• Қазақ
  •   
  • Qazaq
  •   
  • قازاق
  •   
  • Рус
  •   

    اتىراۋدا سپورتتىق فەستيۆال ءوتتى

    اتىراۋدا جاۋىنگەرلىك ونەر قاۋىمداستىعىنىڭ ۇيىمداستىرۋىمەن وليمپيادالىق ويىندار ساناتىنا جاتپايتىن سپورتتىڭ بىرنەشە تۇرىنەن ايتۋلى فەستيۆال ءوتتى.

    وعان جەكپە-جەك سپورتىنان،  كۇرەس تۇرلەرىنەن الەم چەمپيوناتتارى، الەم كۋبوگى،  ازيا چەمپيوناتى مەن  حالىقارالىق تۋرنيرلەردە توپ جارىپ، اتىراۋ  وبلىسىنىڭ عانا ەمەس، ەلىمىزدىڭ مارتەبەسىن ابىرويمەن قورعاپ جۇرگەن سپورتشىلار  قاتىسىپ،  شەبەرلىكتەرىن كورسەتتى.

    «ەلىمىزدە وليمپيادالىق ويىندار ساناتىنا كىرمەيتىن سپورتتىڭ بىرنەشە ءتۇرىن دامىتۋ ماقساتىندا جاۋىنگەرلىك ونەر قاۋىمداستىعى قۇرىلعان ەدى. ونىڭ قۇرامىنا كاراتە تۇرلەرى، مۋاي-تاي، كيكبوكسينگ، مما، پانكراتيون، گرەپپلينگ، ۋ-شۋ، بەلبەۋ كۇرەسى، سامبو، تاەكۆوندو گتف، جەكپە-جەك سايىستارى، دجيۋ-دجيتسۋ سىندى 20-عا تارتا سپورتتىق  فەدەراتسيالار كىرەدى. بيىلعى جىلدىڭ باسىنان بەرى اسسوتسياتسيا اياسىندا بىرنەشە ماڭىزدى ءىس-شارالار جۇزەگە استى. قاۋىمداستىق قۇرامىنا قوسىلعان سپورت تۇرلەرىنەن ەلىمىزدىڭ قۇراما كوماندالارى  الەمدىك دودالارعا قاتىسىپ، قوماقتى جۇلدەمەن ورالىپ ءجۇر. قۇراما كوماندالار ساپىندا اتىراۋلىق ساڭلاقتار دا بار. مىنە، وسىنداي چەمپيوندارىمىز قالا تۇرعىندارى مەن قوناقتارى الدىندا وزدەرىنىڭ شەبەرلىكتەرىن پاش ەتتى.

    سپورتتىق فەستيۆالدىڭ مۇراتى – جاس ۇرپاقتى سالاۋاتتىلىققا باۋلۋ. اتىراۋ وبلىستىق دەنەشىنىقتىرۋ جانە سپورت باسقارماسىنىڭ قولداۋىمەن جاۋىنگەرلىك ونەر اسسوتسياتسياسىنىڭ وتكىزگەن فەستيۆالىن تاماشالاۋعا 10 مىڭنان استام كورەرمەن جينالدى. جاستاردىڭ سپورتقا دەگەن قىزىعۋشىلىعىن كورىپ قۋاناسىڭ»، – دەيدى جاۋىنگەرلىك ونەر  قاۋىمداستىعىنا قاراستى  اتىراۋ وبلىستىق اسسوتسياتسياسىنىڭ ديرەكتورى، سپورت جاناشىرى، اتىمتاي-جومارت مەتسەنات  ەرلان تابىلديەۆ.

    سپورتتىق فەستيۆال بارىسىندا قازاق ەستراداسىنىڭ جارقىن وكىلى ەركە ەسماحان، جاستاردىڭ ۇلكەن قولداۋىنا يە بولىپ جۇرگەن ارتۋر مەن رايىم سىندى انشىلەر جەرگىلىكتى ونەر شەبەرلەرىمەن بىرگە كوپشىلىكتىڭ كوڭىلىن سەرپىلتتى.

    مۇنداي اۋقىمدى ءىس-شارالار الداعى ۋاقىتتا دا جالعاسىن تابادى دەيدى ۇيىمداستىرۋشىلار.

     

    قۋانىش راحمەت،

    اتىراۋ قالاسى.

      

       

    پىكىر جازۋ

    Your email address will not be published. Required fields are marked *

    *