ۇزدىكتەر «التىن تۇعىردا» انىقتالدى

ۇلتتىق سپورت قاۋىمداستىعىنىڭ ۇيىمداستىرۋىمەن، «Nur Otan» پارتياسىنىڭ قولداۋىمەن «قازمەديا» ورتالىعىنىڭ كونتسەرت زالىندا «التىن تۇعىر-2019» اتتى ۇلتتىق سپورت ۇزدىكتەرىن ماراپاتتاۋ جيىنى ءوتتى، دەپ حابارلادى ۇلتتىق سپورت قاۋىمداستىعى.

ۇلتتىق سپورت سالاسىنداعى ۇزدىكتەردىڭ مەرەيىن كوتەرۋدى ماقسات تۇتقان «التىن تۇعىر» سالتاناتتى جيىنى بيىل جەتىنشى مارتە ۇيىمداستىرىلدى. ءداستۇرلى ماراپاتتاۋ جيىنىنا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك، مادەنيەت جانە سپورت ۆيتسە-ءمينيسترى ەلدوس رامازانوۆ، سپورت جانە دەنەشىنىقتىرۋ ىستەرى كوميتەتىنىڭ توراعاسى سەرىك ساپيەۆ، ۇلتتىق سپورت قاۋىمداستىعىنىڭ قۇرمەتتى پرەزيدەنتى، گەنەرال-مايور قايرات ساتىبالدى ۇلى، ءماجىلىس دەپۋتاتى، ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان مەن باسقا دا لاۋازىم يەلەرى قاتىسىپ، ۇلتتىق سپورتتىڭ جىل ۇزدىكتەرىنە سىيلىقتار تاپسىرىپ، قۇتتىقتاۋ ءسوز سويلەدى.

«التىن تۇعىر» سالتاناتىنا قاتىسقان كوپشىلىك ەلىمىزگە تانىمال ساحنا ونەرپازدارىنىڭ سازدى اۋەندەرىن تاماشالادى.

بيىلعى «التىن تۇعىر» سىيلىعىنىڭ يەگەرلەرى — 2019 جىلعى ۇلتتىق سپورتتىڭ رەسپۋبليكالىق، حالىقارالىق باسەكەسىندە دارا شىققان جەڭىمپازدار بولدى. اۋدارىسپاق، تەڭگە ءىلۋ، جامبى اتۋدان، كوكپاردان الماتىدا وتكەن جاستار اراسىنداعى ءى ازيا چەمپيوناتىندا، «التىن جەبە» ءى الەم چەمپيوناتىندا جەڭىمپاز اتانعان، بايگە مەن قۇسبەگىلىك باسەكەلەرىندە توپ جارعان جانە توعىزقۇمالاقتان، اسىق اتۋدان، قازاق كۇرەسىنەن حالىقارالىق جارىستاردا جۇلدەلى ورىن يەلەنگەن كوپتەگەن سپورتشىلار «التىن تۇعىر» سىيلىعىنا لايىق دەپ تانىلدى.

اتاپ ايتساق، ۇلتتىق سپورت تۇرلەرىنىڭ ۇزدىكتەر نوميناتسياسى بويىنشا «ۇزدىك مەرگەندەر» – ايكوز ەرالحان مەن باباجان باقداۋلەت، «ۇزدىك بايگە اتتارى» – «قويانقاسقا»، «ۇشقوڭىر»، «قىزجيرەن»، «ۇزدىك اۋدارىسپاق بالۋاندارى» – امانجول نۇربەك، قۇرالباي ەرمەك، يمانعازى ۇلى نارماعانبەت، اعابەك عابيت، «ۇزدىك قازاق كۇرەسىنىڭ بالۋانى» – تۇتقىشەۆ ناريمان، «ۇزدىك توعىزقۇمالاق ويىنشىسى» – تەمىرباەۆ عالىمجان، «ۇزدىك اسىق اتۋ كومانداسى» – نۇر-سۇلتان قالاسىنىڭ كومانداسى، «ۇزدىك بۇركىتشى» – سەرىكبولسىن جالعاس ۇلى، «ۇزدىك تەڭگە ءىلۋ سپورتشىسى» – عالىمجان ءىزجانوۆ، «ۇزدىك كوكپار كومانداسى» – كوكپاردان قر جاستار قۇراما كومانداسى، «ۇزدىك كوكپارشى» – قۇرمانبەك تۇرعانبەك، «ۇلتتىق ات سپورتىنىڭ ۇزدىك تورەشىسى» – ەرلان ءجۇسىپوۆ، «ۇزدىك جاتتىقتىرۋشى» – ارسلان قابجانوۆ، «ۇزدىك ۇلتتىق سپورت كلۋبى» – «اۋليە اتا» ۇلتتىق سپورت كلۋبى، «جاپپاي كوكپار ۇزدىكتەرى» – عالىمجان مىرزاباەۆ، جومارت زيابەك اتاندى. سونداي-اق، الماتى وبلىسىنىڭ اكىمى اماندىق باتالوۆ پەن ۇلتتىق وليمپيادا كوميتەتىنىڭ باس حاتشىسى ساكەن مۇسايبەكوۆكە «ەلىمجان» مەدالى تابىس ەتىلىپ، ۇزاق جىلدار وسى سالاعا ەڭبەك سىڭىرگەن كوپتەگەن ارداگەرلەرگە قۇرمەت كورسەتىلدى.