SportPress.kz Qazaqstan sport jańalyqtary
23-30 maýsym kúnderi Almaty qalasynyń irgesindegi ıppodromda ulttyq sport túrlerinen jasóspirimder arasyndaǵy Qazaqstan chempıonaty óz jalaýyn kóteredi, dep habarlady Ulttyq sport qaýymdastyǵy.
Jasóspirimder chempıonaty Mádenıet jáne sport mınıstrliginiń jyldyq kúntizbelik josparyna sáıkes Ulttyq sport qaýymdastyǵynyń uıymdastyrýymen, Almaty oblysy ákimdiginiń qoldaýymen ótedi.
2001-2003 jyldarda týǵan jasóspirimder arasyndaǵy elishilik chempıonattyń jalaýy kóteriletin naqty meken-jaı – Almaty oblysy, Talǵar aýdanyna qarasty «Baıserke» ıppodromy. Ulttyq sporttyń qalyń jankúıeri jaqsy biledi, Almaty qalasynyń irgesindegi dál osy ıppodromda bıylǵy jylǵy 16-21 sáýirde jastar arasyndaǵy I Azııa chempıonatynyń dýmandy básekesi ótken bolatyn. 11 memleket komandasy qatysqan tuńǵysh Azııa chempıonatynda ulttyq sporttyń tórt túrinen de qazaq jastarynyń mereıi ústem bolyp, jas chempıondarymyzdyń qatary kóbeıe túsken edi.
Al, Kókpardan, Aýdaryspaqtan, Teńge ilýden VIII ret, Jamby atýdan V ret uıymdastyrylatyn jasóspirimder chempıonatynyń bıylǵy básekesine mamandardyń aıtýynsha, barlyq oblystardyń komandalary qatysýy múmkin. Qazirgi kezde Almaty qalasynyń irgesindegi «Baıserke» ıppodromynda jasóspirimder chempıonatyn ótkizýdiń sońǵy daıarlyq jumystary qyzý júrgizilýde.
Eske salyp ótsek, byltyrǵy jylǵy jasóspirimder arasyndaǵy Qazaqstan chempıonaty Kókshetaý qalasyndaǵy «Qulager» ıppodromynda ótti.
Tamyz aıynda tý kótergen elishilik básekede Almaty qalasy, Aqmola, Túrkistan, Jambyl, Aqtóbe, Qyzylorda, Soltústik Qazaqstan, Batys Qazaqstan, Almaty oblystarynyń jasóspirimderi baq synady. Kókpar sporty boıynsha Túrkistan oblysynyń komandasy bas júldeni talassyz jeńip aldy. Kúmis júlde Jambyl oblysynyń jastaryna, qola júlde Aqtóbe oblysynyń jastaryna buıyrǵan edi.
