تۇركىستاننىڭ جاستارى تۋرنيردە توپ جاردى

اتاقتى كوكپارشى ءابىلحان داۋىلباەۆتىڭ بيىلعى ءتۋرنيرىنىڭ جاستار اراسىندا ۇيىمداستىرىلعانى تۋرالى اقپارات بۇدان بۇرىن جاريالانعان بولاتىن. بۇگىن وسى تۋرنيردەگى ۇزدىك كوكپار كوماندالارى انىقتالدى. بۇل تۋرالى ۇلتتىق سپورت قاۋىمداستىعى حابارلادى.

جاستاردى ۇلتتىق سپورتقا قىزىقتىرۋ، داڭقتى كوكپارشىنىڭ مەرەيىن كوتەرۋ ماقساتىندا شىمكەنت قالاسىندا كوكپاردان ءتورتىنشى رەت وتكىزىلگەن ءتۋرنيردىڭ جەڭىمپازى – تۇركىستان كومانداسى بولدى. جارىسقا بارلىعى 8 كوماندا، اتاپ ايتقاندا، الماتى وبلىسى، الماتى قالاسى، ماڭعىستاۋ وبلىسى، شىمكەنت ات سپورتى ورتالىعىنىڭ «بۇركىت» كومانداسى، تۇركىستان وبلىسى، جامبىل وبلىسى، تۇركىستان وبلىسىنىڭ سايرام اۋدانى مەن تۇلكىباس اۋدانىنىڭ كوماندالارى قاتىستى.

بۇگىنگى جارتىلاي فينالدا جامبىل وبلىسى مەن الماتى وبلىسى كوماندالارىنىڭ اراسىنداعى ويىن 8:3 ەسەبىمەن اياقتالدى. ال، فينالعا شىققان تۇركىستان وبلىسى مەن ماڭعىستاۋ وبلىسى كوماندالارىنىڭ اراسىنداعى كەزدەسۋدە ەسەپ 11:1 بولىپ، تۇركىستاندىق جاستار داڭقتى كوكپارشى، كوماندالىق كوكپاردان كەڭەس وداعىنىڭ 9 دۇركىن چەمپيونى ءابىلحان داۋىلباەۆ اتىنداعى ءتۋرنيردىڭ جەڭىمپازى اتاندى.

1 ورىن – تۇركىستان وبلىسى

2 ورىن – ماڭعىستاۋ وبلىسى

3 ورىن – جامبىل وبلىسى