Sport akademııanyń sportshylary synnan súrinbedi

Qazan aıy qorjynymyz medalǵa tolyp, júlde jınadyq. Jaqsylyq Úshkempirov atyndaǵy Semeı sport akademııasynyń sportshylary birneshe iri halyqaralyq jarystarǵa qatysyp, jeńimpaz atandy, júldeger boldy.

Kúni keshe Qyrǵyzstannyń Sholpan-Ata qalasynda dzıýdo kúresinen jasóspirimder jáne jastar arasynda Azııa Kýbogy ótken bolatyn. Atalǵan dodada akademııanyń sportshylary baq synap, jaqsy óner kórsetti. Jastar arasynda jarys jolyna shyqqan Janasyl Ánýarov 73 kıloda, qyzdar arasynda Zarına Sarıpova 57 kg salmaqta altyn medal alsa, 81 kıloda Qýanysh Rataevqa qoladan júlde buıyrdy.

Qyrǵyz elindegi jeńisti kúnder О́zbekstanda jalǵasyn tapty. Tashkent qalasynda sambo kúresinen jastar jáne jasóspirimder arasynda álem chempıonaty aıaqtaldy. Bul synda Jaqsylyq Úshkempirov atyndaǵy Semeı sport akademııasynyń qos sportshysy kúmis jáne qola júldege ıe boldy. Jasóspirimder arasynda synǵa túsken Esentaı Imahanov 60 kıloda kúmis, Shalqybek Rahmetollaev jastar arasynda 74 kg salmaqta qoladan medal taqty.

Esentaı men Shalqybekti sport akademııasynyń bapkerleri, sportshylary Semeıdiń temirjol beketinen kútip aldy. Esentaı fınalda Reseı balýanymen jol túıistiripti. «Baq shaba ma, bap shaba ma» deıdi ǵoı. Qarsylasynyń baǵy shaýypty. Esentaı bar joǵy 1:0 esebimen utyldy. Al Shalqybek qola júldege talasqanda ázirbaıjan qarsylasyn qapy qaldyrǵan. Aıta keteıik, qyrkúıek aıynda Úndistannyń Nıý-Delı qalasynda sambo kúresinen ótken Azııa chempıonatynda Esentaı Imahanov altynnan alqa taqsa, Shalqybek Rahmetollaev úzdik bestikten kórindi.

Álbette, sportshylardyń jeńisi bapkerdiń biliktiligine baılanysty. Bul rette Jaqsylyq Úshkempirov atyndaǵy Semeı sport akademııasynyń dırektory Mereıǵaly Kóshkinov bastaǵan jattyqtyrýshylardyń eńbegin aıta ketý lázim. Tashkent tórinde ótken álemdik dodaǵa sportshylardy Mereıǵaly Qoıshybekulynyń tól shákirtteri – Qaırat Kúnsafın men Birjan Imahanov jattyqtyryp aparǵan edi.

Jaqsylyq Úshkempirov atyndaǵy Semeı sport akademıasynyń baspasóz qyzmeti.