ەلدوس مەرگەن ەۋروپاعا اتتاندى

كەشە جامبى اتۋدان قازاقستان قۇراما كومانداسىنىڭ بەلدى مۇشەسى، ەلىمىزدەگى ۇزدىك سۇرمەرگەننىڭ ءبىرى ەلدوس باداشەۆ  ەۋروپاعا اتتاندى. ول ات ۇستىنەن ساداق اتۋدان ماجارستاننىڭ پوماز قالاسىندا وتەتىن الەم كۋبوگىنا قاتىسادى، دەپ حابارلادى ۇلتتىق سپورت قاۋىمداستىعى.

بۇگىن ۆەنگريانىڭ پوماز قالاسىندا ۇيىمداستىرىلعان الەمدىك جارىستىڭ العاشقى باسەكەسى باستالدى. دۇنيەجۇزىنىڭ تاڭداۋلى مەرگەندەرى عانا باق سىنايتىن بۇل الەم كۋبوگى ءۇش كەزەڭمەن وتەتىن ءىرى جارىس. العاشقى كەزەڭى ماجارستاننىڭ پوماز قالاسىندا باستالسا، ەكىنشى كەزەڭى ماۋسىم ايىندا فرانتسيادا جالعاسادى. ال، قىركۇيەك ايىنداعى  پولشادا وتەتىن ءۇشىنشى كەزەڭدە وسى الەم كۋبوگىنىڭ گران-پري جۇلدەسى ساراپقا سالىنادى. پومازداعى باسەكەدە الەم مەرگەندەرى  «ۆەنگر ءستيلى» مەن «پولشا ءستيلى» بويىنشا كۇش سىناسادى ەكەن.

مىنە، وسىنداي ايتۋلى دودادا قاتىسۋعا بەل بۋعان ءبىزدىڭ ەلدوس مەرگەننىڭ حالىقارالىق جارىسقا اتتانۋى العاشقى رەت ەمەس. ول بۇعان دەيىن تۇركيا مەن يوردانيادا وتكەن دۇنيەجۇزىلىك فەستيۆالدارعا بىرنەشە مارتە قاتىستى. بىلتىر وڭتۇستىك كورەيادا ات ۇستىنەن ساداق اتۋدان وتكەن الەم چەمپيوناتىندا جەڭىمپاز اتاندى.

ال، ەلدوس باداشەۆتىڭ  ەلىشىلىك جارىستارداعى جەتىستىكتەرى ءتىپتى قوماقتى. جامبى اتۋمەن 2014 جىلدان باستاپ اينالىسقان ول 2015 جىلى «قازاقستان رەسپۋبليكاسىنىڭ سپورت شەبەرى» اتاندى. 2015 جىلى جامبى اتۋدان قازاقستان چەمپيوناتىنىڭ كۇمىس جۇلدەگەرى، 2016 جىلى « ۇلى دالا ويىندارىنىڭ» جانە «استانا جۇلدىزدارى» رەسپۋبليكالىق ءتۋرنيردىڭ جەڭىمپازى بولدى. 2017 جىلى «اق بيداي» اۋىل سپورتى ويىندارىنىڭ كۇمىس جۇلدەسىن يەلەندى.

2016 جىلدان جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى «ۇلتتىق سپورت تۇرلەرىنەن «اۋليە-اتا» كاسىپقوي كلۋبى» كوممۋنالدىق مەملەكەتتىك مەكەمەسىندە جامبى اتۋ سپورتى بويىنشا جاتتىقتىرۋشى قىزمەتىن اتقاردى.

ەلدوستىڭ شاكىرت تاربيەلەۋدە دە جولى بولدى. ەلدوس باداشەۆتىڭ شاكىرتى ابزال تۋلىبەكوۆ ەل چەمپيوناتتارىنىڭ بىرنەشە دۇركىن جۇلدەگەرى، الەم چەمپيونى اتاندى. ال، تاعى ءبىر شاكىرتى  باقداۋلەت باباجان جاستار اراسىندا ەل چەمپيوناتىنىڭ كۇمىس جۇلدەگەرى جانە 2019 جىلى وتكەن جاستار اراسىنداعى ءى ازيا چەمپيوناتىنىڭ چەمپيونى اتاعىن جەڭىپ الدى.  سەرىكبولسىن جالعاس ۇلى جاسوسپىرىمدەر اراسىندا قازاقستان چەمپيونى.

ماجارستاندا ۇيىمداستىرىلعان الەم كۋبوگىنداعى مەرگەندەر ناتيجەلەرى تۋرالى الداعى ۋاقىتتا قوسىمشا حابارلايمىز. اتالمىش جارىس 19 مامىر كۇنى اياقتالادى.