اتىراۋدا «التىن تۇلپار» الامان بايگەسى باستالادى

بۇگىن اتىراۋ قالاسىنداعى «اتىراۋ-اقپارات» عيماراتىندا 12 قازاندا وتەتىن «التىن تۇلپار – جايىق جاعاسىندا» الامان بايگەسى مەن «دارابوز-2019» تۋرنيرىنە بايلانىستى ءباسپاسوز ءماسليحاتى ءوتتى. بۇل تۋرالى ۇلتتىق سپورت قاۋىمداستىعى حابارلادى.

جيىنعا قاتىسقان باق وكىلدەرىنە ۇلتتىق سپورت قاۋىمداستىعىنىڭ باس حاتشىسى نۇرسۇلتان يبراگيموۆ «التىن تۇلپار» الامان بايگەسىنىڭ ۇيىمداستىرىلۋى مەن اتىراۋ وڭىرىندە وتكىزىلۋى سەبەپتەرىنەن باستاپ، الداعى الامان بايگەگە قاتىساتىن اتاقتى جۇيرىكتەر تۋرالى ايتتى.

–12 قازان كۇنى اتىراۋ قالاسىنا تاياۋ تالدىكول ەلدىمەكەنى اۋماعىندا وتەتىن «التىن تۇلپار» بايگەسىنىڭ 2014 جىلدان باستاپ ءتورت مارتە نۇر-سۇلتان قالاسى اۋماعىندا وتكىزىلگەنى بارشاڭىزعا بەلگىلى. وتكەن جىلى ۇيىمداستىرۋشىلار القاسى «التىن تۇلپار» بايگەسىن  ەلوردا توڭىرەگىندە عانا ەمەس،  ەلىمىزدىڭ باسقا وڭىرلەرىندە دە وتكىزگەن ءجون دەپ شەشتى. ءسويتىپ، بۇل بايگە ەكى جىلدا ءبىر رەت ۇيىمداستىرىلاتىن بولدى. بيىلعى الامان بايگەنىڭ رەسمي اتاۋى – «التىن تۇلپار – جايىق جاعاسىندا» V رەسپۋبليكالىق ءتۋرنيرى. قاشىقتىعى – 51 شاقىرىم. باس بايگەسى – 10 ميلليون تەڭگە. جالپى جۇلدە قورى – 22 ميلليون تەڭگە. الدىڭعى كەلگەن توعىز جۇيرىككە بايگە بار. قازىرگى كەزدە  «التىن تۇلپار» بايگەسى قازاقستاننىڭ ەڭ ۇزدىك سايگ ۇلىكتەرى قاتىساتىن، ايتۋلى اتبەگىلەردىڭ اسىعا كۇتەتىن مەرەكەسىنە اينالدى، – دەدى ن.يبراگيموۆ.

ودان ءارى ول ايتۋلى ات جارىسىنىڭ تۇڭعىش پرەزيدەنتىمىز، ەلباسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسى مەن «جاستار جىلى» اياسىندا،  رەسپۋبليكا پرەزيدەنتى قاسىم-جومارت توقاەۆتىڭ ۇلتتىق سپورتتى دامىتۋدى قولداۋىمەن وتكىزىلىپ وتىرعانىن جانە وسىنداي الامان بايگەنىڭ وتۋىنە قولداۋ كورسەتكەن «نۇر-وتان» پارتياسىنا، پارتيانىڭ ءبىرىنشى ورىنباسارى باۋىرجان بايبەككە، اتىراۋ وبلىسىنىڭ اكىمى نۇرلان اسقار ۇلى نوعاەۆقا  شەكسىز العىستارىن جەتكىزدى. سونداي-اق ول الماتى، تۇركىستان، جامبىل وبلىستارىنان جارىسقا قاتىساتىن بىرنەشە ايگىلى جۇيرىكتەردىڭ ەسىمى مەن اتبەگىلەرىن اتاپ ءوتتى.

–11-12 قازاندا اتىراۋ قالاسى كۇنىنە وراي، اتىراۋ وبلىسى اكىمدىگىنىڭ باستاماسىمەن، اتىراۋ وبلىسى دەنە شىنىقتىرۋ جانە سپورت باسقارماسىنىڭ،  وبلىستىق «ۇلتتىق سپورت تۇرلەرى» فەدەراتسياسىنىڭ ۇيىمداستىرۋىمەن، ماحامبەت اۋدانى تالدىكول اۋىلىندا «دارابوز-2019» حالىقارالىق ءتۋرنيرى  وتەدى. كوكپار، اۋدارىسپاق، تەڭگە ءىلۋ، جامبى اتۋ، الامان، توپ جانە  قۇنان بايگە،  جورعا جارىسى، قۇماي تازى جارىستارى سىندى ۇلتتىق سپورت تۇرلەرىنەن وتەتىن بۇل تۋرنيرگە قازاقستان جانە شەتەل كوماندالارى قاتىسادى. جارىستىڭ جۇلدە قورى – 32 180 000 تەڭگە، – دەدى ول.

جيىندا بۇل تۋرالى  اتىراۋ وبلىسى ۇلتتىق سپورت فەدەراتسياسىنىڭ باسشىسى اسلانبەك جانبالاەۆ كەڭىرەك ايتتى. ول ۇلتتىق سپورت تۇرلەرىنەن وتەتىن «دارابوز-2019» ءتۋرنيرى، اتىراۋ وڭىرىندەگى ۇلتتىق سپورتتىڭ دامۋى  جايلى اڭگىمەلەپ بەردى.