ۇلتتىق سپورتقا ارنالعان القا ءماجىلىسى اياقتالدى

بۇگىن ۇلتتىق سپورتتى دامىتۋعا ارنالعان ءۇش كۇندىك القا ءماجىلىسىنىڭ قورىتىندى جيىنى بولىپ ءوتتى، دەپ حابارلادى ۇلتتىق سپورت قاۋىمداستىعى.

ەلورداداعى ۇلتتىق مۋزەيدە وتكەن جيىندى جۇرگىزگەن ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان بىرنەشە كۇندىك القا ءماجىلىسىنىڭ ءمان-ماڭىزىن ايتا كەلىپ، ۋاقىتتارىن ءبولىپ ارنايى كەلگەن بارشا قاتىسۋشىلارعا ءوز ريزالىعىن جەتكىزدى. مادەنيەت جانە سپورت ۆيتسە-ءمينيسترى ەلدوس رامازانوۆتىڭ قۇتتىقتاۋ حاتى وقىلدى.

قورىتىندى جيىننىڭ كۇن ءتارتىبى بويىنشا «2019 جىلى اتقارىلعان ءىس-شارالاردىڭ قورىتىندىسى جانە 2020 جىلعا ارنالعان كۇنتىزبەلىك جوسپارداعى ءىس-شارالار» تۋرالى ۇلتتىق سپورت قاۋىمداستىعىنىڭ اتقارۋشى ديرەكتورى نۇرسۇلتان يبراگيموۆتىڭ، «قر ۇلتتىق سپورت قاۋىمداستىعى مەن مەملەكەتتىك ورگاندار اراسىنداعى قارىم-قاتىناستى نىعايتۋ» تۋرالى سپورت جانە دەنە شىنىقتىرۋ ىستەرى كوميتەتىنىڭ باسقارما باسشىسى قارلىعاش رامازانوۆانىڭ جانە «الەمدىك ەتنوسپورت» تۋرالى «ءداستۇرلى ساداق اتۋ» فەدەراتسياسىنىڭ پرەزيدەنتى ازامات وسپانوۆتىڭ باياندامالارى تىڭدالدى.

سونداي-اق، قاۋىمداستىق پرەزيدەنتى وسى جيىندا كوكپار، اۋدارىسپاق، جامبى اتۋ، تەڭگە ءىلۋ سپورت تۇرلەرى بويىنشا جاڭادان تاعايىندالعان فەدەراتسيا باسشىلارى مەن ۆيتسە-پرەزيدەنتتەردى تانىستىردى. اتاپ ايتساق، «كوكپار» سپورت ءتۇرى بويىنشا – مۇحتار يماشەۆ، «اۋدارىسپاق» سپورت ءتۇرى بويىنشا – دانيار قوبىلاندين، «جامبى اتۋ» سپورت ءتۇرى بويىنشا – ەرلان ساۋرانباەۆ، «تەڭگە ءىلۋ» سپورت ءتۇرى بويىنشا – قۋانىش كۋراشەۆ سىندى ۇلتتىق سپورت تۇرلەرىنە بىرنەشە جىل قولداۋ كورسەتىپ كەلگەن ىسكەر، كاسىپكەر ازاماتتار قاۋىمداستىقتىڭ ۆيتسە-پرەزيدەنتى قىزمەتىنە تاعايىندالدى.

ءماجىلىس سوڭىندا ۇلتتىق سپورتتىڭ دامۋىنا بەلسەندى تۇردە ۇلەس قوسىپ، ەڭبەك سىڭىرگەن قىزمەتكەرلەر مەن سپورت ماماندارىنا ۇلتتىق سپورت قاۋىمداستىعىنىڭ العىس حاتتارى تاپسىرىلىپ، سىيلىقتار تابىس ەتىلدى.

ەسكە سالىپ وتسەك، ۇلتتىق سپورتتى دامىتۋعا ارنالعان ءۇش كۇندىك القا ءماجىلىسىنىڭ وتكەن ەكى كۇنىندە ۇلتتىق سپورتقا قاتىستى ءبىر قاتار ماسەلەلەر تالقىلانىپ، ءوز شەشىمىن تاپتى. جاڭا رەداكتسياداعى ەرەجەلەر بەكىتىلدى. باس تورەشىلەردىڭ جىل بويى اتقارىلعان جۇمىستارى جونىندە ەسەپتەرى تىڭدالىپ، سپورت تۇرلەرىنەن 2020 جىلعا باس تورەشىلەر جاڭادان سايلاندى. تارتىپتىك كەڭەس وتىرىسى ءوتتى.