بوكسشى بەكزات ساتتارحانوۆتىڭ اتا-اناسىنا قۇرمەت كورسەتىلدى

مادەنيەت جانە سپورت ءمينيسترى اقتوتى رايىمقۇلوۆا بوكستان سيدنەي وليمپياداسىنىڭ چەمپيونى بەكزات ساتتارحانوۆتىڭ اكەسى سەيىلحان ساتتارحان ۇلىمەن، اناسى سىرلىكۇل ساتتارحانوۆامەن جانە  بەكزاتتىڭ ءرولىن سومداعان «Astana Musical» مەملەكەتتىك تەاترىنىڭ اكتەرى سامات ازىمقۇلوۆپەن كەزدەستى، دەپ حابارلادى مادەنيەت جانە سپورت مينيسترلىگى سپورت جانە دەنەشىنىقتىرۋ ىستەرى كوميتەتىنىڭ ءباسپاسوز قىزمەتى.

ۆەدومستۆو باسشىسى XXVII وليمپيادادا جارتىلاي جەڭىل سالماقتا چەمپيون اتاعىن جەڭىپ الىپ، قازاقتىڭ مەرەيىن اسقاقتاتقان بىلعارى قولعاپ شەبەرى بەكزاتتاي ۇلدى تاربيەلەگەن اتا-اناسىنا قۇرمەت كورسەتىپ، العىس حاتتى تابىس ەتتى.

–مادەنيەت جانە سپورت مينيسترلىگىنىڭ جانە ءوز اتىمنان سىزدەرگە قازاق ەلىنىڭ ءبىرتۋار ۇلى، حالقىمىزدىڭ ماقتانىشى، سپورت الەمىندە اتى التىن ارىپپەن جازىلعان بەكزاتتاي ۇلدى تاربيەلەپ، وسىرگەندەرىڭىز ءۇشىن العىسىمدى بىلدىرەمىن. بەكزاتتىڭ جارقىن بەينەسى وسكەلەڭ ۇرپاق ءۇشىن ۇلكەن تاربيەلىك مانگە يە دەپ بىلەمىن، – دەدى مينيستر.

وليمپيادا چەمپيونىنىڭ اكەسى سەيىلحان ساتتارحانوۆ جاپونيانىڭ استاناسى توكيودا 2020 جىلى وتەتىن وليمپيادا ويىندارىندا بوكستان قازاقستان قۇراماسىنا ساتتىلىك تىلەپ، جىلى لەبىز ءبىلدىردى. اناسى سىرلىكۇل ساتتارحانوۆا باس جۇلدەمەن ورالعان ۇلىنىڭ «بۇل تەك مەنىڭ عانا جەڭىسىم ەمەس. بۇل – بۇكىل ەلىمنىڭ جەڭىسى. مەن ءالى ءۇش دۇركىن وليمپيادا چەمپيونى بولامىن، – دەپ ايتقاندىعىن ەسكە الدى. سونداي-اق، بەكزاتتىڭ اتا-اناسى تۇركىستان قالاسىنداعى مەكتەپكە جانە نۇر-سۇلتان قالاسىنداعى كوشەگە  بەكزاتتىڭ ەسىمىن بەرۋ جونىندە ۇسىنىس ءبىلدىردى. ءوز كەزەگىندە مينيستر اقتوتى رايىمقۇلوۆا وسى باعىتتا ءتيىستى جۇمىستاردى پىسىقتاۋعا تاپسىرما بەردى.

بەكزات ساتتارحانوۆ بوكسپەن 15 جاسىنان شۇعىلدانا باستادى. سوعان قاراماستان 20 جاسىندا وليمپيادا چەمپيونى اتاندى. 1998 جىلى جاستار اراسىندا ازيا چەمپيوناتىنىڭ كۇمىس جۇلدەگەرى، 1998 جىلى جاستار اراسىندا الەم چەمپيوناتىنىڭ كۇمىس مەداليسى، 1999 جىلى ازيا چەمپيوناتىنىڭ كۇمىس جۇلدەگەرى، 1999 جىلى ورتا-ازيالىق مەملەكەتتەرىنىڭ جەڭىمپازى بولدى. وكىنىشكە وراي 2000 جىلى 31 جەلتوقساندا جاڭا جىل قارساڭىندا ورداباسى اۋدانىندا جول اپاتىنان قازا تاپتى.

قازىرگى ۋاقىتتا ب.ساتتارحانوۆ اتىمەن شىمكەنت قالاسىندا دارىندى بالالارعا ارنالعان سپورتتىق مەكتەپ-ينتەرنات، كەنتاۋ قالاسىندا كەشەندى بالالار-جاسوسپىرىمدەر سپورت-مەكتەبى اتالادى. تۇركىستان قالاسىنداعى داڭعىلداردىڭ بىرىنە بەكزاتتىڭ ەسىمى بەرىلگەن. 2007 جىلدان باستاپ جىل سايىن بوكستان بەكزات ساتتارحانوۆ اتىنداعى جاستار اراسىنداعى حالىقارالىق تۋرنير وتەدى.

3 شىلدە كۇنى ەلوردادا وليمپيادا چەمپيونى تۋرالى مۇرات بيدوسوۆ تۇسىرگەن «بەكزات» اتتى كوركەم ءفيلمنىڭ جابىق كورسەتىلىمى بولدى. كينولەنتا «حابار» اگەنتتىگىنىڭ تاپسىرىسى بويىنشا ءتۇسىرىلدى. فيلمدە سپورتشىنىڭ ءومىرى، كارەراسىنىڭ باستالعان كەزى باياندالعان.