• Қазақ
  •   
  • Qazaq
  •   
  • قازاق
  •   
  • Рус
  •   

    تارازدا ۇلتتىق سپورتتان قازاقستان چەمپيوناتى اياقتالدى

    19 مامىر كۇنى تاراز قالاسىندا باستالعان ۇلتتىق سپورتتان ەرەسەكتەر اراسىنداعى قازاقستان چەمپيوناتى اياقتالدى، دەپ حابارلادى ۇلتتىق سپورت قاۋىمداستىعى.

    كوكپار مەن اۋدارىسپاقتان ءحىح رەت، تەڭگە ىلۋدەن ءحىىى رەت، جامبى اتۋدان V رەت ۇيىمداستىرىلعان ەلىشىلىك جارىستىڭ سوڭعى كۇنى كوكپار باسەكەسىنىڭ فينالدىق ويىنى تاماشالانىپ، چەمپيوناتتىڭ سالتاناتتى جابىلۋى ءوتتى. ەكى جىل قاتارىنان تۇركىستاندىق «قۇلاگەر» كومانداسىنا ەسە جىبەرگەن جامبىل وبلىسىنىڭ «اۋليە-اتا» كومانداسى كوكپاردىڭ بۇگىنگى فينالدىق باسەكەسىندە   چەمپيوندىق اتاققا  ونىنشى مارتە قول جەتكىزدى.

    ءسال شەگىنىس جاساساق، ەلىشىلىك چەمپيوناتتىڭ 2017 جىلى الماتى قالاسىندا، 2018 جىلى ەلوردادا وتكەن  فينالدىق ويىنىندا تارازدىق «اۋليە-اتا» كومانداسى تۇركىستاندىق «قۇلاگەر» كلۋبىنان ۇتىلىپ، ەكى جىل قاتارىنان كۇمىس جۇلدەنى قاناعات تۇتقان ەدى. بۇل جولى «اۋليە-اتانىڭ» جىگىتتەرى سول وتكەن جىلداردا كەتكەن ەسەنىڭ ورنىن تولتىرىپ، فينالدىق باسەكەدە «قۇلاگەر» ۇجىمىنان باسىم ءتۇسىپ، قارسىلاستارىن 4:3 ەسەبىمەن جەڭىپ كەتتى. ءسويتىپ، كوكپاردىڭ ەلىشىلىك چەمپيوناتى تاريحىندا «اۋليە-اتا» كومانداسى  10 رەت چەمپيون اتاندى. بۇل باسەكەدە «قۇلاگەر» كومانداسىنان ادىلەت مامىت ابۋعالي ءابدىجاپپاروۆ پەن بايدىبەك سابىروۆ ءبىر-بىردەن  سالىم سالسا، «اۋليە اتا» كلۋبىنان يسلام ءرات ءبىر سالىم، قۇرمانبەك تۇرعانبەك ءۇش سالىم سالىپ، كومانداسىنا جەڭىس سىيلادى.

    ال، چەمپيوناتتىڭ قولا جۇلدەسى ءۇشىن بولعان باسەكەدە اتىراۋلىق «نارىن» كومانداسىنىڭ جولى بولدى. اتىراۋ وبلىسىنىڭ «نارىن» كومانداسى اقمولا وبلىسىنىڭ «جەكەباتىر» كلۋبىن ايقىن باسىمدىلىقپەن ۇتىپ، ويىندى 10:0 ەسەبىمەن اياقتادى. بۇل ويىندا «نارىن» كومانداسىنان قايىرجان سۇلەيمەنوۆ  ۇش سالىم، المات ءجۇنىسوۆ  ەكى سالىم سالسا،  ىنتىماق الىپباەۆ، ايبەك بولاتوۆ، ۇلان بايتورەەۆ، الەكساندر پۋپەنكو مەن نۇرجان ەرەحان ءبىر-بىردەن سالىم سالدى.

    وسى جەردە ايتا كەتەتىن ءبىر نارسە، بيىلعى جىلى ەكىنشى ورىن الىپ قالعان تۇركىستان وبلىسىنىڭ «قۇلاگەر» كومانداسى بۇعان دەيىن 6 رەت، ناقتىراق ايتساق، 2004، 2008، 2012، 2015، 2017، 2018 جىلدارى چەمپيوندىق اتاقتى يەلەنگەن. ال، «اۋليە-اتا» كومانداسى 2001، 2002، 2005، 2007، 2009، 2010، 2013، 2014، 2016 جىلدارى قازاقستان چەمپيونى بولعان. سونداي-اق، 2003 جانە 2006 جىلى ەكى رەت الماتى وبلىسىنىڭ كومانداسى، 2012 جىلى ءبىر رەت ەلوردالىق «استانا» كومانداسى وسى ەلىشىلىك باسەكەدە چەمپيوندىق اتاققا قول جەتكىزگەن ەكەن.

    قازاقستان رەسپۋبليكاسىنىڭ كوكپاردان ەرەسەكتەر اراسىندا ءحىح رەت وتكەن چەمپيوناتىنىڭ جەڭىمپازى مەن جۇلدەگەرلەرى:

    1 ورىن – «اۋليە اتا» كومانداسى  (جامبىل وبلىسى)

    2 ورىن – «قۇلاگەر» كومانداسى (تۇركىستان وبلىسى)

    3 ورىن – «نارىن» كومانداسى (اتىراۋ وبلىسى)

    3 ورىن –   «جەكەباتىر» كومانداسى (اقمولا وبلىسى)

    پىكىر جازۋ

    Your email address will not be published. Required fields are marked *

    *