قازاق مەرگەندەرىنىڭ قاتارى كوبەيىپ كەلەدى

ات ۇستىنەن ساداق اتۋدان تۇڭعىش ۇيىمداستىرىلعان «التىن جەبە» الەم چەمپيوناتىنىڭ باستالۋىنا ساناۋلى كۇندەر عانا قالدى. قازىرگى كەزدە جارىسقا وننان استام مەملەكەتتىڭ مەرگەندەرىنەن تاپسىرىس ءتۇستى. ال، سوندا وسى دۇنيەجۇزىلىك مەرگەندەر سايىسىنا قاتىساتىن قازاق مەرگەندەرى قاتارىندا كىمدەر بولۋى مۇمكىن؟

«التىن جەبە» اتاۋى الەم مەرگەندەرىنە حالىقارالىق تۋرنير رەتىندە جاقسى تانىس. سەبەبى، 2017 جىلى جانە 2018 جىلى ەلوردا تورىندە «التىن جەبە» جارىسى  حالىقارالىق تۋرنير دەڭگەيىندە ۇيىمداستىرىلدى. العاشقى جىلعى باسەكەدە 11 مەملەكەتتىڭ 19 مەرگەنى، ال،  2018 جىلعى «التىن جەبەدە» 11 ەلدىڭ 25 وكىلى باق سىنادى. قوس ءتۋرنيردىڭ دە باس جۇلدەسىن رۋمىنيالىق سۇرمەرگەن ميحاي كوزمەي جەڭىپ الدى. ءبىرىنشى ءتۋرنيردىڭ كۇمىس مەدالىن ايتبەك سارىباي يەلەنگەن-ءدى. ەكىنشى ءتۋرنيردىڭ قولا جۇلدەسىنە ەرالحان ايكوز، قولا مەدالىنە ابزال تۋلىبەكوۆ قول جەتكىزگەن بولاتىن.

بۇعان دەيىن «التىن جەبە» تۋرنيرىنە تۇركيا، ۆەنگريا، مالايزيا، پولشا، فينليانديا، رۋمىنيا، رەسەي، مونعوليا، وڭتۇستىك افريكا، وڭتۇستىك كورەيا، جاپونيا مەرگەندەرى قاتىسقان ەدى.  اتاعى وسىلايشا كەڭ جايىلعان «التىن جەبەنى» دۇنيەجۇزىلىك جارىس دەڭگەيىنە كوتەرۋ ماقساتىندا ۇلتتىق سپورت قاۋىمداستىعى بيىل جامبى اتۋدان ءى الەم چەمپيوناتىن ۇيىمداستىرۋدى ءجون كوردى. جامبى اتۋدان ءى الەم چەمپيوناتى  مادەنيەت جانە سپورت مينيسترلىگىنىڭ جىلدىق كۇنتىزبەلىك جوسپارىنا سايكەس وتكىزىلۋدە. تۇڭعىش الەم چەمپيوناتىنا شەت مەملەكەتتەردەن ەكى سپورتشىدان، ۇيىمداستىرۋشى ەل تاراپىنان بەس سپورتشىدان قاتىسادى.

سوندا ءى الەم چەمپيوناتىنا قازاق ەلى اتىنان قاتىسۋ باقىتى كىمدەرگە بۇيىرۋى مۇمكىن؟ ءالى ەسىمىزدە، جامبى اتۋدان 2015 جىلى العاش ۇيىمداستىرىلعان قازاقستان چەمپيوناتىنا ساۋساقپەن سانارلىقتاي عانا سپورتشى قاتىسقان. ارادا وتكەن ءتورت جىلدا قازاق سۇرمەرگەندەرىنىڭ  قاتارى كادىمگىدەي قالىڭداپ قالدى. مەرگەندەرىمىزدىڭ الدى وڭتۇستىك كورەيادا وتكەن الەم چەمپيوناتىنىڭ جەڭىمپازى اتانىپ ۇلگەردى. تۇركيا، ۆەنگريا، يوردانياداعى حالىقارالىق جارىستارعا قاتىسىپ، تاجىريبە جيناقتادى.  بيىلعى ەلىشىلىك چەمپيوناتتا رەسپۋبليكانىڭ ءار وڭىرىنەن وتىزعا جۋىق مەرگەن باق سىناۋدا.

جامبى اتۋدان V مارتە وتكىزىلگەن قازاقستان چەمپيوناتى 26 مامىردا اياقتالادى. ءى الەم چەمپيوناتىنا ءبىزدىڭ ەلدەن كىمدەردىڭ قاتىساتىنى ەلىشىلىك چەمپيونات قورىتىندىسىنا قاراي ناقتى ايتىلادى. الايدا، ءبىز بۇگىن وسى ۋاقىتقا دەيىن جامبى اتۋدا سۋىرىلىپ كوزگە تۇسكەن ۇزدىك مەرگەندەرىمىزدىڭ بىرنەشەۋىن جانكۇيەر نازارىنا ۇسىنۋدى ءجون كوردىك.

