• Қазақ
  •   
  • Qazaq
  •   
  • قازاق
  •   
  • Рус
  •   

    ارمان بالۋان — اۋدارىسپاقتان ازيا چەمپيونى

    بيىلعى قازاقستان چەمپيوناتىنىڭ باستالۋىنا ساناۋلى كۇندەر عانا قالدى. 19 مامىردا تاراز قالاسىندا تۋ كوتەرەتىن ەلىشىلىك چەمپيوناتقا ءار ءوڭىر ءوز ۇزدىكتەرىن ۇكىلەپ قوسۋعا دايار. ءبىر قۋانارلىعى، سوڭعى جىلدارى ۇلتتىق سپورت ۇزدىكتەرىنىڭ قاتارى قالىڭداي  تۇسۋدە. سولاردىڭ ءبىرى – اۋدارىسپاقتان ءىىى ازيا چەمپيوناتىنىڭ ءابسوليۋتتى سالماقتاعى چەمپيونى اتانعان اقتوبەلىك ارمان ساعىنباەۆ. بۇگىن جانكۇيەرگە وسى ارمان بالۋاندى جاقىنىراق تانىستىرۋدى ءجون كوردىك.

    اۋدارىسپاق سپورتىندا اقتوبە وبلىسىنىڭ داڭقى وتكەن جىلى ءبىر دۇركىرەگەن بولاتىن. 2006 جىلدان اقتوبە وبلىسىندا ۇلتتىق سپورتقا جەتەكشىلىك جاساعان تاجىريبەلى باپكەر، قازاقستاننىڭ ەڭبەك سىڭىرگەن جاتتىقتىرۋشىسى  ابات ايماعامبەتوۆتىڭ ءۇش شاكىرتى 2018 جىلعى ەكى بىردەي ءىرى جارىستا بىرىنەن سوڭ ءبىرى سۋىرىلىپ شىقتى. 60 كيلودا سەرعازين ازامات، 70 كگ سالماقتا شىڭعىسحان ەرجانوۆ قازاقستان چەمپيوناتىندا دا، ءىىى ازيا چەمپيوناتىندا دا چەمپيوندىق اتاقتى جەڭىپ الدى. ال، 80 كگ سالماقتاعى ارمان ساعىنباەۆ ءىىى ازيا چەمپيوناتىنىڭ ءابسوليۋتتى سالماقتاعى چەمپيونى اتاندى. اۋدارىسپاقتان 2014 جىلعى جانە 2016 جىلعى ازيا چەمپيوندارى، 4-5 جىل ارالىعىندا وتكەن ءىرى دودانىڭ ەشبىرىندە جەڭىلىپ كورمەگەن ءبىرجان قوساليەۆ پەن سىرىم ءىزباساروۆتان شەبەرلىك اسىرىپ، ازيا جەڭىمپازى بولعان ارمان ساعىنباەۆ سول كەزدە  قالىڭ جانكۇيەردى شىنىمەن دە تاڭ قالدىردى. ەگەر سالماعى بار-جوعى 80 كيلو تارتاتىن ارمان فينالدىق جەكپە-جەكتە وزىنەن وتىز كيلو اۋىر، اۋدارىسپاقتاعى اتاعى جەر جارعان ءبىرجان بالۋانمەن تايسالماي تارتىسىپ، ۇپاي سانىمەن جەڭىپ كەتسە جانكۇيەر بىتكەن قالايشا تاڭدانباسىن؟!

    سۋرەتتە: ءىىى ازيا چەمپيوناتىنىڭ ءابسوليۋتتى سالماقتاعى چەمپيونى ارمان ساعىنباەۆ

    سۋرەتتە: قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى، اقتوبەلىك باپكەر ابات ايماعامبەتوۆ ءىىى ازيا چەمپيونى اتانعان شاكىرتتەرىمەن بىرگە

    سۋرەتتە: اۋدارىسپاق سپورتىنىڭ داڭقتى بالۋاندارى (وڭنان سولعا قاراي) شىڭعىسحان ەرجانوۆ، ءبىرجان قوساليەۆ، سىرىم ءىزباساروۆ، ابسوليۋتتى سالماقتاعى چەمپيون ارمان ساعىنباەۆ، ەسىمحان ءراحماتىللا جانە  ازامات سەرعازين

    ارمان بالۋان – قازاقتىڭ اۋدارىسپاق سپورتىندا وسىلايشا جارقىراپ تانىلعان جاڭا ەسىم. سوندىقتان، ورايى كەلگەندە وقىرمانعا بۇل جىگىتتى جاقىنىراق تانىستىرۋدى ورىندى كوردىك.

