• Қазақ
  •   
  • Qazaq
  •   
  • قازاق
  •   
  • Рус
  •   

    Eralhan mergen el namysyn qorǵaıdy

    Elordada jamby atýdan I álem chempıonaty ótedi. Elimizde tuńǵysh uıymdastyrylǵan dúnıejúzilik básekede el namysyn qorǵaıtyn bas mergenniń biri – Eralhan Aıkóz. Búgin jankúıerge 2015 jyldan jamby atý jarystarynda úzdik shyqqan jas mergenimizdiń jetistikterin qysqasha tanystyryp ótýdi  jón kórdik.

    Jamby atýdan I álem chempıonaty elorda tórindegi «Han-Shatyr» kesheni mańynda 30 mamyr men 2 maýsym aralyǵynda ótedi. Nur-Sultan qalasy ákimdigi men Ulttyq sport qaýymdastyǵy birlese uıymdastyratyn  «Nur-Sultan Ethno Fest»  merekesi aıasyndaǵy «Altyn jebe» I álem chempıonatynda jıyrmaǵa jýyq memlekettiń qyryqtan  astam aıtýly mergenderi baq synaıdy.

    Árıne, bizdiń elde at ústinen sadaq atýda esimderi jaqsy tanyla bastaǵan mergender az emes. Abzal Týlybekov, Aıtbek Sarybaı, Eldos Badashevtar buǵan deıin respýblıkalyq básekelerde ǵana emes, birneshe halyqaralyq jarystarda júldeli oryndardy ıelendi. 2017 jyly elishilik chempıonatta kúmis júldeni alǵan qaraǵandylyq Talǵat Omarbekov ótken jyly Qazaqstan chempıony atandy.  Bıylǵy jastar arasyndaǵy Qazaqstan chempıonatynda jamby atýdan túrkistandyq Bekzat Jaqsybek  aldyna qara salmady. Qazaqstan chempıonatynda kúmis júldeger bolǵan Baqdáýlet Babajan sáýir aıynda Almatyda ótken jastar arasyndaǵy I Azııa chempıonatyn jeńip aldy.

    Aldaǵy ýaqytta bul mergender  týraly málimetterdi de retimen tanystyratyn bolamyz. Búgingi aqparat   Eralhan mergen jaıly.

    Sýrette: «Altyn jebe» halyqaralyq týrnıriniń eki dúrkin júldegeri, jasóspirimder jáne jastar arasyndaǵy Qazaqstannyń birneshe dúrkin chempıony, jastar arasyndaǵy I Azııa chempıonatynyń kúmis júldegeri Eralhan Aıkóz

    Túrkistan oblysy, Tólebı aýdany, Maıbulaq aýylynda 1999 jyly dúnıege kelgen Eralhan Aıkóz jamby atý sportymen shuǵyldanýdy  2014 jyldan bastap, 16 jasynda   alǵash ret chempıon atandy. Dálirek aıtsaq, 2015 jylǵy jasóspirimder arasyndaǵy Qazaqstan chempıony boldy. Túrkistan oblystyq ulttyq sport mektebiniń shákirti 2017 jyly taǵy da osy jetistikke jetti. Sóıtip, ol jasóspirimder arasyndaǵy Qazaqstan chempıony ataǵyn eki dúrkin ıelendi. Al, 2018 jyly jastar arasyndaǵy el chempıony, 2019 jyly kúmis júldegeri boldy. Sondaı-aq, Eralhan Aıkóz bıylǵy jyly Almatyda ótken jastar arasyndaǵy I Azııa chempıonatynda kúmis júldeni keýdesinde jarqyratty.

    Eralhan halyqaralyq jarystyń dodasynda da shyńdalyp úlgergen mergen. Elordada 2017 jyly tuńǵysh uıymdastyrylǵan «Altyn jebe» halyqaralyq týrnırinde ol qola júldege ıe boldy. Bile bilsek, álemniń aıtýly mergenderi baq synaǵan mundaı iri jarysta 18 jastaǵy jas jigittiń júlde alýy úlken jetistik. Alǵashqy «Altyn jebe» týrnıriniń bas júldesi rýmynııalyq Mıhaı Kozmeıge, kúmis júldesi bizdiń Aıtbek   Sarybaıǵa buıyrǵan edi.

    Sýrette: «Altyn jebe» halyqaralyq týrnıriniń eki dúrkin jeńimpazy rýmynııalyq mergen Mıhaı Kozmeı

    2018 jyly ekinshi márte ótkizilgen «Altyn jebe» halyqaralyq týrnırindegi Eralhannyń sheberligi áli jadymyzda. II «Altyn jebe» týrnırine  jer-júziniń 11 eliniń surmergeni qatysty. Jarys bastalǵannan rýmynııalyq Mıhaı mergen sýyrylyp  alǵa shyqty. Sonda quıǵyta shapqan qalpy bir nysanaǵa qos jebesin darytyp úlgeretin Mıhaımen úsh kezeńde de úzeńgi qaǵystyra alǵan jalǵyz Eralhan ǵana boldy. Tipti, «Túrik stıli» boıynsha ótken básekede Eralhan at ústinen sadaq atýdan álem chempıony, Eýropanyń birneshe dúrkin jeńimpazy Mıhaı Kozmeı men túriktiń ataqty mergeni Alkan Ibrahım Alperennen upaı ozdyryp, birinshi oryndy ıelendi. «Qazaq stılinde» úshinshi orynǵa taban tiredi. Alaıda, «Azııalyq stıl» básekesinde birneshe márte oǵy múlt ketken Eralhan qorytyndy nátıjede II «Altyn jebe» týrnıriniń kúmis júldesin qanjyǵasyna baılady. Jıyny 169, 65 upaı alǵan rýmyndyq surmergen Mıhaı Kozmeı  taǵy da bas júldeni ıelendi. II «Altyn jebe» týrnırinde Eralhan oljalaǵan jıyny 145,97 upaı, eger salystyra qarasaq, sadaq atýmen shırek ǵasyr shuǵyldanǵan Mıhaı mergennen asa kem soǵyp turǵan joq. Mysaly, sol básekede halyqaralyq jarystardyń san márte  chempıony atanǵan, Vengrııada at ústinen sadaq atý mektebin ashqan eń tájirıbeli surmergen Nematı Krıstof Arpad jınaǵan upaı júzden sál ǵana asty. Eske salyp ótsek, bul majarstandyq Nematı Krıstof Arpad 2017 jylǵy  «Altyn jebe» týrnırinde besinshi oryndy ıelengen bolatyn.

    Sondyqtan, elimizde tuńǵysh ótetin álem chempıonatynda buıyrtsa Eralhan mergen úzdik óner kórsetedi degen úmit mol. Biraq, ony ýaqyt kórsetedi. Alda, Qazaqstan chempıonaty tur. Eresekter arasyndaǵy bıylǵy chempıonatqa ár óńirdiń tańdaýly mergenderi mol jınalýda. 19 mamyrda Taraz qalasynda bastalatyn elishilik báseke mamyrdyń 26 kúni aıaqtalady.

     

    Tólegen JÁKITAI

     

     

     

    Pikir jazý

    Your email address will not be published. Required fields are marked *

    *