Elorda irgesinde jappaı kókpar jarysy aıaqtaldy

Jappaı kókpardy tamashalaýǵa  Ulttyq sport qaýymdastyǵynyń prezıdenti, Parlament  Májilisiniń depýtaty Bekbolat Tileýhan qatysty. Bul týraly Ulttyq sport qaýymdastyǵy habarlady.

Elorda irgesindegi Talapker aýylynda Hasenovter áýleti uıymdastyrǵan bul kókpar – bıylǵy jyly Arqa tósinde ótken aıtýly kókpardyń biri.

Bul jappaı kókpardy Hasenovter áýleti ómirden ozǵan ardaqty ákelerin eske alý qurmetine jasaǵan jyldyq asqa oraı uıymdastyrdy. Belgili atbegi Hasenuly Amandyq aqsaqal kezinde Aqmola óńiriniń aýyl sharýashylyǵy salasynda uzaq jyldar tabysty  eńbek etip, Soıalıstik Eńbek Eri ordenin ıelengen, osy ólkege tanymal tulǵa. Zootehnıka salasynyń joǵary bilimdi mamany. Jeti ul-qyz tárbıelep ósirgen abzal áke.

Bul kókparǵa elimizdiń ár óńirinen kelgen Baǵlan Shyrynbaev, Ulan Baıtóreev, Nurdáýlet Momynov, Qurmanbek Turǵanbek, Aslan Qabjanov, Erlan Qanafın  syndy ataqty kókparshylary qatysyp, dodanyń dýmanyn qyzdyrdy. Tipti, ulttyq sport túrleriniń bas bapkeri Quramaev Qýanyshbektiń ózi kókpardyń dodasynda top jaryp, áıgili balýandardan aıla asyryp, salym saldy.

Jappaı kókpardy tamashalaýǵa qatysqan Ulttyq sport qaýymdastyǵynyń prezıdenti Bekbolat Qanaıuly óziniń quttyqtaý sózinde Hasenovter áýleti uıymdastyrǵan kókparǵa alystan at sabyltyp arnaıy kelgen ataqty kókparshylardyń uıymshyldyqtaryna,  Arqa tósinde, Elordanyń irgesinde  osyndaı jappaı kókpardyń ótýine uıytqy bolǵan atbegi Amanjol Amandyquly men onyń aǵaıyn-týystaryna shynaıy alǵysyn jetkizdi. «Elimizdiń Táýelsizdigi, halqymyzdyń beıbitshildigi arqasynda talaı asyl dúnıemiz jandanýda. Sonyń ishinde ulttyq sportymyz álemdik deńgeıge kóterildi. Mine, Arqanyń tósindegi jappaı kókparǵa elimizdiń ataqty balýandary arnaıy qatysyp otyr. Sonyń barlyǵy eń aldymen dástúrli oıyndy osylaısha  únemi qoldap, qoshametteı bilgen qalyń jankúıerdiń, ıaǵnı, Sizderdiń arqalaryńyzda» dep, jappaı kókpardy kórýge jınalǵan kópshilikke degen óz rızashylyǵyn bildirdi.

Eske sala ótsek, bul jappaı kókpardyń salym júldesine – 1 mıllıon teńge jáne  2 tana, 2 jabaǵy, 2 taı, 2 at, 2 túıe tigildi. «О́giz óldi» salymyna eki túıe ataldy. Qostanaı, Soltústik Qazaqstan, Túrkistan, Jambyl, Aqmola oblystarynan kelgen aıtýly kókparshylary arasynan dodashyl atyna senip, ózgelerden aılasy men sheberligin asyrǵan birneshe balýandar salym salyp, kórermen qoshametine bólendi. Al, jappaı kókpardyń aıaqtalǵanyn bildiretin «О́giz óldi» salymynyń birin kókpardyń jas balýany Qurmanbek Turǵanbek salsa, ekinshisin áıgili kókpar balýany Baǵlan Shyrynbaev saldy.