اتامەكەن رۇستەموۆ — مەملەكەتتىك جاتتىقتىرۋشى

كەشە سپورت جانە دەنەشىنىقتىرۋ ىستەرى كوميتەتىنىڭ توراعاسى سەرىك ساپيەۆتىڭ بۇيرىعىمەن بۇعان دەيىن كوكپاردان قازاقستاننىڭ جاستار قۇراما كومانداسىنىڭ باس جاتتىقتىرۋشىسى بولعان اتامەكەن رۇستەموۆ «سپورتتى دامىتۋ ديرەكتسياسى» رمقك ۇلتتىق ات سپورتى تۇرلەرىنەن مەملەكەتتىك جاتتىقتىرۋشى قىزمەتىنە تاعايىندالدى، دەپ حابارلادى قازاقستان ۇلتتىق سپورت قاۋىمداستىعى.

كوكپاردان جانە اۋدارىسپاقتان «قازاقستان رەسپۋبليكاسىنىڭ سپورت شەبەرى»، كوكپاردان «قازاقستان رەسپۋبليكاسىنىڭ ەڭبەك سىڭىرگەن سپورت شەبەرى» اتانىپ، جامبىل وبلىستىق كوكپار فەدەراتسياسىنىڭ ۆيتسە-پرەزيدەنتى، كوكپاردان جاستار قۇراما كومانداسىنىڭ باس باپكەرى قىزمەتتەرىن اتقارىپ كەلگەن اتامەكەن رۇستەموۆتى اتالمىش لاۋازىمعا ۇلتتىق سپورت قاۋىمداستىعىنىڭ باسشىلىعى ۇسىنعان بولاتىن.

اتامەكەن رۇستەموۆ – 1984 جىلى 22 قاراشادا جامبىل وبلىسى، جامبىل اۋدانى، ايشا ءبيبى اۋىلىندا تۋعان. اتامەكەن ءنابي ۇلىنىڭ ەڭبەك جولىن ىقشامداي ايتىپ وتسەك، ول  2002-2004 جىلدار ارالىعىندا جامبىل وبلىسى كوكپار كومانداسىنىڭ كوكپارشىسى، 2004-2008 جىلدار ارالىعىندا جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسىنىڭ «اۋليە-اتا» كوكپار كلۋبىندا  كوكپارشى-نۇسقاۋشىسى، 2008-2018 جىلدار ارالىعىندا جامبىل وبلىسى اكىمدىگىنىڭ دەنە شىنىقتىرۋ جانە سپورت باسقارماسى «ۇلتتىق سپورت تۇرلەرىنەن «اۋليە-اتا» كاسىپقوي كلۋبىندا سپورتشى قىزمەتىن اتقارعان.

اتامەكەن ءنابي ۇلى – 2018 جىلدىڭ تامىز ايىنان باستاپ  كوكپار سپورتىنان جاستار قۇراما كومانداسىنىڭ باس جاتتىقتىرۋشىسى بولدى. ۇلتتىق سپورت قاۋىمداستىعى وتكىزگەن كوكپاردان رەسپۋبليكالىق، حالىقارالىق جارىستاردىڭ ۇيىمداستىرىلۋىنا بەلسەنە ۇلەس قوستى. اسىرەسە، جاستار كوماندالارىمەن وقۋ-جاتتىعۋ جيىندارىن وتكىزۋدە،   ۇيىمداستىرۋدا ءوزىنىڭ مول تاجىريبەسى بارىن دالەلدەي ءبىلدى.  اتاپ ايتقاندا، كوكپار سپورتىنان جاستار اراسىندا 2018 جىلى 20-27 تامىز ارالىعىندا پەتروپاۆلدا   وتكەن قازاقستان چەمپيوناتىندا، « ۇلى دالا رۋحى» رەسپۋبليكالىق فەستيۆالىندە،  2019 جىلعى 14-22 ناۋرىزدا قىزىلوردادا ەل چەمپيوناتىندا ا.رۇستەموۆتىڭ شاكىرتتەرى جوعارى ناتيجەلەر كورسەتتى. سونداي-اق، 2019 جىلدىڭ 16-22 ساۋىرىندە الماتى وبلىسىندا وتكەن كوكپاردان جاستار اراسىندا ءى ازيا چەمپيوناتىندا اتامەكەن ءنابي ۇلى جاتتىقتىرعان قازاقستان قۇراما كومانداسىنىڭ شاباندوزدارى ءبىرىنشى ورىندى يەلەنىپ، ازيا چەمپيونى اتاندى.