اقتوبەدە كوكپار جارىسى اياقتالدى

اقتوبە قالاسىندا 18 قىركۇيەكتە باستالعان كوكپار دوداسى بۇگىن مارەگە جەتتى. فەستيۆالعا قاتىسقان ەلىمىزدىڭ 12 كوكپار كومانداسى اراسىنان ۇزدىك شىققان ءتورت كوماندا تاڭەرتەڭنەن باستاپ جۇلدەلى ورىنداردى ساراپقا سالدى. بۇل تۋرالى ۇلتتىق سپورت قاۋىمداستىعى حابارلادى.

سولتۇستىك قازاقستان وبلىسى مەن اقتوبە وبلىسى كوماندالارى اراسىنداعى باسەكە 3:2 ەسەبىمەن اياقتالىپ، اقتوبەلىك كوكپارشىلار قولا جۇلدەگە قول جەتكىزدى.

ال، فينالدىق ويىندا قر ەڭبەك سىڭىرگەن جاتتىقتىرۋشىسى نۇرداۋلەت مومىنوۆتىڭ شاكىرتتەرى فەستيۆالداعى كوكپار باسەكەسىنىڭ باس جۇلدەسىن قانجىعالارىنا بايلادى. «اۋليە-اتا» (جامبىل وبلىسى) مەن «قۇلاگەر» (تۇركىستان وبلىسى) اراسىنداعى اقتىق ويىن 3:1 ەسەبىمەن اياقتالدى. ەسكە سالا وتەلىك، «اۋليە-اتا» كومانداسى «قۇلاگەر» كومانداسىنان بيىلعى جىلى ەكىنشى رەت باسىم ءتۇستى.

1 ورىن – جامبىل وبلىسىنىڭ «اۋليە-اتا» كوكپار كومانداسى
2 ورىن – تۇركىستان وبلىسىنىڭ «قۇلاگەر» كوكپار كومانداسى
3 ورىن – اقتوبە وبلىسىنىڭ «ءالىم-اتا» كوكپار كومانداسى