، قازاق كۇرەسىنەن جاستار اراسىنداعى ەل چەمپيونى. سونىمەن قاتار، ول بەلبەۋ كۇرەسىنەن الەم چەمپيوناتىنىڭ  قولا جۇلدەسىن الىپ، جاستار مەن جاسوسپىرىمدەر اراسىندا قازاقستان بىرىنشىلىگىندە تالاي رەت توپ جارعان سپورتشى. وسى جارىستا دا ەرسۇلتاننىڭ جەڭىسكە ءبىر تابان جاقىن ەكەنى بىردەن-اق بىلىنە باستادى. قارسىلاستارىنىڭ بارلىعىن الىپ تا، شالىپ تا جىعىپ، فينالعا شىققان ەرسۇلتاندى بوزكىلەمدە قۇقىق جانە تاريح ينيستۋتىنىڭ زاڭ فاكۋلتەتىنىڭ 1 كۋرس ستۋدەنتى  سالماعى 143 كگ جەتەتىن بۇلان مويىن، قاقپان بەل حامزا نۇرسۇلتان كۇتىپ تۇرعان ەدى. تارتىستى وتكەن بەلدەسۋدىڭ العاشقى مينۋتتارىندا-اق، وڭتايلى ءساتتىڭ بىرىندە  جامباسقا سالىپ لاقتىرعان  كەزدە حامزا شاراسىزدان جەرگە شالقاسىمەن تۇسكەن ەدى. وسىلايشا قارسىلاسىنىڭ جاۋىرىنىن جەرگە تازا قويعان ەرسۇلتان جارىستىڭ تۇيە پالۋانى اتاندى. ءتىل كوزدەن امان بولسا، ەرسۇلتاننىڭ شىعار بيىگى الدا ەكەندىگىنە كوپشىلىكتى كوزى جەتكەندەي بولدى. تالانتتى جاس پالۋان جارىس ۇيىمداستىرۋشىسى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ قولداۋىمەن باس بايگەگە تىگىلگەن قوماقتى قارجىنى قانجىعاسىنا بايلاپ كەتتى. ال، جۇلدەلى 3 ورىندى م.تىنىشباەۆ اتىنداعى  قازاق كولىك جانە كوممۋنيكاتسيا اكادەمياسىنىڭ 2 كۋرس ستۋدەنتى جاپار نۇربول  جەڭىپ الدى.

    ستۋدەنت جاستاردىڭ ۇلتتىق كۇرەسىمىزگە دەگەن سۇيىسپەنشىلىگىن ارتتىرۋ اياسىندا وتكەن بۇل جارىستىڭ بولاشاعى جارقىن. سوندىقتان دا وسى بەلدەسۋدى قالاي وتكىزسەك ەكەن دەپ، جارعاق قۇلاعى جاستىققا تيمەي شاپقىلاپ جۇرگەن اباي اتىنداعى ۇپۋ-ءنىڭ تاربيە جۇمىسى جانە الەۋمەتتىك دامۋ جونىندەگى پرورەكتورى جاناتبەك ىشپەكباەۆ مىرزا جارىس سوڭىندا تۇيە پالۋان ەرسۇلتان جورابەكتى قۇرمەتپەن ماراپاتتاپ، قارجىلاي سىيلىعىن قوشامەتپەن تابىس ەتتى.

    نەگىزى وسىنداي الاماندى وتكىزۋ وڭاي ەمەس ەكەنى كىمگە بولسا بەلگىلى. ءبىز كەي-كەزدە جارىستى تاماشالايمىز دا ونى جاساعان، دۇنيەگە اكەلىپ حالىققا تارتۋ ەتكەن بىلايشا ايتقاندا قارا جۇمىسىنا تەر توككەندەردى ۇمىتىپ جاتامىز. ول دۇرىس ەمەس. ەڭبەك ەش كەتپەي، ارقاشاندا باعالانىپ ايتىلۋى قاجەت. وسىنداي ۇلكەن بايراقتى سىندى وتكىزۋدە، تاربيە، الەۋمەتتىك جۇمىستار جانە جاستار ساياساتى جونىندەگى دەپارتامەنتى مەن  دەنەشىقتىرۋ جانە سپورت كافەداراسىنىڭ ۇجىمىنا، جارىستى تاماشالاعان حالىق العىستارىن اياماي جاۋدىرىپ جاتتى. بۇل دا كوڭىل قۋانتارلىق ءجاي.

    جالپى، بۇل دودانى ۇيىمداستىرۋداعى باستى ماقسات ول ستۋدەنتتەردىڭ اتا كۇرەسىمىزگە دەگەن سۇيىسپەنشىلىگىن وياتۋ، سالاۋاتتى ومىرگە جول سىلتەۋ.  وسىنداي ءدۇبىرلى جارىستاردى قىزىقتاعان جاستاردىڭ ۇلتتىق كۇرەسىمىزگە دەگەن قىزىعۋشىلىعى مىندەتتى تۇردە ارتا تۇسەرى انىق. سوندىقتان الداعى جىلى وتەتىن جارىس بۇدان دا ارتىق تارتىستى ءارى قىزىقتى  وتەتىنىنە سەنىمىمىز زور.

    ەندەشە، اتانجىلىكتى جاس پالۋانداردىڭ الار اسۋلارى ءالى الدا.

     

    اقىن ورداباي ۇلى،

    الماتى

    پىكىر جازۋ

    Your email address will not be published. Required fields are marked *

    *