Tarazda ulttyq sporttan Qazaqstan chempıonaty aıaqtaldy

19 mamyr kúni Taraz qalasynda bastalǵan ulttyq sporttan eresekter arasyndaǵy Qazaqstan chempıonaty aıaqtaldy, dep habarlady Ulttyq sport qaýymdastyǵy.

Kókpar men aýdaryspaqtan HIH ret, teńge ilýden HIII ret, jamby atýdan V ret uıymdastyrylǵan elishilik jarystyń sońǵy kúni kókpar básekesiniń fınaldyq oıyny tamashalanyp, chempıonattyń saltanatty jabylýy ótti. Eki jyl qatarynan túrkistandyq «Qulager» komandasyna ese jibergen Jambyl oblysynyń «Áýlıe-ata» komandasy kókpardyń búgingi fınaldyq básekesinde   chempıondyq ataqqa  onynshy márte qol jetkizdi.

Sál sheginis jasasaq, elishilik chempıonattyń 2017 jyly Almaty qalasynda, 2018 jyly elordada ótken  fınaldyq oıynynda tarazdyq «Áýlıe-ata» komandasy túrkistandyq «Qulager» klýbynan utylyp, eki jyl qatarynan kúmis júldeni qanaǵat tutqan edi. Bul joly «Áýlıe-atanyń» jigitteri sol ótken jyldarda ketken eseniń ornyn toltyryp, fınaldyq básekede «Qulager» ujymynan basym túsip, qarsylastaryn 4:3 esebimen jeńip ketti. Sóıtip, kókpardyń elishilik chempıonaty tarıhynda «Áýlıe-ata» komandasy  10 ret chempıon atandy. Bul básekede «Qulager» komandasynan Ádilet Mamyt Ábýǵalı Ábdijapparov pen Báıdibek Sabyrov bir-birden  salym salsa, «Áýlıe ata» klýbynan Islam Rát bir salym, Qurmanbek Turǵanbek úsh salym salyp, komandasyna jeńis syılady.

Al, chempıonattyń qola júldesi úshin bolǵan básekede atyraýlyq «Naryn» komandasynyń joly boldy. Atyraý oblysynyń «Naryn» komandasy Aqmola oblysynyń «Jekebatyr» klýbyn aıqyn basymdylyqpen utyp, oıyndy 10:0 esebimen aıaqtady. Bul oıynda «Naryn» komandasynan Qaıyrjan Súleımenov  úsh salym, Almat Júnisov  eki salym salsa,  Yntymaq Álipbaev, Aıbek Bolatov, Ulan Baıtóreev, Aleksandr Pýpenko men Nurjan Erehan bir-birden salym saldy.

Osy jerde aıta ketetin bir nárse, bıylǵy jyly ekinshi oryn alyp qalǵan Túrkistan oblysynyń «Qulager» komandasy buǵan deıin 6 ret, naqtyraq aıtsaq, 2004, 2008, 2012, 2015, 2017, 2018 jyldary chempıondyq ataqty ıelengen. Al, «Áýlıe-ata» komandasy 2001, 2002, 2005, 2007, 2009, 2010, 2013, 2014, 2016 jyldary Qazaqstan chempıony bolǵan. Sondaı-aq, 2003 jáne 2006 jyly eki ret Almaty oblysynyń komandasy, 2012 jyly bir ret elordalyq «Astana» komandasy osy elishilik básekede chempıondyq ataqqa qol jetkizgen eken.

Qazaqstan Respýblıkasynyń kókpardan eresekter arasynda HIH ret ótken chempıonatynyń jeńimpazy men júldegerleri:

1 oryn – «Áýlıe ata» komandasy  (Jambyl oblysy)

2 oryn – «Qulager» komandasy (Túrkistan oblysy)

3 oryn – «Naryn» komandasy (Atyraý oblysy)

3 oryn –   «Jekebatyr» komandasy (Aqmola oblysy)