ءى الەم چەمپيوناتىنا قاتىسۋى مۇمكىن قازاق مەرگەندەرى

سۋرەتتە: جامبى اتۋدىڭ اتاقتى مەرگەندەرى (وڭنان سولعا قاراي) : ات ۇستىنەن ساداق اتۋدان الەم چەمپيونى ابزال تۋلىبەكوۆ، جامبى اتۋدان 2017 جىلعى قازاقستان چەمپيوناتىنىڭ كۇمىس جۇلدەگەرى جانە 2018 جىلعى قازاقستان چەمپيونى تالعات وماربەكوۆ، «التىن جەبە» حالىقارالىق ءتۋرنيرىنىڭ كۇمىس، قولا جۇلدەگەرى، جاستار اراسىنداعى ءى ازيا چەمپيوناتىنىڭ كۇمىس جۇلدەگەرى ەرالحان ايكوز، «التىن جەبە» ءتۋرنيرىنىڭ كۇمىس جۇلدەگەرى ايتبەك سارىباي.

ابزال تۋلىبەكوۆ  –  جامبىل وبلىسى، مەركە اۋدانىندا 1996 جىلى تۋعان. 2017 جىلعى جامبى اتۋدان جاستار اراسىنداعى قازاقستان چەمپيونى. سپورت شەبەرى. قر قۇراما كومانداسىنىڭ مۇشەسى. ءىى «التىن جەبە» حالىقارالىق ءتۋرنيرىنىڭ قولا جۇلدەگەرى (2018)، ۆەنگريادا وتكەن حالىقارالىق فەستيۆالگە قاتىسۋشى. 2018 جىلعى  قازاقستان  چەمپيوناتىنىڭ كۇمىس جۇلدەگەرى، وڭتۇستىك كورەيادا ات ۇستىنەن ساداق اتۋدان وتكەن الەم چەمپيوناتىنىڭ جەڭىمپازى (2018).

ەرالحان ايكوز (تۇركىستان وبلىسى) – ءى «التىن جەبە» حالىقارالىق ءتۋرنيرىنىڭ قولا جۇلدەگەرى (2017)، ءىى «التىن جەبە» حالىقارالىق ءتۋرنيرىنىڭ كۇمىس جۇلدەگەرى (2018)، قازاقستان چەمپيوناتىنىڭ بىرنەشە دۇركىن جۇلدەگەرى، 2019 جىلى وتكەن جاستار اراسىنداعى ءى ازيا چەمپيوناتىنىڭ كۇمىس جۇلدەگەرى.

ءاليا كامالوۆا – 1997 جىلى تۋعان. الماتى وبلىسى قاراساي اۋدانىندا تۇرادى. جامبى اتۋدان قازاقستان قۇراما كومانداسىنىڭ  مۇشەسى. ءاليا ەڭ العاش جامبى اتۋدى 2016 جىلدان باستادى.  الماتى قالاسىندا 2016 جىلى «التىن مەرگەن»،   2017 جىلى «Nurmaganbet expedition» ءتۋرنيرىن جەڭىپ العان. ەرەسەكتەر اراسىنداعى 2018 جىلعى الماتى قالالىق اشىق  ءتۋرنيرىنىڭ جەڭىمپازى. ۇلى وتان سوعىسى ارداگەرلەرىنە ارنالعان الماتى وبلىسىنىڭ اشىق ءتۋرنيرىنىڭ جۇلدەگەرى. الماتى قالاسىندا وتكەن « ۇلى دالا كوشپەندىلەر الەمى ويىندارىنىڭ» چەمپيونى. 2018 جىلى قىرعىزستاندا وتكەن «سالبۋرۋن» حالىقارالىق جارىسىنىڭ كۇمىس جۇلدەگەرى.

ايتبەك سارىباي –  تۇركىستان وبلىسىنداعى تولەبي اۋدانىنىڭ تۋماسى. جامبى اتۋدان جاستار مەن ەرەسەكتەر اراسىنداعى ەلىشىلىك چەمپيوناتتاردا باس جۇلدەنى يەلەنىپ، قازاقستاننىڭ بىرنەشە دۇركىن چەمپيونى بولدى. سپورت شەبەرى. جامبى اتۋدان قازاقستان قۇراما كومانداسىنىڭ مۇشەسى. تۇڭعىش رەت ۇيىمداستىرىلعان «التىن جەبە» حالىقارالىق ءتۋرنيرىنىڭ كۇمىس جۇلدەگەرى (2017). تورت جىلدا ءبىر وتكىزىلەتىن «اقبيداي» اۋىل سپورتى ويىندارى سپارتاكياداسىنىڭ چەمپيونى (2017 جىل، اقتوبە). ۆەنگريادا وتكەن حالىقارالىق ۇلتتىق ساداق اتۋ فەستيۆالىنە قاتىسۋشى (2017 جىل).

تالعات وماربەكوۆ (قاراعاندى وبلىسى) – 2017 جىلعى قازاقستان چەمپيوناتىنىڭ كۇمىس جۇلدەگەرى، 2018 جىلعى ەل چەمپيونى، ءىى «التىن جەبە» تۋرنيرىنە قاتىسۋشى.

باقداۋلەت باباجان (جامبىل وبلىسى) – جاستار اراسىنداعى 2019 جىلعى قازاقستان چەمپيوناتىنىڭ كۇمىس جۇلدەگەرى، جاستار اراسىنداعى ءى ازيا چەمپيوناتىنىڭ جەڭىمپازى (2019).

 

تولەگەن جاكىتاي