    ءبىزدىڭ قولدا بار دەرەككە سۇيەنسەك، ارمان 1995 جىلى اقتوبە قالاسىندا تۋعان.  وتباسىنداعى 5 بالانىڭ ەكىنشىسى. جاستايىنان كۇرەسپەن دە، بوكسپەن دە شۇعىلدانعان. بىراق، 2010 جىلدان باستاپ اۋدارىسپاق سپورتىمەن تۇراقتى اينالىسقان. اۋدارىسپاقتان قر سپورت شەبەرى. قر ۇلتتىق قۇراما كومانداسىنىڭ نەگىزگى مۇشەسى. قازىرگى كەزدە باتىس قازاقستان گۋمانيتارلىق جانە تەحنيكالىق ۋنيۆەرسيتەتىندە دەنە تاربيەسى جانە سپورت ماماندىعى فاكۋلتەتىنىڭ  2 كۋرسىندا وقيدى.

    ال، ارمان بالۋاننىڭ ءبىز بىلەتىن  سپورتتىق جەتىستىكتەرى تومەندەگىدەي. 2012 جىلى  70 كگ سالماقتا جاسوسپىرىمدەر اراسىنداعى جانە جاستار اراسىنداعى قازاقستان چەمپيوناتىنىڭ جۇلدەگەرى  بولدى. 2013 جىلى 80 كيلو سالماقتا ەرەسەكتەر اراسىنداعى ەل چەمپيوناتىنىڭ كۇمىس جۇلدەگەرى اتاندى. 2014 جىلى 80 كيلودا جاستار اراسىنداعى قازاقستان چەمپيونى اتاعىن يەلەنگەن.  سول جىلى ەرەسەكتەر اراسىندا ا.اسقاروۆ اتىنداعى حالىقارالىق ءتۋرنيردىڭ كۇمىس جۇلدەسىن جەڭىپ العان. 2016 جىلى  «استانا جۇلدىزى» رەسپۋبليكالىق ءتۋرنيرىنىڭ فينالىندا ءبىرجان قوساليەۆكە عانا ەسە جىبەرىپ، كۇمىس جۇلدەنى قاناعات تۇتتى. 2015 جىلى اسكەري بورىشىن وتەدى.  2016 جىلى 80 كيلودان اسا سالماقتا جاستار اراسىنداعى ەل چەمپيونى بولدى جانە «التىن تۇعىر» يەگەرى اتاندى.  2017 جىلى «اقبيداي» اۋىل سپورتى ويىندارىنىڭ جۇلدەگەرى بولدى. 2018 جىلى ەلوردا تورىندە وتكەن ءىىى ازيا چەمپيوناتىنىڭ ءابسوليۋتتى سالماقتاعى چەمپيونى اتاعىن يەلەندى.

    ەسكە سالىپ وتسەك، 2014 جىلى استانا قالاسىندا اۋدارىسپاقتان تۇڭعىش ۇيىمداستىرىلعان ازيا چەمپيوناتىنىڭ ءابسوليۋتتى چەمپيونى ءبىرجان قوساليەۆ (تۇركىستان وبلىسى) بولسا، 2016 جىلى قىتايدىڭ ىلە-قازاق اۆتونوميالى وبلىسىندا وتكەن ءىى ازيا چەمپيوناتىنىڭ ءابسوليۋتتى چەمپيونى سىرىم ءىزباساروۆ (تۇركىستان وبلىسى). سونداي-اق، 2017 جىلى اۋدارىسپاق سپورتىنان ەلوردادا وتكەن  حالىقارالىق ءتۋرنيردىڭ ءابسوليۋتتى سالماقتاعى باسەكەسىندە  ءبىرجان قوساليەۆ جەڭىمپاز اتاندى.

     

    تولەگەن جاكىتاي

     

     

     

     

     

     

    پىكىر جازۋ

    Your email address will not be published. Required fields are marked *

    *