• Қазақ
  •   
  • Qazaq
  •   
  • قازاق
  •   
  • Рус
  •   

    ساعادات باتىر سپورت كلۋبى ساڭلاقتارعا سىي كورسەتتى

    تاريحتىڭ جىلناماسىنا جازىلاتىن بيىلعى جىل قازاق سپورتى ءۇشىن تابىسسىز بولعان جوق. ءتۇرلى دەڭگەيدەگى سايىستاردا قانجىعامىز مايلانىپ، ولجالى ورالدىق.  جاڭا جىل قارساڭىندا  سپورتشىلارىمىزدى ماراپاتتاۋ، قۇرمەت كورسەتۋ شاراسى الماتى وبلىسى، ىلە اۋدانى، اشىبۇلاق اۋىلىندا دا ءوتتى. ۇيىمداستىرعان – «Sagadat Batyr – QTT» سپورت كلۋبى.

    ساعادات قوجاحمەت ۇلى نۇرماعانبەتوۆتىڭ  95 جىلدىعىنا وراي ۇيىمداستىرىلعان سپورت كلۋبىنىڭ جىلدىق ەسەپ بەرۋ كەشىندە  «جىل ۇزدىگى – 2019» نوميناتسياسى بويىنشا جاس ەرەكشەلىكتەرىنە قاراي تايماس ساليموۆ، ناريمان داۋلباەۆ، سامات ايتپانبەت ماراپاتتالدى.
    – بيىلعى جىل «Sagadat Batyr – QTT»  كلۋبى ءۇشىن ءساتتى جىل بولدى. كلۋبتا جاتتىعىپ، ءتۇرلى دەڭگەيلى سايىستاردا جارقىراپ كورىنگەن   ۇش سپورتشى  قازاقستاننىڭ دجيۋ- دجيتسۋدان سپورت شەبەرى، 20-دان اسا سپورتشى  دجيۋ- دجيتسۋدان سپورت شەبەرىنە ۇمىتكەر اتاعىنا يە بولدى، – دەيدى كلۋبتىڭ جاتتىقتىرۋشىسى نۇرسۇلتان ورىنباساروۆ.

    اسكەري قايراتكەر، ارميا گەنەرالى، كەڭەس وداعىنىڭ باتىرى، قازاقستان رەسپۋبليكاسىنىڭ تۇڭعىش قورعانىس ءمينيسترى، «حالىق قاھارمانى» ساعادات نۇرماعانبەتوۆتىڭ ەسىمىمەن اتالاتىن كلۋبتىڭ اشىلعانىنا ەكى-ءۇش جىلدىڭ كولەمى بولسا دا، بىلىكتى جاتتىقتىرۋشىلار باپتاعان تالاپتى جاستاردىڭ شىققان شىڭى، اسقان اسۋى كوپ. تەك بيىلدىڭ وزىندە بىرنەشە حالىقارالىق تۋرنيرلەرگە، الەم چەمپيوناتىنا قاتىسىپ، تولايىم تابىسپەن ورالدى. ءساۋىر ايىندا بىرىككەن اراب امىرلىگىنىڭ   ابۋ-دابي قالاسىندا دجيۋ-دجيتسۋدان وتكەن الەم چەمپيوناتىندا  «Sagadat Batyr» سپورت  كلۋبىنىڭ سپورتشىلارى 10 التىن، 5 كۇمىس، 7 قولا مەدالمەن ورالدى. سونداي-اق، رەسەيدىڭ استاناسى  ماسكەۋدە، قىرعىزستان رەسپۋبليكاسىنىڭ بىشكەك جانە وش  قالاسىندا، وزبەكستاننىڭ باس قالاسى تاشكەنتتە جانە ەلىمىزدىڭ نۇر-سۇلتان جانە الماتى قالالارىندا وتكەن حالىقارالىق تۋرنيرلەردە  وسى كلۋبتىڭ 80-نەن اسا سپورتشىسى  جەڭىس تۇعىرىنا كوتەرىلىپ، كوك تۋىمىزدى جەلبىرەتتى.

    وسى جىلى  ساعادات قوجاحمەت ۇلى  نۇرماعانبەتوۆ  اتىنداعى  «Sagadat Batyr» سپورت  كلۋبى  «Nur Otan» پارتياسى  ىلە  اۋداندىق  فيليالىمەن  جانە ىلە اۋداندىق  بالالار مەن جاسوسپىرىمدەر سپورت مەكتەبىمەن تىزە قوسىپ جاسوسپىرىمدەر اراسىندا  ءۇش تۋرنير وتكىزدى. ناۋرىز ايىندا  ساعادات نۇرماعانبەتوۆتىڭ  95 جىلدىعىنا  وراي  ساعادات  باتىر  ءتۋرنيرى، شىلدە ايىندا  جاستار جىلىنا  وراي  اشىق تۋرنير جانە قازان ايىندا  وتەگەن باتىر وتەعۇل ۇلىنىڭ  320 جىلدىعىنا وراي  بىرىنشىلىكتەر وتكىزدى.

    دوداعا ەلىمىزدىڭ ءار ءتۇرلى وبلىستارى مەن قالالارىنان جانە كورشىلەس ەل قىرعىزستان ەلىنەن دە دجيۋ-دجيتسۋ شەبەرلەرى قاتىسىپ، باقتارىن سىنادى.

    «Sagadat Batyr – QTT» كلۋبىنىڭ جۇيەلى جۇرگىزگەن جۇمىسىنىڭ ناتيجەسىندە جەتكەن جەتىستىكتەردى سارالاعان كەشتە پاتريوتتىق اندەر شىرقالدى. دجيۋ-دجيتسۋ جانە گرەپللينگ  كۇرەسىنەن  ەل نامىسىن ابىرويمەن قورعاعان تالاپتى جاستاردى ساحنا تورىندە كەشتىڭ قۇرمەتتى قوناقتار ماراپاتتادى. ىلە اۋداندىق ءماسليحات توراعاسى، اۋداندىق قوعامدىق كەڭەس توراعاسى، ساعادات قوجاحمەت ۇلى نۇرماعانبەتوۆ  اتىنداعى  «Sagadat Batyr»  سپورت كلۋبنىڭ  پرەزيدەنتى ەربولات ساپار ۇلى تۇرىمبەتوۆ ، دجيۋ – دجيتسۋ قاۋىمداستىعىنىڭ ۆيتسە – پرەزيدەنتى، الماتى وبلىسى قۇراماسىنىڭ باس باپكەرى، قازاقستان رەسپۋبليكاسىنىڭ  ەڭبەك  سىڭىرگەن  جاتتىقتىرۋشىسى نۇرجان كەنجە ۇلى ەلكەەۆ،  اۋداندىق ارداگەرلەر القاسىنىڭ توراعاسى «نۇر وتان» پارتياسى بيۋروسىنىڭ مۇشەسى  امزە الديبەك ۇلى يساەۆ جاس سپورتشىلارعا ساتتىلىك تىلەدى.

     

    قۋانىش راحمەت،

     الماتى وبلىسى،

     ىلە اۋدانى.

    پىكىر جازۋ

    Your email address will not be published. Required fields are marked *

    *