الەم چەمپيوناتىندا قازاق مەرگەندەرى جۇلدە الدى

بۇگىن وڭتۇستىك كورەيادان ءسۇيىنشى حابار الدىق. ات ۇستىنەن ساداق اتۋدان ۇيىمداستىرىلعان الەم چەمپيوناتىنىڭ  كوماندالىق جارىسىندا ءبىزدىڭ ءۇش مەرگەنىمىز قولا جۇلدەگەر اتاندى.

وڭتۇستىك كورەيانىڭ سوكحچو قالاسىندا ات ۇستىنەن ساداق اتۋدان XV الەم چەمپيوناتىنىڭ 27 تامىزدا باستالعانىن، ءبىزدىڭ ابزال تۋلىبەكوۆ، ەرالحان ايكوز، باقداۋلەت باباجان، ايتبەك سارىباي  ەسىمدى مەرگەندەرىمىزدىڭ وسى جارىستىڭ بەل ورتاسىندا جۇرگەنىن بىرەر كۇن بۇرىن حابارلاعان بولاتىنبىز. بيىلعى الەم چەمپيوناتىندا 27 مەملەكەتتىڭ جەتپىسكە جۋىق مەرگەنى باق سىناۋدا.

سۋرەتتە: ات ۇستىنەن ساداق اتۋدان  الەم چەمپيوناتىندا «ماسساە  ستيلى»  بويىنشا 2018 جىلعى چەمپيون، ال، بيىلعى XV الەم چەمپيوناتىنىڭ قولا جۇلدەگەرى، بولاشاعىنان زور ءۇمىت كۇتتىرگەن قازاقتىڭ ايتۋلى سۇرمەرگەندەرىنىڭ ءبىرى  ابزال تۋلىبەكوۆ. 

سۋرەتتە: ات ۇستىنەن ساداق اتۋدان  XV الەم چەمپيوناتىندا «ماسساە  ستيلى»  بويىنشا  قولا جۇلدەگەر اتانعان (سولدان وڭعا قاراي) مەرگەندەر ەرالحان ايكوز بەن باقداۋلەت باباجان.

قازاق ەلىنىڭ ۇلتتىق قۇراما كومانداسىن XV الەمدىك دوداعا باستاپ بارعان قوس جاتتىقتىرۋشىنىڭ ءبىرى، جامبى اتۋدان رەسپۋبليكالىق باس تورەشى ەلدوس باداشەۆ بەرگەن مالىمەتكە سۇيەنسەك، بيىلعى الەم چەمپيوناتىنىڭ باسەكەسىندە دۇنيەجۇزى مەرگەندەرى «كورەي ءستيلى»، «تۇرىك ءستيلى»، «ماسساە  ستيلى»، «موگۋ ءستيلى» جانە «قازاق ءستيلى» اتتى بەس ءتۇرلى جارىستان سىنعا تۇسۋدە. ءبىزدىڭ مەرگەندەر – ابزال تۋلىبەكوۆ، ەرالحان ايكوز، باقداۋلەت باباجان بۇگىن «ماسساە  ستيلى» بويىنشا وتكەن كوماندالىق جارىستا قولا جۇلدەنى ۇتىپ العان. ەسكە سالا وتەلىك، ءدال وسى جارىس تۇرىنەن وتكەن جىلعى الەم چەمپيوناتىندا ابزال تۋلىبەكوۆ پەن ەلدوس باداشەۆ باس جۇلدەنى يەلەنگەن بولاتىن. بۇل دەگەنىڭىز، ون بەس مەترلىك قاشىقتىقتان 20 سانتيمەرلىك نىسانانى قۇيعىتا شاپقان ات ۇستىنەن اتىپ قۇلاتۋ سايىسى. «ماسساە  ستيلى» بويىنشا وتكەن بۇگىنگى مەرگەندىك سايىسىندا باس جۇلدەنى وڭتۇستىك كورەي، كۇمىس جۇلدەنى امەريكا سپورتشىلارى يەلەنىپتى.

سۋرەتتە: قازاق ەلىنىڭ ۇلتتىق قۇراما كومانداسىن XV الەمدىك باسەكەگە باستاپ بارعان  جاتتىقتىرۋشى، جامبى اتۋدان رەسپۋبليكالىق باس تورەشى،  ات ۇستىنەن ساداق اتۋدان  الەم چەمپيوناتىندا «ماسساە  ستيلى»  بويىنشا 2018 جىلعى چەمپيون  ەلدوس باداشەۆ (وڭ جاقتا).

ەرتەڭ ات ۇستىنەن ساداق اتۋدان XV الەم چەمپيوناتىنىڭ سوڭعى كۇنى.  «تۇرىك ءستيلى»، «موگۋ ءستيلى» جانە الەمدىك سىننىڭ باعدارلاماسىنا تۇڭعىش قوسىلعان «قازاق ءستيلى» بويىنشا مەرگەندىك باسەكەلەرى ەرتەڭ وتكىزىلمەكشى. جامبى اتۋدىڭ باس تورەشىسى ءبىزدىڭ سۇرمەرگەندەردىڭ ەرتەڭگى «قازاق ءستيلى» بويىنشا وتەتىن جارىستا تاعى دا قوماقتى جۇلدەنى يەلەنەدى دەگەن سەنىمدە. مەرگەندەرىمىزگە ءبىز دە تىلەكشى بولايىق. ەرتەڭ قازاق سپورتشىلارىنىڭ قانجىعاسىنا XV الەمدىك دودانىڭ باس جۇلدەسى بايلانۋى بەك مۇمكىن.